នាយកក្រុមហ៊ុនផលិតវីដេអូហ្គេមចិន លោក ZhuYe បានចំណាយប្រាក់ ២.៣៤៥.៦៧៨ដុល្លារសម្រាប់ការណាត់ជួបទទួលទានអាហារថ្ងៃត្រង់ជាមួយមហាសេដ្ឋីពិភពលោក Warren Buffett
នាយកក្រុមហ៊ុនផលិតវីដេអូហ្គេមចិន លោក ZhuYe បានចំណាយប្រាក់ ២.៣៤៥.៦៧៨ដុល្លារសម្រាប់ការណាត់ជួបទទួលទានអាហារថ្ងៃត្រង់ជាមួយមហាសេដ្ឋីពិភពលោក Warren Buffett បន្ទាប់ពីឈ្នះការដេញថ្លៃមនុស្សធម៌កាលពីពេល ថ្មីៗនេះ ។
យោងតាមគេហទំព័រ«សៀងហៃ ដេលី»ឱ្យដឹងថា នេះគឺជាកាដេញថ្លៃលើកទី១៦ដើម្បីប្រមូលយកប្រាក់ទៅឱ្យមូនិធិ Glide Foundation ជាអង្គការមិនស្វែងរកប្រាក់កម្រៃមួយស្ថិត ក្នុងទីក្រុងសាន់ហ្វ្រាន់ស៊ីស្កូ ដែលផ្តល់ស្បៀង អាហារ ការថែទាំសុខភាព ការស្តារនីតិសម្បទា និងជំនួយដទៃទៀតចំពោះអ្នកក្រីក្រ និងជនអនាថា ។
មូលនិធិមនុស្សធម៌Glide Foundation និយាយថា លោក ZhuYe បានដេញថ្លៃចំនួន ៧៦ លើកក្នុងចំណោមសហគ្រិនជាច្រើនរូបទៀត ហើយទីបំផុតសម្រេចក្នុងតួលេខ ២.៣៤៥.៦៧៨ ដែលជាតួលេខល្អពុំធ្លាប់មានពីមុនមកទេ ។
ជាអគ្គនាយកប្រចាំក្រុមហ៊ុន Berkshire Hathaway វ័យ៨៤ឆ្នាំ មហាសេដ្ឋី Warren Buffett និយាយថា «ជារៀងរាល់ឆ្នាំវាគឺជាបទពិសោធន៍ដ៏អស្ចារ្យមួយសម្រាប់ខ្ញុំ ពោលគឺខ្ញុំបានជួបមនុស្ស ល្អៗជាច្រើននាក់ រួមទាំងផ្តល់ភាពរីករាយដល់ជីវិត» ។
មហាសេដ្ឋី Warren Buffett តែងតែផ្តល់ឱកាសដល់មនុស្សគ្រប់មជ្ឈដ្ឋានសម្រាប់ការណាត់ជួបជាមួយរូបលោក ហើយមនុស្សច្រើនជាង ៤ ម៉ឺននាក់បានចូលរួមការណាត់ជួបប្រចាំឆ្នាំ របស់ក្រុមហ៊ុនលោកកាលពីខែឧសភាកន្លងទៅដើម្បីស្តាប់ការបកស្រាយរាល់សំណួររបស់ពួកគេ ។
ក្នុងឆ្នាំ២០១១ អ្នកគ្រប់គ្រងវិនិយោគទុនមកពីហុងកុងម្នាក់បានចំណាយលុយ២,១លានដុល្លារដើម្បីទទួលបានមតិនិងបទពិសោធន៍ ល្អៗក្នុងជីវិតពីលោក ៕
ចែករំលែកព័តមាននេះ