រាជធានីភ្នំពេញ ៖ ជនសង្ស័យម្នាក់ក្នុងចំណោមបក្សពួក២នាក់បានជិះម៉ូតូទៅធ្វើសកម្មភាពបើកទ្វាររថយន្ត១គ្រឿងហើយឆក់កាបូបពីស្ត្រីម្នាក់ដែលកំពុងអង្គុយនៅក្នុងរថយន្តនោះបានសម្រេច ហើយបានជិះម៉ូតូរត់គេចខ្លួនប៉ុន្តែបានជ្រុលទៅបុករទេះដឹកទំនិញដែលគេទុកចោលនៅចិញ្ចើមផ្លូវបណ្ដាលឲ្យដួល ហើយក៏ត្រូវបាននគរបាលប៉ុស្ដិ៍កាកាប១ចាប់ខ្លួនបានម្នាក់ ចំណែកម្នាក់ទៀតបានគេចខ្លួនបាត់ដោយសុវត្ថិភាព ។ ហេតុការណ៏នេះបានកើតឡើងកាលពីវេលាម៉ោង២រសៀល ថ្ងៃទី២៦ ខែធ្នូ ឆ្នាំ២០១៧ នៅចំណុចផ្លូវបេតុងវត្តតាំងកសាង ភូមិក្បាលដំរី១ សង្កាត់កាកាប១ ខណ្ឌពោធិ៍សែនជ័យ ។
តាមប្រភពពីនគរបាលបានឲ្យដឹងថា ជនសង្ស័យដែលត្រូវចាប់ខ្លួនឈ្មោះ សុខ រក្សា ហៅអាម៉ៅ អាយុប្រហែល២០ឆ្នាំ មុខរបរសិស្ស មានទីលំនៅក្នុងភូមិអណ្តូងតាអន សង្កាត់សំរោងក្រោម ខណ្ឌពោធិ៍សែនជ័យ ។ ចំណែកបក្សពួកម្នាក់ទៀតដែលរត់គេចខ្លួនរួចនោះឈ្មោះ ផាន់ ណា អាយុប្រហែល១៨ឆ្នាំ មុខរបរសិស្សវិទ្យាល័ឈូកវ៉ា មានទីលំនៅជិតគ្នាហើយនគរបាលបានដកហូតបានម៉ូតូ១គ្រឿង ម៉ាកហុងដាឌ្រីមសេ១២៥ ស៊េរីឆ្នាំ២០១៨ ពណ៌ខ្មៅ ពាក់ស្លាកលេខ ភ្នំពេញ ១GS-៨០៨៧ ជារបស់ជនសង្ស័យខាងលើ ។ ដោយឡែកជនរងគ្រោះមិនបានប្រាប់ឲ្យដឹងឈ្មោះនោះទេហើយនៅក្នុងកាបូបគាត់នោះមាន អត្តសញ្ញាណប័ណ្ណ មួយសន្លឹក ទូរស័ព្ទដៃម៉ាកសាំស៊ុងS4 ១គ្រឿង និងលុយមួយចំនួនផងដែរ ។
ប្រភពដដែលបានបន្តទៀតថា នៅមុនពេលកើតហេតុជនសង្ស័យទាំងពីរនាក់បានជិះម៉ូតូ១គ្រឿងខាងលើចេញពីភូមិអណ្តូងតាអន សង្កាត់សំរោងក្រោម ចេញធ្វើសកម្មភាពឆក់កាបូប និងខ្សែ.កតាមផ្លូវទៅតាមឱកាស និងពេលវេលាដែលត្រូវអាចឆក់បាន លុះពេលជិះទៅដល់ត្រង់ចំណុចកើតហេតុខាងលើបានប្រទះឃើញស្ត្រីរងគ្រោះកំពុងអង្គុយនៅក្នុងរថយន្តឈប់ស្ងៀមពួកគេក៏បានជិះអែបទៅជិតហើយជនសង្ស័យឈ្មោះ សុខ រក្សា ហៅម៉ៅ ក៏បានចុះទៅធ្វើសកម្មភាពបើកទ្វាររថយន្តឆក់យកកាបូបពីស្ត្រីខាងលើបានសម្រេច ។ បន្ទាប់មកបានឡើងជិះម៉ូតូនាំគ្នាបន្លែមល្បឿនយ៉ាងលឿនរត់គេចខ្លួនសម្ដៅចូលទៅភ្នំពេញពេលនោះស្ត្រីរងគ្រោះបានស្រែកថា ចោរៗ បង្កឲ្យមានការភ្ញាក់ផ្អើលហើយដោយបាបកម្មពេលទៅដល់ត្រង់ចំណុចខាងក្រោយសួនកុមារពោធិ៍ចិនតុង ស្ថិតនៅក្នុងភូមិប៉ប្រកខាងជើង សង្កាត់កាកាប១ ក៏បានជួបគ្រោះថ្នាក់ចរាចរដោយបានបុករទេះអូសដឹកទំនិញដែលគេទុនៅក្បែរចិញ្ចើមផ្លូវបណ្ដាលឲ្យដួល ។
ប្រភពដដែលបានបន្តទៀតថា ពេលនោះប្រជាពលរដ្ឋបានជួយស្រែកបន្តថា ចោរៗបន្ថែមទៀត បង្កឲ្យមានការភ្ញាក់ផ្អើលកាន់តែខ្លាំងហើយភ្លាមៗនោះកម្លាំងនគរបាលប៉ុស្ដិ៍ចោមចៅ១កំពុងល្បាតនៅទីនោះបានធ្វើការឃាត់ខ្លួនបានម្នាក់ ចំណែកបក្សពួកម្នាក់ទៀតបានរត់គេចខ្លួនបាត់ស្រមោល ។ ក្រោយមកនគរបាលបាននាំជនសង្ស័យខាងលើទៅធ្វើការសាកសួរនៅប៉ុស្ដិ៍កាកាប១ រង់ចាំបញ្ជូនបន្តទៅសាលាដំបូងរាជធានីភ្នំពេញចាត់ការតាមផ្លូវច្បាប់ ៕
ចែករំលែកព័តមាននេះ