ខេត្តកែប ៖ នៅពេលភ្ញៀវទេសចរទៅទស្សនាកម្សាន្ដនៅខេត្តកែប ពិសេសភ្ញៀវទេសចរក្នុងស្រុក តែងនឹកឃើញផ្សារក្ដាមមុនគេ ព្រោះទីនោះជាប្រភពនៃគ្រឿងសមុទ្រស្រស់ៗនិងមានតម្លៃសមរម្យ ។ ផ្សារមួយ មិនត្រឹមតែជាមជ្ឈមណ្ឌលប្រមូលផ្ដុំអាជីវកម្មប៉ុណ្ណោះទេ តែក៏ជាតំបន់ទាក់ទាញភ្ញៀវទេសចរជាតិ និងអន្តរជាតិ និងជាប្រភពចំណូលរបស់ប្រជាពលរដ្ឋក្នុងតំបន់ផងដែរ ។
ដើម្បីលើកកម្ពស់សក្ដានុពលបន្ថែមទៀត ក្រសួងទេសចរណ៍ និងរដ្ឋបាលខេត្តកែប បានរៀបចំកែលម្អហេដ្ឋារចនាសម្ព័ន្ធតំបន់នេះឲ្យកាន់តែល្អថែមទៀត ក្រោមគម្រោងទេសចរណ៍ធ្វើឲ្យប្រសើរឡើងផ្នែកបរិស្ថានផ្សារក្ដាម ដែលគ្រោងចំណាយថវិកាប្រមាណជិត១លានដុល្លារ ជាគម្រោងហេដ្ឋារចនាសម្ព័ន្ធ ទេសចរណ៍ សម្រាប់កំណើនប្រកបដោយបរិយាប័ន្នក្នុងមហាអនុតំបន់មេគង្គរបស់ធនាគារអភិវឌ្ឍន៍អាស៊ី ហៅកាត់ថា (ADB) ។
លោក ប៉ុក ទាំង អនុប្រធានមន្ទីរទេសចរណ៍ខេត្ត បានថ្លែងកាលពីថ្ងៃទី២៣ វិច្ឆិកា
ម្សិលមិញថា សម្រាប់គម្រោងទេសចរណ៍ធ្វើឲ្យប្រសើរ ឡើងនូវបរិស្ថានជុំវិញផ្សារក្ដាម គឺផ្ដោតសំខាន់ទៅលើការធ្វើអាងចម្រោះទឹកកខ្វក់ ដែលកន្លងមក វាជាបញ្ហាមួយពេលដែលភ្ញៀវមកកម្សាន្ត ឬទិញម្ហូបអាហារតែងតែរអ៊ូរទាំ ជាពិសេស អាជីវករលក់នៅក្នុងផ្សារក្ដាមនេះ ពិបាកគ្រប់គ្រងទឹកកខ្វក់ ។
លោកថា ៖ « កន្លងមក រាល់ទឹកកខ្វក់ដែលចេញពីផ្សារក្ដាម តែងតែធ្វើការបង្ហូរតាមទឹកសមុទ្រ ដោយមិនបានចម្រោះចេញ ដែលជាហេតុធ្វើឲ្យប៉ះពាល់ដល់បរិស្ថាន មានក្លិនស្អុយ និងប៉ះពាល់ដល់មច្ឆជាតិនៅក្នុងទឹក ហើយទឹកដែលបានច្រោះរួចហើយ គឺយើងអាចយកមកប្រើប្រាស់បានដូចជា ស្រោចផ្កានៅជុំវិញផ្សារក្ដាមបាន » ។
លោក ប៉ុក ទាំង បានបន្ថែមថា ចំពោះហាងដែលនៅជុំវិញផ្សារក្ដាម មានចំនួន៣៩ហាង, អាជីវករលក់ក្នុងផ្សារក្ដាម មាន៤០តូប និងអ្នកលក់ខាងក្រៅផ្សារ ដែលមានបាំងឆត្រ ឬតង់ មានប្រហែលជា៥០ទៅ១០០តង់ ។
ក្នុងពិធីបញ្ចុះបឋមសិលាបើកការដ្ឋាននាព្រឹកថ្ងៃទី២១ វិច្ឆិកា កន្លងមក លោក សុខ សុគុណ អគ្គនាយករងក្រសួងទេសចរណ៍ និងជាប្រធានគម្រោងនេះ បានឲ្យដឹងថា ក្រោមកិច្ចសម្របសម្រួលពីក្រសួងសេដ្ឋកិច្ច និងហិរញ្ញវត្ថុ ក្រសួងទេសចរណ៍បានទទួលឥណទានសម្បទានពីធនាគារអភិវឌ្ឍន៍អាស៊ី នូវទឹកប្រាក់ចំនួន៩៥ម៉ឺនដុល្លារ សម្រាប់គម្រោងអភិវឌ្ឍន៍ហេដ្ឋារចនាសម្ព័ន្ធនៅជុំវិញផ្សារក្ដាម និងឆ្នេរខ្សាច់ក្រុងកែប ។
លោកបន្ដថា គម្រោងនេះ គឺផ្ដោតលើគោលដៅសំខាន់ៗរួមមាន ប្រព័ន្ធលូបង្ហូរទឹកប្រើប្រាស់រួច១ខ្សែសម្រាប់ទទួលទឹកកខ្វក់ទាំងអស់មិនឲ្យហូរចូលសមុទ្រ, សាងសង់អាងប្រព្រឹត្តិកម្មទឹកកខ្វក់, មជ្ឈមណ្ឌលផ្ដល់ព័ត៌មានទេសចរណ៍, បង្គន់អនាម័យសាធារណៈ និងសួនច្បារ ។
