រដ្ឋធានីវ៉ាស៊ីនតោន ៖ លោកប្រធានាធិបតីអាមេរិក ដូណាល់ ត្រាំ បានបង្ហើបប្រាប់អឺរ៉ុបថា លោកអាចនឹងដាក់ពន្ធលើរថយន្តរបស់ក្រុមហ៊ុនអាល្លឺម៉ង់ ប្រសិនបើសហភាពអឺរ៉ុបមិនបន្ធូរបន្ថយឧបសគ្គពាណិជ្ជកម្មសម្រាប់ផលិតផលអាមេរិក ។
ការគំរាមកំហែងនេះកើតមានឡើង ខណៈលោកត្រាំ ប្រកាសថា នឹងដាក់ពន្ធលើដែកថែប និងអាលុយមីញ៉ូមនាំចូលពីគ្រប់ប្រទេស មកកាន់សហរដ្ឋអាមេរិក ។
លោកបានប្រាប់សាធារណជននៅរដ្ឋ Pennsylvania កាលពីថ្ងៃសៅរ៍ថា ៖« ប្រសិនបើអឺរ៉ុបមិនកាត់បន្ថយឧបសគ្គពាណិជ្ជកម្មលើផលិតផលអាមេរិកទេនោះ យើងនឹងដាក់ពន្ធលើ Mercedes-Benz និង BMW » ។
វាមិនទាន់ច្បាស់នៅឡើយទេថា ការគំរាមកំហែងនេះ គឺជាគោលនយោបាយរបស់អាមេរិកពិតប្រាកដ ឬគ្រាន់តែជាការអួតបង្ហាញដើម្បីទាក់ទាញចិត្តសាធារណជន ។
លោកបានសរសេរនៅលើ Twitter ថា ៖«សហភាពអឺរ៉ុបមានប្រទេសជាច្រើនដែលធ្វើមិនល្អដាក់សហរដ្ឋអាមេរិកក្នុងផ្នែកពាណិជ្ជកម្ម ហើយកំពុងតែរអ៊ូរទាំពីរឿងពន្ធលើដែកថែប និងអាលុយមីញ៉ូម ។ ប្រសិនបើពួកគេដកឧបសគ្គពាណិជ្ជកម្ម និងពន្ធដ៏ធ្ងន់ធ្ងរលើផលិតផលអាមេរិកនោះ យើងអាចនឹងកាត់បន្ថយពន្ធដែរ ។ វាមានឱនភាពធំណាស់ យើងនឹងដាក់ពន្ធលើរថយន្ត » ។
Pennsylvania គឺជារដ្ឋដែលផលិតដែកថែបដ៏ធំមួយនៅសហរដ្ឋអាមេរិក ប៉ុន្តែបានបាត់បង់ការងារជាច្រើនក្នុងផ្នែកនេះ ព្រោះតែការប្រើប្រាស់ម៉ាស៊ីន និងការប្រកួតប្រជែងពីបរទេស ។ លោកត្រាំ និយាយថា ប្រទេសក្នុងសហភាពអឺរ៉ុបបានសម្លាប់យើងក្នុងផ្នែកពាណិជ្ជកម្ម ។
លោកបន្តថា ៖« យើងមិនអាចលក់កសិផលរបស់យើងនៅទីនោះផង ប៉ុន្តែពួកគេទប់ស្កាត់យើងយ៉ាងខ្លាំង ហើយពួកគេនិយាយថា យើងចង់កាត់បន្ថយពន្ធទាំងនោះ ។ ខ្ញុំថា វាល្អហើយ ដកឧបសគ្គពាណិជ្ជកម្ម និងពន្ធរបស់អ្នកចេញទៅ ហើយបើអ្នកមិនចង់ធ្វើដូច្នេះទេ យើងនឹងដាក់ពន្ធលើ Mercedes-Benz និង BMW »។
គួរបញ្ជាក់ថា ក្រុមហ៊ុនផលិតយានយន្តរបស់ប្រទេសអាល្លឺម៉ង់ទាំងពីរនេះ បានលក់រថយន្តរាប់ពាន់គ្រឿងនៅសហរដ្ឋអាមេរិក ហើយពួកគេក៏មានរោងចក្រផលិតក្នុងប្រទេសនេះផងដែរ ៕
ចែករំលែកព័តមាននេះ