ខេត្តកណ្ដាល ៖ កម្លាំងសមត្ថកិច្ចចម្រុះរបស់ខេត្តកណ្តាល នាព្រឹកថ្ងៃទី២៨ កុម្ភៈ បានចុះបង្ក្រាបទីតាំងធ្វើអាជីវកម្មគ្មានច្បាប់អនុញ្ញាតនៅចំណុចផ្ទះរបស់ឈ្មោះ សុខ វណ្ណដា ភេទប្រុស អាយុ ៣១ឆ្នាំ ស្ថិតក្នុងភូមិអរិយក្សត្រ ឃុំអរិយក្សត្រ ស្រុកល្វាឯម ខេត្ដកណ្ដាល។ ជនសង្ស័យម្នាក់ ឈ្មោះ សុខ វណ្ណដា ភេទប្រុស អាយុ៣១ឆ្នាំ ជនជាតិខ្មែរ មុខរបរលក់ដូរ ទីលំនៅភូមិអរិយក្សត្រ ឃុំអរិយក្សត្រ ស្រុកល្វាឯម ខេត្ដកណ្ដាល។ វត្ថុតាងដែលសមត្ថកិច្ចចាប់យកបាននោះរួមមាន ៖
១.ម៉ូតូ៥៨គ្រឿង
២.បង្កាន់ដៃបញ្ចាំម៉ូតូ មិនមានប័ណ្ណសម្គាល់ចំនួន៤៩សន្លឹក
៣.បង្កាន់ដៃបញ្ចាំម៉ូតូ មានប័ណ្ណសម្គាល់ចំនួន២៥សន្លឹក
៤.បង្កាន់ដៃបញ្ចាំរថយន្ដចំនួន ០៣សន្លឹក
៥.ម៉ាស៊ីនផ្ទុកទិន្នន័យកាមេរាសុវត្ថិភាពចំនួន០១គ្រឿង។ ប្រភពពីសមត្ថកិច្ចបានឲ្យដឹងថា នៅថ្ងៃទី២៨ កុម្ភៈ ២០១៨ វេលាម៉ោង៩ និង២០នាទីព្រឹក ក្រោយពីទទួលបានព័ត៌មាន ពីប្រជាពលរដ្ឋ និងជនសង្ស័យបានឆ្លើយសារភាពថាយកម៉ូតូ ទៅលក់ ឬដាក់បញ្ចាំ នៅអរិយក្សត្រ ស្រុកល្វាឯម ខេត្ដកណ្ដាល។
កម្លាំងការិយាល័យនគរបាលព្រហ្មទណ្ឌកម្រិតស្រាល សហការជាមួយអធិការដ្ឋាននគរបាលស្រុកល្វាឯម និងដោយមានការសម្របសម្រួល ដឹកនាំដោយលោក ឯក ស៊ុនរស្មី ព្រះរាជអាជ្ញារង អមសាលាដំបូងខេត្តកណ្តាល បានធ្វើការត្រួតពិនិត្យឆែកឆេរលំនៅដ្ឋានរបស់ឈ្មោះ សុខ វណ្ណដា ដែលធ្វើអាជីវកម្មខុសច្បាប់ និងទទួលបញ្ចាំម៉ូតូមួយចំនួន គ្មានប័ណ្ណសម្គាល់ទោចក្រយាន្ដយន្ដ។ នៅចំពោះមុខសមត្ថកិច្ចនគរបាល ឈ្មោះ សុខ វណ្ណដា បានឆ្លើយថា ខ្លួនពិតជាបានទទួលបញ្ចាំ ដោយពុំមានច្បាប់អនុញ្ញាតប្រកបអាជីវកម្មពិតប្រាកដមែន និងទទួលបញ្ចាំម៉ូតូមួយចំនួនគ្មានឯកសារគ្រប់គ្រាន់។ បន្ទាប់មកម្ចាស់ទីតាំងទទួលបញ្ចាំ ត្រូវបានសមត្ថកិច្ចបានអនុញ្ញាតឲ្យទៅផ្ទះវិញ៕
ចែករំលែកព័តមាននេះ