រាជធានីភ្នំពេញ ៖ ក្រសួងសាធារណការ និងដឹកជញ្ជូន រួមនឹងស្ថាប័នសមត្ថកិច្ចពាក់ព័ន្ធ បានរកឃើញរថយន្ដមានលក្ខណៈខុសបច្ចេកទេស ដែលកំណត់ដោយច្បាប់នៅទូទាំងប្រទេស មានចំនួន៣៤.៩០២គ្រឿង ។ នេះបើយោងតាមការអះអាងពីមន្ត្រីអ្នកនាំពាក្យក្រសួងសាធារណការ…
រាជធានីភ្នំពេញ ៖ ក្រសួងសាធារណការ និងដឹកជញ្ជូន រួមនឹងស្ថាប័នសមត្ថកិច្ចពាក់ព័ន្ធ បានរកឃើញរថយន្ដមានលក្ខណៈខុសបច្ចេកទេស ដែលកំណត់ដោយច្បាប់នៅទូទាំងប្រទេស មានចំនួន៣៤.៩០២គ្រឿង ។ នេះបើយោងតាមការអះអាងពីមន្ត្រីអ្នកនាំពាក្យក្រសួងសាធារណការ និងដឹកជញ្ជូន ។
ចំណាត់ការក្ដៅគកុកនេះធ្វើឡើងបន្ទាប់ពីប្រមុខរាជរដ្ឋាភិបាល កាលពីថ្ងៃទី១០ កុម្ភៈ បានប្រកាសដាក់ចេញនូវវិធានការយ៉ាងតឹងរ៉ឹង ឱ្យមានការត្រួតពិនិត្យលើរថយន្តដឹកជញ្ជូន ។
លោក វ៉ា ស៊ឹមសុរិយា មន្ត្រីអ្នកនាំពាក្យនៃក្រសួងសាធារណការ និងដឹកជញ្ជូន បានមានប្រសាសន៍កាលពីថ្ងៃទី២១ កុម្ភៈ ម្សិលមិញថា ៖« តាមរបាយការណ៍ទទួលបានគិតត្រឹមថ្ងៃទី១៩ កុម្ភៈ យើងបានត្រួតពិនិត្យឃើញរថយន្តតទ្រុងខុសលក្ខណៈបច្ចេកទេស និងដឹកជញ្ជូនសំពីងសំពោងទាំងតូចទាំងធំ បើកបរលើដងផ្លូវ នៅទូទាំងប្រទេសសរុបប្រមាណ៣៤.៩០២គ្រឿង ហើយកាត់នៅនឹងកន្លែងមានចំនួន៤៦៧គ្រឿង និងធ្វើការឃាត់ទុកចំនួន៤៤៨គ្រឿង» ។
លោកបញ្ជាក់ថា ៖« ក្នុងចំណោមរថយន្តដែលក្រសួង និងស្ថាប័នត្រួតពិនិត្យឃើញមានលក្ខណៈខុសបច្ចេកទេសច្រើនជាងគេ គឺមាននៅខេត្តកំពង់ចាម, រាជធានីភ្នំពេញ, កំពង់ធំ និងត្បូងឃ្មុំ » ។
តាមមន្ត្រីអ្នកនាំពាក្យ រថយន្តតខុសបច្ចេកទេសធ្វើការដឹកជញ្ជូនលើសទម្ងន់ វាធ្វើឱ្យខូចផ្លូវ តែពេលខ្លះ វាដឹកមិនលើសទម្ងន់ តែវាសំពីងសំពោង ពិបាកក្នុងពេលធ្វើចរាចរណ៍លើដងផ្លូវឬពិបាកបត់នៅត្រង់ចំណុចរង្វង់មូល បើរថយន្តមានប្រវែងលើសពី១៦ ឬ១៦,៥ម៉ែត្រ ។ លើសពីនេះ ធ្វើឱ្យស្ទះដល់អ្នកដំណើរផ្សេងទៀត និងអាចបង្កឱ្យមានគ្រោះថ្នាក់ជាយថាហេតុ ។
លោកបន្តថា ៖« ទាក់ទងនឹងការត្រួតពិនិត្យទៅលើរថយន្តបើកបរនៅលើដងផ្លូវនេះ អត់ទាន់មានការកំណត់ទេ គឺយើងធ្វើរហូត អត់ទាន់មានគោលការណ៍ឱ្យឈប់ ។ ប្រមុខរាជរដ្ឋាភិបាលដាក់ចេញនូវយុទ្ធនាការ តែច្បាប់ត្រូវតែធ្វើរហូត គ្រាន់តែថា យើងបន្ថយឬបង្កើន ផ្អែកទៅលើសិ្ថតិដែលទទួលបាន » ។
គួររំឭកថា នៅក្នុងឱកាសអញ្ជើញជាអធិបតីក្នុងពិធីសម្ពោធបើកការដ្ឋានសាងសង់ស្ពានឆ្លងទន្លេមេគង្គភ្ជាប់ទឹកដីខេត្តកំពង់ចាម និងខេត្តត្បូងឃ្មុំ កាលពីថ្ងៃទី៩ កុម្ភៈ កន្លងទៅ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានព្រមានធ្ងន់ៗថា ៖« ចាប់ពីសូន្យម៉ោងយប់ឆ្លងចូលថ្ងៃទី១០ ខែកុម្ភៈ ឆ្នាំ២០១៨តទៅ ឱ្យតែមានឡានតទ្រុងខុសលក្ខណៈបច្ចេកទេស ត្រូវចាប់បញ្ចូលទ្រុងទាំងអស់ ពីព្រោះយានយន្តទាំងនោះបានបំផ្លាញអាយុជីវិតមនុស្ស និងបំផ្លាញផ្លូវថ្នល់ដែលយើងរកលុយទាំងលំបាក លុយខ្លួនឯងផង លុយខ្ចីគេផងយកមកធ្វើផ្លូវ ហេតុអីបានជាមកបំផ្លាញផ្លូវដើម្បីចំណេញក្រុមហ៊ុនមួយ » ៕
ចែករំលែកព័តមាននេះ