សកម្មភាពភ្នាក់ងារទេសចរណ៍អាជ្ញាធរជាតិអប្សរា
ខេត្តសៀមរាប ៖ សកម្មភាពភ្នាក់ងារទេសចរណ៍របស់អាជ្ញាធរជាតិអប្សរាសង្គ្រោះភ្ញៀវនៅក្នុងឧទ្យានអង្គរ និងរើសបានសម្ភាររបស់ភ្ញៀវ ប្រគល់ជូនវិញ រួមទាំងណែនាំក្នុងខែសីហា
ខេត្តសៀមរាប ៖ សកម្មភាពភ្នាក់ងារទេសចរណ៍របស់អាជ្ញាធរជាតិអប្សរាសង្គ្រោះភ្ញៀវនៅក្នុងឧទ្យានអង្គរ និងរើសបានសម្ភាររបស់ភ្ញៀវ ប្រគល់ជូនវិញ រួមទាំងណែនាំក្នុងខែសីហា ឆ្នាំ២០១៦ ដែលភ្នាក់ងារទេសចរណ៍ មានតួនាទីសំខាន់ណាស់ក្នុងការណែនាំទិសដៅទស្សនា និងសកម្មភាពនានារបស់ភ្ញៀវទេសចរណ៍ ព្រមទាំងបាន ពន្យល់ណែនាំ ក៏ដូចជាជួយដោះស្រាយបញ្ហាផ្សេងៗដែលកើតឡើងជាយថាហេតុក្នុងការទស្សនានៅតំបន់អង្គរផងដែរ។
សកម្មភាពដែលភ្នាក់ងារទេសចរណ៍តែងតែយកចិត្តទុកដាក់ និងជួយជាប្រចាំ គឺការជួយសង្គ្រោះភ្ញៀវពេលមានគ្រោះថ្នាក់ ការរើសបានរបស់របរភ្ញៀវ និងទប់ស្កាត់ករណីភ្ញៀវប្រព្រឹត្តិមិនសមរម្យនៅក្នុងពេលទស្សនា។ យោងតាមរបាយការណ៍សកម្មភាពការងារនៅខែសីហា ឆ្នាំ២០១៦ របស់នាយកដ្ឋានអភិវឌ្ឍន៍ទេសចរណ៍អង្គរ នៃអាជ្ញាធរជាតិអប្សរា បានបង្ហាញថា ក្រុមការងារជួយសង្គ្រោះភ្ញៀវបានចំនួន១៥ករណីដែលរងរបួសដោយរអិល ជំពប់ជើង បណ្តាលឱ្យដួល គ្រេច ថ្លោះដៃជើង ងងឹតមុខ ចុកពោះ ប៉ះក្បាលនឹងហោជាង ឬរោងទង និងធ្លាក់ពីលើរ៉ឺម៉ក។
បញ្ហាទាំងនេះមិនមានច្រើនទេនៅតំបន់អង្គរ ដែលពេលខ្លះកើតឡើង ដោយសារភ្ញៀវមានការធ្វេសប្រហែសរបស់ខ្លួន មិនគោរពតាមការណែនាំ ឬស្លាកសញ្ញាហាមឃាត់ និងសុខភាពផ្ទាល់ខ្លួនរបស់ពួកគាត់ជាដើម។ ប៉ុន្តែទោះជាយ៉ាងណា ក្រុមភ្នាក់ងារទេសចរណ៍របស់អាជ្ញាធរជាតិអប្សរា បានសហការជាមួយនគរបាលទេសចរណ៍ និងនគរបាលការពារបេតិកភណ្ឌ បានជួយសង្គ្រោះទាន់ពេលវេលានៅនឹងកន្លែងចំពោះករណីស្រាលៗ រីឯករណីធ្ងន់គឺត្រូវបញ្ជូនទៅមន្ទីរពេទ្យភ្លាមៗ។
