រាជធានីភ្នំពេញ ៖ កសិកម្ម គឺជាវិស័យមួយយ៉ាងសំខាន់ក្នុងការទ្រទ្រង់កំណើនសេដ្ឋកិច្ចជាតិ។ ដោយមើលឃើញធនធានមនុស្សក្នុងវិស័យនេះនៅមានកម្រិត ទីភ្នាក់ងារអភិវឌ្ឍន៍ប្រទេសកូរ៉េ ហៅកាត់ថា KOICA បានអនុវត្តគម្រោងមួយដើម្បីជំរុញធនធានមនុស្សខាងវិស័យកសិកម្មឱ្យកាន់តែប្រសើរជាងមុន ។…
រាជធានីភ្នំពេញ ៖ កសិកម្ម គឺជាវិស័យមួយយ៉ាងសំខាន់ក្នុងការទ្រទ្រង់កំណើនសេដ្ឋកិច្ចជាតិ។ ដោយមើលឃើញធនធានមនុស្សក្នុងវិស័យនេះនៅមានកម្រិត ទីភ្នាក់ងារអភិវឌ្ឍន៍ប្រទេសកូរ៉េ ហៅកាត់ថា KOICA បានអនុវត្តគម្រោងមួយដើម្បីជំរុញធនធានមនុស្សខាងវិស័យកសិកម្មឱ្យកាន់តែប្រសើរជាងមុន ។
គម្រោងនេះមានរយៈពេល៤ឆ្នាំ ដែលត្រូវចំណាយថវិកាប្រមាណ២លានដុល្លារ ដោយចាប់ផ្តើមអនុវត្តពីឆ្នាំ២០១៦ដល់ឆ្នាំ២០១៩ និងអនុវត្តនៅសាលាជាតិកសិកម្មកំពង់ចាម។
តាមរយៈអ្នកបកប្រែ លោកសាស្ត្រាចារ្យ Lee Youn Su ប្រធានគម្រោងលើកកម្ពស់គុណភាព និងនវានុវត្តន៍សាលាជាតិកសិកម្មកំពង់ចាម បានថ្លែងកាលពីព្រឹកថ្ងៃទី១៨ មករា នៅសណ្ឋាគារអាំងទែរកុងទីណង់តាល់ ថា គម្រោងនេះមានបំណងពង្រឹងសមត្ថភាពសាលាជាតិកសិកម្មកំពង់ចាម លើកកម្ពស់ការអប់រំដែលមានស្រាប់ និងបង្កើតផែនការមេសម្រាប់ការអភិវឌ្ឍ ។
លោកជឿថា គម្រោងនេះនឹងចូលរួមចំណែកយ៉ាងសំខាន់ក្នុងការអភិវឌ្ឍសមត្ថភាព និងបង្កើនការងារសម្រាប់យុវជន តាមរយៈការផ្តល់បច្ចេកទេស និងចំណេះដឹងជាក់ស្តែង ។
លោកបន្ថែមថា ៖« យើងត្រូវបង្កើតផែនការមេសម្រាប់រយៈពេលមធ្យម និងរយៈពេលវែង អីចឹងយើងត្រូវធ្វើការរៀបចំ ក៏ដូចជាការគ្រប់គ្រងមហាវិទ្យាល័យ ។ យើងត្រូវរៀបចំគម្រោងការអប់រំទៅលើវិទ្យាសាស្ត្រកសិកម្ម និងការអភិវឌ្ឍកម្មវិធីសិក្សាជាដើម ។
លើសពីនេះទៀត ក្នុងពេលអនាគត យើងក៏មានផែនការបង្កើតអាជីវកម្មកសិកម្មផងដែរ» ។
លោកបន្តថា ដើម្បីបង្កើនសមត្ថភាពសម្រាប់វិស័យនេះ លោកនឹងអភិវឌ្ឍន៍សៀវភៅសិក្សា បង្កើតវគ្គសិក្សារយៈពេលខ្លី និងវែង និងថ្នាក់បរិញ្ញាបត្រជាន់ខ្ពស់ ហើយ KOICA ក៏មានផ្តល់មន្ទីរពិសោធន៍ បរិក្ខារ និងសម្ភារបង្រៀនផ្សេងៗទៀត ។
