ខេត្តកំពង់ចាម ៖ កាលពីថ្ងៃទី១ មិថុនា នៅឃុំរកាពរប្រាំ ស្រុកត្បូងឃ្មុំ ខណៈមានភ្លៀងធ្លាក់យ៉ាងខ្លាំងលាយឡំដោយខ្យល់ព្យុះផង ក៏មានរន្ទះបា.ញ់ត្រូវបុរសម្នាក់បណ្តាលឱ្យឆេះរោល១ចំហៀងខ្លួនផ្នែកខាងឆ្វេង តែសំណាងល្អមិនស្លា.ប់ដោយគ្រាន់តែសន្លប់ និងងាប់ក្របីចំនួន២ក្បាលភ្លាមៗ។ ដោយឡែកនៅក្នុងថ្ងៃជាមួយគ្នានោះដែរ
ខេត្តកំពង់ចាម ៖ កាលពីថ្ងៃទី១ មិថុនា នៅឃុំរកាពរប្រាំ ស្រុកត្បូងឃ្មុំ ខណៈមានភ្លៀងធ្លាក់យ៉ាងខ្លាំងលាយឡំដោយខ្យល់ព្យុះផង ក៏មានរន្ទះបាញ់ត្រូវបុរសម្នាក់បណ្តាលឱ្យឆេះរោល១ចំហៀងខ្លួនផ្នែកខាងឆ្វេង តែសំណាងល្អមិនស្លាប់ដោយគ្រាន់តែសន្លប់ និងងាប់ក្របីចំនួន២ក្បាលភ្លាមៗ។ ដោយឡែកនៅក្នុងថ្ងៃជាមួយគ្នានោះដែរ ហេតុការណ៍ដាច់ដោយឡែកមួយទៀត លោកគ្រូបង្រៀនម្នាក់អាយុ៥៧ឆ្នាំ ដែលគេអះអាងថា ផឹកស្រាស្រវឹងបានជិះម៉ូតូធ្លាក់ប្រឡាយលង់ទឹកស្លាប់នៅឃុំជីគរ ស្រុកត្បូងឃ្មុំនេះដែរ ដោយពុំមាននរណាម្នាក់ដឹងភ្លាមៗទេ ។
លោកអនុសេនីយ៍ឯក ឡុង សារិន អធិការរងនគរបាលស្រុកត្បូងឃ្មុំ ទទួលផែនព្រហ្មទណ្ឌបានឲ្យដឹងថា នៅវេលាម៉ោងប្រមាណ៨ព្រឹកថ្ងៃទី១ មិថុនា នោះ លោកគ្រូបង្រៀនម្នាក់ឈ្មោះជុន អ៊ាងសាន្ត រស់នៅភូមិជាងសារ ឃុំជីគរ បានជិះម៉ូតូម៉ាកវ៉េវអាល់ហ្វាចេញពីផ្ទះទៅចូលរួមក្នុងកម្មវិធីមិទ្ទិញនៅក្នុងបរិវេណវត្តរកាឃ្នួច ក្នុងទិវាបុណ្យកុមារអន្តរជាតិ ។ លុះនៅម៉ោងប្រហែល១១ព្រឹក លោកគ្រូបង្រៀនរូបនេះបានទៅផឹកស្រាជាមួយមិត្តភក្តិឈ្មោះសួន សុង ភេទប្រុស ដែលមានផ្ទះនៅម្តុំខាងក្រោយវត្តអស់ចំនួន១លីត្រកន្លះ រួចហើយក៏ជិះម៉ូតូចេញមកវិញ។ រហូតមកដល់វេលាម៉ោង៤និង៣០នាទីរសៀលថ្ងៃដដែល ខណៈក្មេងប្រុសម្នាក់ដើរដេញហ្វូងទានៅតាមវាលស្រែ ស្រាប់តែប្រទះឃើញម៉ូតូផ្នែកខាងក្រោយផុសចេញពីក្នុងទឹកប្រឡាយមួយកន្លែងដែលមានចម្ងាយប្រហែលជា៣គីឡូម៉ែត្រពីផ្ទះលោកសួន សុង ក៏រត់មកហៅបុរសម្នាក់ឈ្មោះសុក សុង ឲ្យមកមើលនិងចុះរាវ និងបានប្រទះឃើញសពលោកគ្រូបង្រៀនរូបនេះទើបលើកមកដាក់លើគោក ។
ដោយឡែកនៅវេលាម៉ោង៦និង៣០នាទីល្ងាច នៅភូមិព្រះអង្គ ឃុំរកាពរប្រាំ មានភ្លៀងធ្លាក់យ៉ាងខ្លាំង ព្រមទាំងមានផ្លេកបន្ទោរខ្វាត់ខ្វែងនៅលើអាកាសផង ហើយដោយសារតែខ្លាចមានបាតុភាពរន្ទះបាញ់ បុរសឈ្មោះអ៊ិត ហ៊ាង អាយុ២២ឆ្នាំ បានដកខ្សែអង់តែនទូរទស្សន៍ចេញនិងបិទទូរស័ព្ទដៃទៀតផង រួចទើបមកប្រះខ្លួនដេកនៅក្បែរមាត់ច្រកទ្វារចូល ។ ខណៈនោះដែរ ស្រាប់តែរន្ទះបានបាញ់លាន់ឮយ៉ាងខ្លាំងស្ទើរបែកក្រដាសត្រចៀក បណ្តាលឲ្យបែកសសរកន្លោងផ្ទះ និងសសរខាងមុខហើយដោយសាររន្ទះនេះដែរ ធ្វើឲ្យបុរសឈ្មោះអ៊ិត ហ៊ាង សន្លប់និងរលាកមួយចំហៀងខ្លួនផ្នែកខាងឆ្វេង ព្រមទាំងមានឈាមហូរចេញតាមច្រមុះទៀតផង។
លោកអធិការរងនគរបាលស្រុកត្បូងឃ្មុំ បានបញ្ជាក់ថា អ្នករងគ្រោះដោយសាររន្ទះបាញ់នេះមិនត្រូវបានក្រុមគ្រួសារបញ្ជូនមកកាន់មន្ទីរពេទ្យទេ ព្រោះតែមិនមានសភាពធ្ងន់ធ្ងរ និងបានហៅគ្រូពេទ្យមកព្យាបាលនៅផ្ទះរបស់ខ្លួន។ តាមការសង្កេត គ្រោះធម្មជាតិរន្ទះបាញ់នៅដើមរដូវវស្សាឆ្នាំ២០១១ នេះ មានសភាពសាហាវ គួរឱ្យកត់សម្គាល់ បណ្តាលឲ្យមានមនុស្សស្លាប់ជាបន្តបន្ទាប់ទាំងនៅតំបន់ត្រើយខាងកើត និងត្រើយខាងលិចទន្លេមេគង្គ ៕
ចែករំលែកព័តមាននេះ