ខេត្តបាត់ដំបង ៖ រហូតមកដល់ព្រឹកថ្ងៃទី១៩ មេសា ២០១៥នេះ សំណុំរឿងកូនប្រុសមន្ត្រីកងរាជអាវុធហត្ថលើផ្ទៃប្រទេសម្នាក់ដែលបានវាយភ្ញៀវ និងដកកាំភ្លើងខ្លីអាម៉េភ្ជង់សមត្ថកិច្ចពេលចុះអន្តរាគមន៍ក្នុងជម្លោះផឹកស៊ីនៅក្នុងក្លិបខារ៉ាខេមួយ
ខេត្តបាត់ដំបង ៖ រហូតមកដល់ព្រឹកថ្ងៃទី១៩ មេសា ២០១៥នេះ សំណុំរឿងកូនប្រុសមន្ត្រីកងរាជអាវុធហត្ថលើផ្ទៃប្រទេសម្នាក់ដែលបានវាយភ្ញៀវ និងដកកាំភ្លើងខ្លីអាម៉េភ្ជង់សមត្ថកិច្ចពេលចុះអន្តរាគមន៍ក្នុងជម្លោះផឹកស៊ីនៅក្នុងក្លិបខារ៉ាខេមួយកន្លែង ក្នុងក្រុងបាត់ដំបង កាលពីពាក់កណ្ដាលសប្ដាហ៏មុននេះ នៅតែមិនទាន់ស្ងប់ស្ងាត់នៅឡើយ ហើយត្រូវបានក្រុមអ្នករិះគន់តាមតុកាហ្វេ និងមជ្ឍដ្ធាននានា លើកយកមកជជែកគ្នាបែកពពុះមាត់អំពីចំណាត់ការគ្មានប្រសិទ្ធភាពរបស់សមត្ថកិច្ច ខណៈប្រព័ន្ធផ្សព្វផ្សាយនានាក៏រងនូវការរិះគន់ផងដែរថា បានជួយបិទបាំងនូវព័ត៌មាននេះ។
សូមបញ្ជាក់ថា កាលពីវេលាម៉ោង១២យប់ ថ្ងៃទី១៣ មេសា កម្លាំងព្រហ្មទណ្ឌផ្នែកបង្ការ-បង្ក្រាបរបស់ការិយាល័យព្រហ្មទណ្ឌកំរិតស្រាល បានចុះអន្តរាគមន៏ក្នុងជម្លោះផឹកស៊ីមួយក្នុងក្លិបខារ៉ាអូខេ«អូមេហ្គា»ស្ថិតក្នុងសង្កាត់ស្វាយប៉ោ ក្រុងបាត់ដំបង បន្ទាប់ពីមានការស្នើសុំអន្តរាគមន៏តាមទូរស័ព្ទថា មានបុរសម្នាក់ស្រវឹងជោកជាំបង្កជម្លោះជាមួយភ្ញៀវដទៃក្នុងបន្ទប់ខារ៉ាអូខេ។
ប៉ុន្តែពេលកម្លាំងសមត្ថកិច្ចចុះទៅដល់ ជនបង្កនោះបានរត់ទៅយកកាំភ្លើងខ្លីម៉ាក Beretta ចេញពីក្នុងរថយន្តរបស់ខ្លួន ហើយភ្ជង់ទៅលើសមត្ថកិច្ចម្នាក់ឈ្មោះសិដ្ធ បង្កឲ្យមានការភ្ញាក់ផ្អើលពេញក្លិបខារ៉ាអូខេ។ បន្តិចក្រោយមកទើបត្រូវកម្លាំងសមត្ថកិច្ចចាប់ខ្លួនជនបង្កនោះនៅក្នុងបន្ទប់ច្រៀងតែម្ដង ខណៈជននេះនិងបក្សពួកម្នាក់ទៀតកំពុងផឹកស៊ីធម្មតា ហើយយកកាំភ្លើងខ្លីដាក់សម្ញែងគេឯងនៅលើតុ។
នៅក្នុងហេតុការណ៍នេះ បើតាមការបំភ្លឺពីសាក្សីនានានៅក្នុងក្លិបខារ៉ាអូខេបានឲ្យដឹងថា ដំបូងជនដៃដល់នោះបានយកកែវស្រាទៅជល់ជាមួយភ្ញៀវម្នាក់ឈ្មោះយៀត តែមិនត្រូវបានឈ្មោះយៀត ស្វាគមន៏ទេ ព្រោះមិនដែលស្គាល់គ្នា ជាហេតុធ្វើឲ្យជនដៃដល់ខឹងសម្បាក៏ទះកំផ្លៀងឈ្មោះយៀត មួយដៃ ហើយរុញផ្ដួលទៀត។
ប្រភពដដែលបញ្ជាក់ថា ឈ្មោះយៀត មិនតបតទេ ហើយក៏ដើរចេញក្រៅបន្ទប់ទូរស័ព្ទប្ដឹងសមត្ថកិច្ចតែម្ដង។ ប៉ុន្តែពេលសមត្ថកិច្ចចុះទៅដល់ ស្រាប់តែជនដៃដល់រត់ទៅទាញកាំភ្លើងខ្លីចេញពីក្នុងឡាន រួចអាម៉េដេញភ្ជង់សមត្ថកិច្ច និងជេរប្រមាថយ៉ាងចាស់ដៃ ហើយត្រូវត្រូវឃាត់ខ្លួនភ្លាមៗដែរ។