លោកបន្ដថា ធនាគារអភិវឌ្ឍន៍អាស៊ីបានសម្រេចផ្ដល់សិទ្ធិឲ្យក្រុមហ៊ុន ខ្មែរ ខន់ស្ត្រាក់សិន ខូអិលធីឌី ជាអ្នកសាងសង់ ដោយកំណត់រយៈពេល១០ខែ ពោលគឺនឹងត្រូវបញ្ចប់នៅខែសីហា ឆ្នាំ២០១៨ខាងមុខ ។
លោកក៏បានសំណូមពរដល់ប្រជាពលរដ្ឋ អាជីវករទាំងអស់សូមមានការយោគយល់ និងជួយបង្កលក្ខណៈងាយស្រួលដល់ក្រុមការងារ ដើម្បីឲ្យការងារនេះប្រព្រឹត្តទៅដោយរលូន និងទទួលបានជោគជ័យ ។
ក្នុងឱកាសនោះដែរ លោក កែន សត្ថា អភិបាលខេត្តកែប បានអំពាវនាវដល់អាជីវករ សូមកុំដំឡើងថ្លៃទំនិញ និងសេវារបស់ខ្លួន ដែលនាំឲ្យភ្ញៀវទេសចរ ឬអតិថិជនខ្លាចរអា មិនចង់ទិញទំនិញ និងសេវា ដែលនាំឲ្យខ្សត់ភ្ញៀវទេសចរមកទស្សនា ថែមទាំងធ្វើឲ្យបាត់ចំណូលរបស់ប្រជាពលរដ្ឋ តាមរយៈវិស័យទេសចរណ៍នេះ ។ ជាមួយនឹងការអំពាវនាវនេះ លោកក៏បានទទូចឲ្យអាជីវកររក្សាឲ្យបាននូវអនាម័យទំនិញ និងចូលរួមថែរក្សាសម្អាតបរិស្ថានរមណីយដ្ឋានខេត្តកែប ក៏ដូចជាក្នុងខេត្តកែបទាំងមូលផងដែរ ។
កន្លងមក រដ្ឋមន្ត្រីក្រសួងទេសចរណ៍ លោក ថោង ខុន ក៏ធ្លាប់បានណែនាំផងដែរដល់រដ្ឋបាលខេត្ត និងអាជីវករក្នុងខេត្តកែប ឲ្យចូលរួមរក្សាបាននូវអនាម័យទំនិញ បរិស្ថាន ពិសេសបញ្ហាសំរាមនៅតាមទីសាធារណៈ បញ្ហាសំរាមក្នុងភោជនីយដ្ឋាន ក្នុងនោះលោករដ្ឋមន្ត្រីក៏បានចង្អុលបង្ហាញថា ត្រូវបញ្ឈប់ទម្លាប់ចោលសំរាម កាកសំណល់ ក្រដាសជូតមាត់ក្រោមតុក្នុងភោជនីយដ្ឋានឲ្យបាន ដើម្បីចូលរួមសម្អាតអនាម័យក្នុងរមណីយដ្ឋាន សំដៅត្រៀមទទួលភ្ញៀវទេសចរក្នុងឱកាសពិធីបុណ្យសមុទ្រនាពេលខាងមុខ និងដើម្បីអភិវឌ្ឍន៍ខេត្តកែបឲ្យក្លាយជាខេត្តគំរូក្នុងការធ្វើឲ្យទីក្រុងមានភាពស្អាត និងបៃតង ស្របតាមស្ដង់ដាអាស៊ាន ។
គួររំឭកថា កែបជាខេត្តមួយដែលបានទទួលពានរង្វាន់និរន្តរភាពអាស៊ានទៅលើប្រធានបទ «ទឹកស្អាត ដីស្អាត និងខ្យល់ស្អាត » ។ ជាមួយគ្នានេះ រាជរដ្ឋាភិបាលកម្ពុជាបានកំណត់យកថ្ងៃទី២២-២៣-២៤ ខែធ្នូ ឆ្នាំ២០១៧ ជាកាលបរិច្ឆេទប្រារព្ធពិធីបុណ្យសមុទ្រលើកទី៦ ជុំទី២ នៅខេត្តកែប ដែលព្រឹត្តិការណ៍ទេសចរណ៍ដ៏ធំនេះ នឹងបើកជាផ្លូវការក្រោមអធិបតីភាពដ៏ខ្ពង់ខ្ពស់របស់សម្ដេចតេជោនាយករដ្ឋមន្ត្រី ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក្រោមប្រធានបទ «ឆ្នេរសមុទ្របៃតង ៖ អនាគត គឺបច្ចុប្បន្ន» និរន្តរភាពទេសចរណ៍ ដើម្បីអភិវឌ្ឍន៍ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