ប្រទេសកូរ៉េទាំង២ ៖ រដ្ឋាភិបាលកូរ៉េខាងត្បូងរាយការណ៍ថា ទាហានកូរ៉េខាងជើងម្នាក់ទៀតកាលពីថ្ងៃទី២១ ធ្នូ បានឆ្លងកាត់តំបន់ហាមមិនឱ្យមានកងទ័ព DMZ ដែលពុះចែកឧបទ្វីបកូរ៉េចូលមកកូរ៉េខាងត្បូង ។
ការរត់ចោលជួររបស់ទាហានកូរ៉េខាងជើងម្នាក់ទៀតនេះកើតមាន១ខែ ក្រោយការរត់ចោលជួររបស់ទាហានម្នាក់ទៀតក្រោមការបាញ់ស្រោចរបស់កងទ័ពកូរ៉េខាងជើង ។
អ្នកនាំពាក្យម្នាក់របស់ក្រសួងការពារប្រទេសកូរ៉េខាងត្បូងបញ្ជាក់ថា ទាហានរត់ចោលជួរលើកនេះមានឋានន្តរស័ក្តិខ្ពស់បន្តិច ត្រូវបានកងទាហានកូរ៉េខាងត្បូងប្រទះឃើញកាលពីថ្ងៃទី២១ ធ្នូ តាមរយៈការប្រើប្រាស់បណ្តាឧបករណ៍ត្រួតពិនិត្យខណៈរូបគេលួចរត់ឆ្លងកាត់ខ្សែបន្ទាត់ព្រំដែន ពេលមានអ័ព្ទគ្រាស់ ហើយអាចមកដល់ប៉ុស្តិ៍យាម ។
តាមអ្នកនាំពាក្យរូូបនេះថា ពុំមានការបាញ់កាំភ្លើង១គ្រាប់ណាឡើយ ពេលលួចរត់ ក៏ប៉ុន្តែបន្តិចក្រោយមក មានការបាញ់ព្រមានប្រមាណជា២០គ្រាប់ ដោយកាំភ្លើងយន្តធុនស្រាលមួយដើមធុន K-3 ដើម្បីជាការប្រកាសអាសន្នប្រាប់ដល់កងយោធាកូរ៉េខាងជើងដែលស្ថិតនៅក្បែរព្រំដែនប្រហែលជាចង់តាមរកទាហានដែលរត់ឆ្លងចូលដែនដីកូរ៉េខាងត្បូងរួចហើយ ។
ការរត់ចោលជួរថ្មីនេះកើតមាន១ខែក្រោយការត់ចោលជួរកាលពីថ្ងៃទី១៣ វិច្ឆិកា របស់ទាហានម្នាក់ទៀតដែលរត់ឆ្លងកាត់តំបន់ DMZ នៅត្រង់ចំណុចការពារសន្តិសុខរួម នាភូមិប៉ាន មុនហ្សូម ជាតំបន់តែមួយគត់របស់ DMZ ដែលកងទ័ពកូរ៉េទាំង២នៅទល់មុខគ្នា។ ទាហានរូបនេះត្រូវបានកាមេរ៉ាវីដេអូត្រួតពិនិត្យជាច្រើនថតបានពេលរូបគេបើករថយន្តហ្ស៊ីបមួយយ៉ាងលឿនមុនពេលជាប់គាំងបើកទៅមុខលែងរួច ជិតខ្សែបន្ទាត់ព្រំដែន ។ គេចុះរត់ហើយត្រូវកងទាហានកូរ៉េខាងជើងដេញតាមបាញ់រងរបួសធ្ងន់តែស៊ូរត់រហូតដល់ចូលដល់ដែនដីកូរ៉េខាងត្បូង ។ ពេលនេះរូបគេគេចផុតពីស្លាប់ហើយ ៕
ចែករំលែកព័តមាននេះ