ក្រោយពីសាកសួរបឋម សមត្ថកិច្ចបានប្រាប់ថា ជនបង្កហេតុនោះឈ្មោះស ឧត្តម អាយុ២៤ឆ្នាំ ជាមន្ត្រីយោធានៅអង្គភាពយោធភូមិភាគពិសេស មានឋានៈជានាយចំណង់ និងជាកូនប្រុសលោកប៉េអឹមលើផ្ទៃប្រទេសពាក់ផ្កាយ២ម្នាក់ផង។ បុរសនេះប្រើប្រាសកាំភ្លើងខ្លីម៉ាកBeretta និងមានគ្នា២នាក់ជិះរថយន្តម៉ាកកាមរីពណ៌ខ្មៅស៊េរីទំនើប ពាក់ស្លាកលេខភ្នំពេញ2N-7566។ សមត្ថកិច្ចនិយាយថា ពេលនាំខ្លួនទៅដល់ការិយាល័យព្រហ្មទណ្ឌកំរិតស្រាល នៃស្នងការខេត្ត ជនបង្កឈ្មោះស ឧត្តម នេះហាក់មិនបានខ្លាចញញើតអ្វីទាំងអស់ ថែមទាំងបានបង្កការអុកឡុកជេរប្រមាថ និងធាក់ទៅលើសមត្ថកិច្ចទាំងដៃជាប់ខ្នោះ នៅចំពោះមុខឪពុករបស់ខ្លួនដែលបានទៅអន្តរាគមន៍ដល់ស្នងការខេត្តទាំងយប់ទៀតផង។
ស្របពេលដែលសមត្ថកិច្ចកំពុងសួរនាំជនបង្កឈ្មោះស ឧត្តម នាយប់នោះ ក៏មានអ្នកអន្តរាគមន៏ខ្វាត់ខ្វែងឲ្យមានការដោះលែងជនដៃដល់នេះទាំងកណ្ដាលអាធ្រាត្រផងដែរ នេះបើតាមការបង្ហើបឲ្យដឹងពីមន្ត្រីជំនាញ។ ទំនងដោយសារមានការអន្តរាគមន៍ពីអ្នកមានឥទ្ធិពលបែបនេះហើយ ទើបលោកម៉េង លៀង ប្រធានការិយាល័យព្រហ្មទណ្ឌកំរិតស្រាល ដែលទទូលចាត់ការលើករណីនេះ សម្រេចដោះលែងជនបង្កនៅព្រឹកថ្ងៃទី១៤ មេសា ដោយអះអាងថា ឈ្មោះស ឧត្តម មិនបានបង្កបទល្មើសដែលសមនឹងចាប់ខ្លួននោះទេ។
រីឯជនរងគ្រោះឈ្មោះយៀត ក៏ត្រូវគេសម្របសម្រូលឲ្យដកពាក្យបណ្ដឹងវិញ ចៀសវាងការប្រឈមមុខជាមួយជនបង្កដែលសំបូរទៅដោយខ្សែអ្នកមានឥទ្ធិពល ខណៈសមត្ថកិច្ចថ្នាក់ក្រោមមួយចំនួនហាក់មិនសប្បាយចិត្ត និងបានត្រឹមតែរងនូវការជេរប្រមាថពីជនបង្កតែប៉ុណ្ណោះ។
កោះសន្តិភាពមិនអាចស្វែងរកការឆ្លើយបំភ្លឺពីភាគីបង្ក និងភាគីរងគ្រោះបន្ថែមបានទេនៅព្រឹកថ្ងៃទី១៩ មេសានេះ។ ប៉ុន្តែលោកម៉េង លៀង ប្រធានការិយាល័យព្រហ្មកំរិតស្រាលបានច្រានចោលរាល់ការចោទប្រកាន់ទាំងឡាយ ដែលថា ជនបង្កឈ្មោះស ឧត្តម បានជេរប្រមាថ ឬធាក់សមត្ថកិច្ចនៅក្នុងការិយាល័យ ឬប្រើប្រាសកាំភ្លើងខ្លីភ្ជង់កម្លាំងសមត្ថកិច្ចរបស់លោកពេលចុះអន្តរាគមន៏។ លោកម៉េង លៀង បានបកស្រាយផ្ទុយពីការបំភ្លឺរបស់មន្ត្រីក្រោមឱវាទនិងសាក្សីមួយចំនួនថា ឈ្មោះស ឧត្តម មិនបានដកកាំភ្លើងខ្លីដេញភ្ជង់សមត្ថកិច្ចទេ គ្រាន់តែដកដាក់លើតុ ដើម្បីការពារខ្លួនក្រែងឈ្មោះយៀត ទូរស័ព្ទហៅបក្សពួកមកបន្ថែមតែប៉ុណ្ណោះ។
