រាជធានីភ្នំពេញ ៖ បុរសម្នាក់ជាជនជាតិម៉ាឡេស៊ីបើករថយន្តកំពុងតែស៊ីញ៉ូបត់ឆ្វេងបុកម៉ូតូហុងដាឌ្រីម ចំពីមុខពេញទំហឹងបណ្តាលឱ្យស្លាប់ម្នាក់ជ្រុះថ្នាំញៀន៣កញ្ចប់តូច និងរបួសធ្ងន់ម្នាក់ គ្រោះថ្នាក់អកុសលនេះបានកើតឡើង១២និង១៥នាទីរំលងអធ្រាត្រឈានចូលថ្ងៃទី៣០ ខែវិច្ឆិកា ឆ្នាំ២០១៧ តាមបណ្តោយផ្លូវព្រះនរោត្តមកែងផ្លូវ២៤២ ស្ថិតនៅក្នុងសង្កាត់ចតុមុខ ខណ្ឌដូនពេញ ។ ជនរងគ្រោះដែលស្លាប់មានឈ្មោះ ប្រុញ ឧត្តម ភេទប្រុស អាយុ២០ឆ្នាំ មុខរបរជាចុងភៅនៅកោះពេជ្រ មានស្រុកកំណើតនៅឃុំសំរោងធំ ស្រុកកៀនស្វាយ ខេត្តកណ្តាល ។
សាក្សីដែលឃើញហេតុការណ៍បានឱ្យដឹងថា មុនពេលកើតហេតុគេបានឃើញបុរសម្នាក់ជាជនជាតិម៉ាឡេស៊ីបើករថយន្តម៉ាកឡិចស៊ីស៤៥០ ពណ៌ស្លែ ពាក់ស្លាកលេខ ភ្នំពេញ ២M-១២៣៦ តាមបណ្តោយផ្លូវព្រះនរោត្តមក្នុងទិសដៅពីត្បូងទៅជើងបានស៊ីញ៉ូបត់ឆ្វេង ចំណែកម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០០៥ ពណ៌ខ្មៅ ពាក់ស្លាកលេខ ភ្នំពេញ ១K-៣៦២៦ ជិះគ្នា២នាក់បើកតាមបណ្តោយផ្លូវព្រះនរោត្តមពីជើងទៅត្បូងក្នុងល្បឿនយ៉ាងលឿនដូចហោះ មកដល់ចំណុចកើតហេតុក៏ត្រូវរថយន្តបុកចំពីមុខពេញទំហឹងបណ្តាលឱ្យអ្នកបើកម៉ូតូដួលបោកក្បាលស្លាប់ភ្លាមៗនៅកន្លែងកើតហេតុ រីឯអ្នករួមដំណើរជាមួយរងរបួសធ្ងន់ត្រូវបានរថយន្តសង្គ្រោះដឹកយកទៅព្យាបាលនៅគ្លីនិកឯកជន ចំណែកម៉ូតូបុកជាប់នៅមុខរថយន្តរងការខូចខាតទាំងម៉ូតូ និងរថយន្ត ។
ប្រភពព័ត៌មាននៅកន្លែងកើតហេតុបានបន្តទៀតថា រថយន្តជនជាតិម៉ាឡេស៊ីមិនបានបើកលឿននោះទេគឺម៉ូតូបើកលឿនពេលរថយន្តបត់គ្រាន់តែបន្ថែមល្បឿនបន្តិចក៏ជ្រុលទៅបុកម៉ូតូតែម្តង ។ ចំណែកជនរងគ្រោះដែលស្លាប់នៅកន្លែងកើតហេតុនោះមានជ្រុះថ្នាំញៀនចេញពីហោប៉ៅចំនួន៣កញ្ចប់តូចផងដែរ ។ ក្រោយពេលកើតហេតុអ្នកបើករថយន្តព្រមទាំងរថយន្តនិងម៉ូតូត្រូវបានសមត្ថកិច្ចវាស់វែងយកទៅរក្សាទុកនៅការិយាល័យចរាចរណ៍ផ្លូវគោក ។ ចំណែកសពជនរងគ្រោះវិញត្រូវបានសាច់ញាតិយកទៅធ្វើបុណ្យនៅឯស្រុកកំណើតតាមប្រពៃណី ៕
ចែករំលែកព័តមាននេះ