ទីក្រុងហូជីមិញ ៖ អាជីវកម្មភាគច្រើននៅទីក្រុងហូជីមិញ បានត្រៀមគម្រោងជាស្រេចនូវផលិតកម្មរបស់ខ្លួនសម្រាប់ស្វាគមន៍បុណ្យចូលឆ្នាំចិន ដែលនឹងឈានមកដល់នៅប្រមាណ២ខែខាងមុខនេះ ។
យោងតាមលោកស្រី Nguyen Huynh Trang អនុប្រធាននាយកដ្ឋានឧស្សាហកម្ម និងពាណិជ្ជកម្ម បានឲ្យដឹងថា តម្លៃផលិតកម្មដែលពួកគេនឹងផលិតសម្រាប់មុន និងបន្ទាប់ពីបុណ្យចូលឆ្នាំចិន នឹងស្មើប្រមាណ៧៨៤,១លានដុល្លារ ឬខ្ពស់ជាងឆ្នាំមុនប្រមាណ៣២,៧លានដុល្លារ ។
លោកស្រីបានបន្តថា ការផ្តោតសំខាន់នឹងមានទៅលើសាច់បក្សី, សាច់គោ, ស្ករ,ស៊ុត, អាហារបំប៉ុង, ប្រេងឆា និងអង្ករ ជាដើម ។
លោក Le Thi Thanh Lam នាយកគ្រប់គ្រងក្រុមហ៊ុន Saigon Food បាននិយាយថា ក្រុមហ៊ុនលោកបានផលិតនូវផលិតផលប្រមាណ ៨០០តោនបន្ថែមទៀត និងបានចេញលក់ផលិតផលកំប៉ុង និងអាហារឆ្អិនស្រាប់ចំនួន១៦មុខបន្ថែមដើម្បីត្រៀមផ្គត់ផ្គង់សម្រាប់បុណ្យចូលឆ្នាំចិនខាងមុខនេះ ។
ការផ្គត់ផ្គង់សាច់ និងស៊ុតជាច្រើនមានដូចជា Ba Huan និង Binh Thanh Dat និងក្រុមហ៊ុនផលិតគ្រឿងទេសផ្សេងៗ ក៏មានគម្រោងបង្កើនការផ្គត់ផ្គង់ផងដែរ ។
ផ្សារទំនើប និងហាងលក់ទំនិញជាច្រើនមានផែនការបង្កើនការផ្គត់ផ្គង់ប្រមាណពី២ទៅ៣ដងឯណោះ ។
ផលិតផលទាំងនោះ នឹងត្រូវលក់ចេញក្នុងតម្លៃស្របទៅតាមកម្មវិធីគ្រប់គ្រងតម្លៃរបស់ទីក្រុង ដែលនឹងកើនឡើងពី៥ទៅ៣០% ខណៈដែលអាហារស្រស់ដែលរួមមានបន្លែ, ផ្លែឈើសាច់, គ្រឿងទេស, នំចំណី, ភេសជ្ជៈ និងស្រាបៀរ នឹងមើលឃើញតម្លៃកើនឡើងពី១៥ទៅ៣០%បើធៀបនឹងឆ្នាំមុន ។
ចំណែកផ្សារទំនើប ក៏មានផែនការផ្តល់អាំងប៉ាវដែលមានតម្លៃពី៣ដុល្លារដល់៥៥ដុល្លារផងដែរ ។
នាយកដ្ឋានឧស្សាហកម្ម និងពាណិជ្ជកម្មបានឲ្យដឹងទៀតថា ក្រុមហ៊ុនផលិត និងអ្នកលក់រាយនឹងមានការលក់បញ្ចុះតម្លៃជាច្រើន ជាពិសេសសម្រាប់ភេសជ្ជៈ គ្រឿងទេស, នំចំណី, ស្ករគ្រាប់ និងសម្លៀកបំពាក់ជាដើម ។
ពួកគេបានបន្ថែមថា ក្រុមហ៊ុនដែលចូលរួមក្នុងកម្មវិធីគ្រប់គ្រងតម្លៃបានសន្យាថា នឹងរក្សាតម្លៃឋេរក្នុងរយៈពេល១ខែមុន និងបន្ទាប់ពីបុណ្យចូលឆ្នាំចិន ។ ក្រុមហ៊ុនទាំងនោះ នឹងបញ្ចុះតម្លៃផលិតផលសំខាន់ៗដូចជា សាច់ជ្រូក សាច់មាន់ និងស៊ុតជាដើមមុនបុណ្យចូលឆ្នាំចិននេះ ៕
ចែករំលែកព័តមាននេះ