លោកបញ្ជាក់ថា ឈ្មោះស ឧត្តម បានប្រើប្រាស់កាំភ្លើងស្របច្បាប់ ដោយមានលិខិតឧទ្ទេសនាម និងលិខិតបញ្ជាបេសកកម្មត្រឹមត្រូវពីអង្គភាព ដូច្នេះគ្រាន់តែដកកាំភ្លើងដាក់លើតុក្នុងបន្ទប់ច្រៀងខារ៉ាអូខេ គឺគ្មានកំហុសទេ។ ប៉ុន្តែបើពិនិត្យមើលកាលបរិច្ឆេទនៃលិខិតឧទ្ទេសនាម និងលិខិតបញ្ជាបេសកកម្មរបស់លោកនាយចំណង់ ស ឧត្តម គឺផុតសុពលភាពច្រើនថ្ងៃហើយ។ នៅក្នុងលិខិតឧទ្ទេសនាម និងលិខិតបញ្ជាបេសកកម្ម គឺមានសុពលភាពរយៈពេល១ខែ ចាប់ពីថ្ងៃទី០៦ មិនា ដល់ថ្ងៃទី០៦ មេសា ២០១៥។ លុះនៅយប់ថ្ងៃទី១៣ មេសា មន្ត្រីយោធារូបនេះបានប្រើប្រាសកាំភ្លើងខ្លីនេះទៅគំរាមគេឯងនៅក្នុងជម្លោះពេលផឹកស៊ី។
លោកម៉េង លៀង បានពន្យល់អំពីបញ្ហានេះដូច្នេះថា«ពិតមែនតែលិខិតបេសកកម្មនោះហូសថ្ងៃកំណត់ ក៏គេអាចប្រើប្រាស់កាំភ្លើងបានដែរ ព្រោះកន្លងមកកូនចៅរបស់លោកខ្លះបានប្រើប្រាស់កាំភ្លើងហូសបេសកកម្មរហូតដល់១ខែក៏មានដែរ»។
ជុំវិញការដោះលែងជនបង្កឈ្មោះស ឧត្តម ផុយៗដោយគ្មានចំណាត់ការតាមផ្លូវច្បាប់បែបនេះ បានធ្វើឲ្យមានការរិះគន់យ៉ាងខ្លាំងពីមជ្ឍដ្ធាននានា ដែលបានតាមដានអំពីសំណុំរឿងនេះ ខណៈប្រព័ន្ធផ្សព្វផ្សាយនានាបានផ្អាកការផ្សាយមួយរយះក្នុងឱកាសបុណ្យចូលឆ្នាំថ្មីប្រពៃណីខ្មែរ ដែលជាហេតុនាំឲ្យមានការសង្ស័យថា អ្នកសារព័ត៌មានមួយចំនួនបានព្យាយាមជួយបិទបាំងនូវព័ត៌មាននេះទៀតផង។ មកដល់ព្រឹកថ្ងៃទី១៩មេសានេះ សំណុំរឿងរបស់កូនប្រុសលោកផ្កាយ២ប៉េអឹម នៅតែជាចំណុចរសើប ជាព័ត៌មានក្ដៅៗ សំរាប់អ្នកនិយមតាមដានព័ត៌មាន និងអ្នកវិភាគតាមតុកាហ្វេនៅឡើយ បើទោះជាព័ត៌មាននេះសមត្ថកិច្ចព្យាយាមបំភ្លេចជាង១សប្ដាហ៍ទៅហើយក្ដី។ អ្វីដែលអ្នកតាមដានចង់ដឹងបំផុតនោះ គឺអំពីមូលហេតុនៃការដោះលែងជនដៃដល់ និងអំពីមូលហេតុនៃការមិនចេញផ្សាយលើទំព័រសារព័ត៌មាន។
អ្នករិះគន់ និងសាក្សីមួយចំនួនដែលបានដឹងរឿងនេះ បានលើកហេតុផលដូច្នេះថា បើយោងលើសកម្មភាពបង្កហេតុរបស់ជនសង្ស័យខាងលើនេះ ដែលបានវាយតប់ទៅលើអ្នកដទៃ និងដកកាំភ្លើងខ្លីគំរាមលើសមត្ថកិច្ចទៀតនោះ គឺសមល្មមអាចចោទប្រកាន់ថា បានប្រព្រិត្តបទល្មើសហើយ តែនេះដោយសារតែជនបង្កមានខ្នងក្រាស និងមានអ្នកធំអន្តរាគមន៍ច្រើន ទើបសមត្ថកិច្ចមិនហ៊ានចាត់ការ ឬក៏អាចបានសើមមាត់ សើម.កខ្លះផងក៏មិនដឹង ទើបព្យាយាមជួយឆ្លើយសម្រាលបន្ទុកជនបង្ក ហើយដោះលែងងាយៗបែបនេះ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