រាជធានីភ្នំពេញ ៖ មន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោតហៅកាត់ថា (គ.ជ.ប) បានធ្វើការបែងចែកអាសន្នៈ របស់គណបក្សសង្គ្រោះជាតិចំនួន៥៥កៅអីរួចហើយ នៅថ្ងៃទី២៣ វិច្ឆិកា នេះ ដែលក្នុងនោះគណបក្សហ៊្វុនស៊ិនប៉ិច របស់សម្តេចក្រុមព្រះនរោត្តម រណឬទ្ធិ ទទួលបានច្រើនជាងគេ គឺ៤១អាសន្នៈ ។
លោក សោម សូររីដា អគ្គលេខាធិការរង គ.ជ.ប បានឲ្យថា ការបែងចែកអាសន្នៈ របស់គណបក្សសង្គ្រោះជាតិបានធ្វើរួចរាល់ហើយ ដោយមានគណបក្សនយោបាយចំនួន៥តែប៉ុណ្ណោះនឹងបានទទួល ។
លោកបានបញ្ជាក់ថា៖
– ទី១ .គណបក្សហ៊្វុនស៊ិន ប៉ិចទទួលបាន៤១អាសន្នៈ,
– ទី២.គណបក្សសញ្ជាតិកម្ពុជាទទួលបាន២អាសន្នៈ,
– ទី៣ .គណបក្សអភិវឌ្ឍន៍សេដ្ឋកិច្ចទទួលបាន១អាសន្នៈ,
– ទី៤. គណបក្សខ្មែឈប់ក្រទទួលបាន៥អាសន្នៈ,
– និងទី៥ .គណបក្សសម្ព័ន្ធ ដើម្បីប្រជាធិបតេយ្យ ទទួលបាន៦អាសន្នៈ
ចំណែកទី៦.គណបក្សសាធារណរដ្ឋប្រជាធិបតេយ្យ មិនទទួលបានអាសន្នៈនោះទេដោយសន្លឹកឆ្នោតបានការមិន គ្រប់នឹងទទួលបានអាសន្នៈ។
លោកបានឲ្យដឹងថា ការបែងចែងអាសន្នៈអាណត្តិទី៥រដ្ឋសភា ត្រូវបានទៅដល់រដ្ឋសភា បន្ទាប់មករដ្ឋសភានឹងធ្វើការបែងចែងតាមនីតិវិធីរបស់ខ្លួន ដូចជាការចូលស្បថ ដើម្បីទទួលតំណែងជាដើម។ ជាមួយគ្នានោះដែរ បើតាមលោកអគ្គលេខាធិការងគ.ជ.ប. ក៏បានឲ្យដឹងថា រហូតមកដល់ពេលនេះ គ.ជ.ប មិនទាន់បានធ្វើការបែងចែកអាសន្នៈក្រុមប្រឹក្សាឃុំ-សង្កាត់ របស់គណបក្សសង្គ្រោះជាតិនោះទេ ព្រោះថា គ.ជ.ប. មានរយៈពេល១៤ថ្ងៃក្នុងបែងចែក តែរហូតមកដល់ពេលនេះ ក្រសួងមហាផ្ទៃមិនទាន់បញ្ជូនលិខិតជាផ្លូវការនោះទេ ហើយគណបក្ស នយោបាយដែលត្រូវទទួលកំពុងតែពិនិត្យបញ្ជីឈ្មោះរបស់ខ្លួន។
សូមបញ្ជាក់ថា ការបោះឆ្នោតអាណត្តិទី៥នេះ គណបក្សហ៊្វុនស៊ិនប៉ិច មិនត្រូវបានពលរដ្ឋបោះឆ្នោតជូននោះទេ សូម្បីតែមួយកៅអីនៅសភាក៏មិនបានដែរ បើទោះបីគណបក្សនេះធ្លាប់ទទួលបានអាសន្នៈច្រើនលើសលប់កាលពីអាណត្តិទី១ នៃរដ្ឋសភា ៕
ចែករំលែកព័តមាននេះ