លោក សួន សេរី នាយកសាលាជាតិកសិកម្មកំពង់ចាម បានថ្លែងនៅក្នុងកម្មវិធីនេះថា ចាប់តាំងពីឆ្នាំ២០១៣មក សិស្សនៅសាលាជាតិកសិកម្មកំពង់ចាមបានថយចុះយ៉ាងខ្លាំង ជាពិសេស ថ្នាក់បរិញ្ញាបត្រ ។ ការធ្លាក់ចុះនេះ ដោយសារកំណែទម្រង់ការអប់រំរបស់រាជរដ្ឋាភិបាល និងការធ្វើចំណាកស្រុករបស់យុវជន។ ប៉ុន្តែនៅឆ្នាំ២០១៦និង២០១៧ ចំនួនសិស្សហាក់នៅថេរ ។
លោកបន្តថា បន្ទាប់ពីគម្រោងនេះបានអនុវត្ត គឺបានជួយពង្រឹងសមត្ថភាពធនធានមនុស្សនៅក្នុងសាលា ហើយកន្លងមក មន្ត្រីមួយចំនួនត្រូវបានបញ្ជូនទៅបណ្តុះបណ្តាលនៅសាកលវិទ្យាល័យកាងវុន ប្រទេសកូរ៉េផងដែរ ។
យ៉ាងណាមិញ លោកថា សាលានៅខ្វះបរិក្ខារ និងមន្ទីរពិសោធន៍សម្រាប់សិស្សធ្វើការស្រាវជ្រាវ ។
លោក សុខ ស៊ីឡូ ទីប្រឹក្សាក្រសួងកសិកម្ម រុក្ខាប្រមាញ់ និងនេសាទ សង្ឃឹមថា តាមរយៈគម្រោងលើកកម្ពស់គុណភាព និងនវានុវត្តន៍នេះ សាលាជាតិកសិកម្មកំពង់ចាម នឹងដើរតួនាទីយ៉ាងសំខាន់ក្នុងការអប់រំបណ្តុះបណ្តាល និងអភិវឌ្ឍន៍ក្នុងតំបន់បម្រើ ឱ្យវិស័យកសិកម្មដែលជាវិស័យអាទិភាព និងវិស័យពាក់ព័ន្ធនានា ហើយក៏បាននិង កំពុងធ្វើសកម្មភាពផ្សេងៗដើម្បីជួយគាំទ្រ និងជំរុញវិស័យនេះឱ្យងើបចាកផុតពីភាពអន់ថយ និងឈានទៅរកការវិវត្តប្រែប្រួលគួរឱ្យកត់សម្គាល់ ។
ជាមួយគ្នានេះដែរ លោកបានជំរុញឲ្យបន្តលើកកម្ពស់កិច្ចសហប្រតិបត្តិការជាតិ និងអន្តរជាតិ ជាពិសេសកិច្ចប្រតិបត្តិការជាមួយសាកលវិទ្យាល័យជាតិកាងវុន ឱ្យបានរឹងមាំលើការអភិវឌ្ឍកម្មវិធីសិក្សា ការផ្លាស់ប្តូរវិទ្យាសាស្ត្របច្ចេកទេស ផ្លាស់ប្តូរសាស្ត្រាចារ្យ និស្សិត និងការរកដៃគូអភិវឌ្ឍន៍រួមគ្នា ។
បន្ថែមពីនេះ លោកលើកឡើងថា មន្ត្រីរាជការ សាស្ត្រាចារ្យទាំងអស់ មិនត្រូវផ្តេកផ្តួលលើចំណេះដឹងដែលខ្លួនមានកន្លងមកនោះទេ គឺត្រូវខិតខំធ្វើការស្រាវជ្រាវស្វះស្វែងអភិវឌ្ឍន៍ខ្លួនឯងបន្ថែមទៀត ជាពិសេស រៀនសូត្រពីជំនាញបច្ចេកទេសរបស់គម្រោង៕
ចែករំលែកព័តមាននេះ