សូមបញ្ជាក់ផងដែរថា ក្រុមភ្នាក់ងារទេសចរណ៍អាជ្ញាធរជាតិអប្សរា នគរបាលទេសចរណ៍ និងនគរបាលការពារបេតិកភណ្ឌ ធ្លាប់បានចូលរួមវគ្គបណ្តុះបណ្តាលជំនាញសង្គ្រោះបឋម និងមានបរិក្ខាសង្គ្រោះបឋមជាប់ខ្លួនស្រាប់។ ដោយឡែកចំពោះការរើសបានរបស់របរភ្ញៀវដែលភ្លេច ឬជ្រុះនៅតាមបណ្តាប្រាសាទវិញ គឺមាន១៨ករណី ក្នុងនោះរកឃើញ១៥ករណី និងរកមិនឃើញ៣ករណី។ ឯករណីរកមិនឃើញ ភ្នាក់ងារទេសចរណ៍បានណែនាំឱ្យភ្ញៀវដាក់ពាក្យបណ្តឹងនៅអង្គភាពនគរបាលទេសចរណ៍។
គួរបញ្ជាក់ផងដែរថា សម្ភារដែលភ្ញៀវភ្លេច និងបាត់ជាទូទៅមានដូចជា ទូរស័ព្ទដៃ កាបូបស្ពាយ កាបូបលុយ ម៉ាស៊ីនថត កាតអេធីអឹម លិខិតឆ្លងដែន ជើងទម្រម៉ាស៊ីនថត។ល។ ក្នុងករណីរកឃើញសម្ភារហើយរកម្ចាស់មិនឃើញ ភ្នាក់ងារទេសចរណ៍បានប្រគល់ជូននគរបាលទេសចរណ៍ជាអ្នករក្សាទុក ដើម្បីរង់ចាំម្ចាស់មកទាក់ទង។ រាល់សកម្មភាពទាំងនេះទទួលបាននូវការអរគុណ និងកោតសរសើរយ៉ាងច្រើនពីសំណាក់អ្នកទេសចរណ៍ជាតិ និងអន្តរជាតិមិនដាច់ពីមាត់ ព្រមទាំងការបង្ហាញនូវក្តីស្រឡាញ់ និងទំនុកចិត្តមកលើភ្នាក់ងារទេសចរណ៍នៃអាជ្ញាធរជាតិអប្សរាទៀតផង។
ក្រៅពីនោះ ក្រុមភ្នាក់ងារទេសចរណ៍ក៏បានហាមឃាត់ភ្ញៀវដែលប្រព្រឹត្តមិនសមរម្យបានចំនួន២៨ករណីផងដែរ ដូចជា ការបង្ហោះ Drone ថតរូបបង្ហាញម៉ូត បម្រុងថតរូបលើកបដាជាភាសាបរទេស ឡើងកន្លែងហាមឃាត់ និងគ្រោះថ្នាក់ ស្លៀកសម្លៀកបំពាក់ស៊ិចស៊ី ជនបរទេសថតរូបអាពាហ៍ពិពាហ៍ដោយគ្មានច្បាប់អនុញ្ញាត ថតរូបកាយវិការមិនសមរម្យ ថតរូបអាជីវកម្មដោយគ្មានច្បាប់អនុញ្ញាត ជក់បារីជាដើម។
អាជ្ញាធរជាតិអប្សរាតែងតែយកចិត្តទុកដាក់ជានិច្ចលើគ្រប់បញ្ហាដែលកើតឡើងនៅក្នុងតំបន់អង្គរ ពិសេសគឺសន្តិសុខ សុវត្ថិភាព និងភាពងាយស្រួលដល់ភ្ញៀវទេសចរណ៍សំដៅធ្វើយ៉ាងណាគឺឱ្យភ្ញៀវទេសចរណ៍មកទស្សនាកម្ពុជាម្តងហើយចង់មកម្តងទៀត ជាពិសេសជួយយកចិត្តទុកដាក់ពេលភ្ញៀវមានបញ្ហា ដែលនេះជាសន្តានចិត្តដែលខ្មែរមានតាំងពីដូនតាមក៕
ចែករំលែកព័តមាននេះ