រាជធានីភ្នំពេញ ៖ ខ្សែភាពយន្តរឿង «មុនដំបូងខ្មែរក្រហមសម្លា.ប់ប៉ាខ្ញុំ៖ ការចងចាំរបស់កុមារីកម្ពុជាម្នាក់» ដែលដឹកនាំសម្តែងដោយតារាភាពយន្ដហូលីវូដល្បីឈ្មោះនាង អេនចេលីណា ជោលី បាននិងកំពុងដំណើរការថតនៅកម្ពុជា ។
រាជធានីភ្នំពេញ ៖ ខ្សែភាពយន្តរឿង «មុនដំបូងខ្មែរក្រហមសម្លាប់ប៉ាខ្ញុំ៖ ការចងចាំរបស់កុមារីកម្ពុជាម្នាក់» ដែលដឹកនាំសម្តែងដោយតារាភាពយន្ដហូលីវូដល្បីឈ្មោះនាង អេនចេលីណា ជោលី បាននិងកំពុងដំណើរការថតនៅកម្ពុជា ។ ទន្ទឹមនេះមានការទម្លាយឱ្យដឹងពីតារាខ្មែរ ល្បីៗមួយចំនួនដែលបានចូលរួមសម្តែង ។
ការណាត់ជួបរវាងអ្នកនាងជោលី និងតារាចម្រៀងលោកព្រាប សុវត្ថិ កាលពីខែតុលា ធ្វើឱ្យមានការសន្និដ្ឋានតារាចម្រៀងរូបនេះនឹងចូលរួមសម្តែងក្នុងខ្សែភាពយន្តនោះដែរ ។ ទោះបីជាយ៉ាងណាក្តី ក្រោយមកមិនមានព័ត៌មានថាលោកបានចូលរួមសម្តែងទេ ។ ក្រៅពីតារាចម្រៀងលោកព្រាប សុវត្ថិ នៅមានតារាតារាសម្តែង ល្បីៗជាច្រើនទៀតដូចជា អ្នកនាងស្វែង សុជាតា ដែលមានបទពិសោធន៍សម្តែងច្រើន ។
មានការបង្ហើបឱ្យដឹងថា តារាសម្តែងគ្រងតំណែងកាចឆ្នាសអ្នកនាងស្វែង សុជាតា មានប្លង់ថតច្រើនជាងតារាផ្សេងទៀត គឺមានដល់ទៅរយៈពេលជាង៣០ថ្ងៃឯណោះនៃការចេញថត ។
ប្រភពព័ត៌មានរៀបរាប់ពីវត្តមានតួអង្គខ្មែរចំនួន៥ដួងទៀតគឺមានលោកទេព រិនដារ៉ូ សម្តែងជាតួអង្គទាហានលន់ នល់, លោកសាវិន ហ្វីលីប ប្រធានមូលនិធិកុមារសាវិនកម្ពុជា សម្តែងជាមេទាហានខ្មែរក្រហម, លោកហម ឈរ៉ា សម្តែងជាប្រជាជនជម្លៀសចេញទៅតំបន់ថ្មី, កញ្ញាឌី សូនីតា និងកញ្ញាម៉ា រីណែត ។ តម្លៃខ្លួនដែលពួកគេទទួលបាន គឺស្ថិតក្នុងកម្រិតមួយខ្ពស់មិនធ្លាប់មាន ប៉ុន្តែមិនមានការបញ្ជាក់លម្អិតទេ សូម្បីតែសមាសភាពសម្តែងខ្សែភាពយន្តនេះក៏ផលិតករស្នើមិនឲ្យចេញមុខបញ្ជាក់ប្រាប់សារព័ត៌មានដែរ ។ សិល្បករដែលរាយនាមទាំងនោះសុទ្ធតែទទួលបានឱកាសថតខ្សែភាពយន្តនេះ ប៉ុន្តែពួកគេមិនទាន់អាចទម្លាយលម្អិតអំពីការចូលរួមសម្តែងទេ ។
ខ្សែភាពយន្ត«មុនដំបូងខ្មែរក្រហមសម្លាប់ប៉ាខ្ញុំ៖ ការចងចាំរបស់កុមារីកម្ពុជាម្នាក់ » ដឹកនាំការផលិតដោយអ្នកស្រីអេនចេលីណា ជោលី សហការជាមួយផលិតករខ្មែរល្បីល្បាញគឺលោករិទ្ធី ប៉ាន់ ។ ការផលិតភាពយន្តនោះចាប់ផ្តើមតាំងពីខែវិច្ឆិកា ឆ្នាំ២០១៥ ហើយតារាសម្តែងទាំងអស់នៅក្នុងខ្សែភាពយន្តនេះគឺជាជនជាតិកម្ពុជា ។
ខេត្តសៀមរាប និងខេត្តបាត់ដំបងជាទីតាំងសំខាន់ក្នុងការផលិតខ្សែភាពយន្តនេះធ្វើលំនាំតាមសៀវភៅ «មុនដំបូងខ្មែរក្រហមសម្លាប់ប៉ាខ្ញុំ៖ ការចងចាំរបស់កុមារីកម្ពុជាម្នាក់» របស់សកម្មជនសិទ្ធិមនុស្សអាមេរិកដើមកំណើតខ្មែរគឺអ្នកស្រីលឿង អឹុង ។ ក្នុងរយៈពេលប៉ុន្មានសប្តាហ៍ខាងមុខនេះតារាភាពយន្ដហូលីវូដដ៏ល្បី អ្នកនាងអេនចេលីណា ជោលី នឹងសម្រេចចិត្តចុងក្រោយចំពោះការជ្រើសរើសតួសម្ដែងខ្មែរមានទេពកោសល្យ ។
ក្រោយផលិតរួចភាពយន្ដរឿង «មុខដំបូង ខ្មែរក្រហមសម្លាប់ប៉ាខ្ញុំ» នឹងដាក់សម្ពោធតាមប្រព័ន្ធចែកចាយឌីជីថល (Netflix) នៅចុងឆ្នាំ២០១៦ ព្រមទាំងត្រៀមចូលរួមប្រកួតយកពានរង្វាន់ពីមហោស្រពភាពយន្ដ ល្បីៗក្នុងលោកផងដែរ ៕
ចែករំលែកព័តមាននេះ