រាជធានីភ្នំពេញ ៖ ជាការពិតណាស់ ទីណាមានទុក្ខលំបាកក៏មានសម្តេចតេជោ ឬសម្តេចកិត្តិព្រឹទ្ធបណ្ឌិត ចេញមុខជួយយកអាសាគ្មានរំលងនរណាម្នាក់ទេ និងការជួយសង្គ្រោះទៀតសោតគឺមិនមានការរើសអើងនោះទ្បើយ
រាជធានីភ្នំពេញ ៖ ជាការពិតណាស់ ទីណាមានទុក្ខលំបាកក៏មានសម្តេចតេជោ ឬសម្តេចកិត្តិព្រឹទ្ធបណ្ឌិត ចេញមុខជួយយកអាសាគ្មានរំលងនរណាម្នាក់ទេ និងការជួយសង្គ្រោះទៀតសោតគឺមិនមានការរើសអើងនោះទ្បើយ ។ បន្ទាប់ពីបានទទួលព័ត៌មានថា ស្ត្រីវ័យក្មេងម្នាក់ជាសន្តិសុខរោងចក្ររងគ្រោះដោយទឹកអាស៊ីត សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានផ្តល់ទឹកប្រាក់ចំនួន៣០០០ដុល្លារអាមេរិក ដល់ស្ត្រីរងគ្រោះតាមរយៈលោកសាស្ត្រាចារ្យ ឈាង រ៉ា អគ្គនាយកមន្ទីរពេទ្យកាល់ម៉ែត ខណៈដែលនាងកំពុងស្ថិតនៅក្នុងការជួយព្យាបាលយ៉ាងយកចិត្តទុកដាក់នៅក្នុងមន្ទីរពេទ្យ ។
លោកសាស្ត្រាចារ្យ ឈាង រ៉ា នៅព្រឹកថ្ងៃទី១១ មីនា បាននាំយកប្រាក់ឧបត្ថម្ភជូនដល់នារីរងគ្រោះដោយសារទឹកអាស៊ីត និងបាននាំទៅជាមួយនូវប្រសាសន៍ផ្តាំផ្ញើសាកសួរសុខទុក្ខ និងសម្តែងការអាណិតអាសូរពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលសម្តេចតែងតែគិតគូរជាប់ជានិច្ចពីសុខទុក្ខរបស់ប្រជាពលរដ្ឋ ។ ក្នុងពេលជាមួយគ្នានេះ សម្តេចកិត្តិព្រឹទ្ធបណ្ឌិតបានផ្តាំផ្ញើឱ្យលោកអគ្គនាយកមន្ទីរពេទ្យជួយយកចិត្តទុកដាក់ថែទាំព្យាបាលស្ត្រីរងគ្រោះឱ្យបានល្អ ។ លោកសាស្ត្រាចារ្យ ឈាង រ៉ាថ្លែងថា លោកតែងតែយកចិត្តទុកដាក់ថែទាំព្យាបាលគ្រប់អ្នកជំងឺ ក្នុងនាមជាគ្រូពេទ្យដែលមានក្រមសីលធម៌វិជ្ជាជីវៈម្នាក់ ហើយក៏គោរពតាមអនុសាសន៍ដ៏ខ្ពង់ខ្ពស់របស់សម្តេចកិត្តិព្រឹទ្ធបណ្ឌិតផងដែរ ។
ម្តាយមីងនារីរងគ្រោះ បានថ្លែងអំណរគុណដ៏ជ្រាលជ្រៅចំពោះសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលបានផ្តល់អំណោយជាទឹកប្រាក់ដ៏ច្រើនដែលគាត់មិនធ្លាប់មាននេះ ដើម្បីជួយក្មួយស្រីរងគ្រោះនិងបានសម្តែងអំណរគុណ និងកោតសរសើរលោកសាស្ត្រាចារ្យ ឈាង រ៉ា ដែលតែងតែយកចិត្តទុកដាក់ ក្នុងការជួយសង្គ្រោះក្មួយរបស់អ្នកស្រីដោយក្តីអាណិតអាសូរ និងការសន្តោសប្រណី ។
ស្ត្រីរងគ្រោះដោយទឹកអាស៊ីតមានឈ្មោះ មាស វន្នី អាយុ២០ឆ្នាំ ជាសន្តិសុខរោងចក្រ ស៊ិន តាយ ឪពុកឈ្មោះ ស៊ិន ស៊ីនឿន អាយុ៥០ឆ្នាំ ជាកម្មករដាំដំទ្បូងឱ្យក្រុមហ៊ុនចិន និងម្តាយឈ្មោះ មាស វណ្ណា អាយុ៥៧ឆ្នាំ មានជំងឺសរសៃប្រសាទ ។ ស្ត្រីរងគ្រោះមានស្រុកកំណើតនៅស្រុកក្រគរ ខេត្តពោធិ៍សាត់ មានបងប្អូន៦នាក់ (ស្រី២នាក់ប្រុស៤នាក់) ហើយនាងជាកូនទី៥ នៅក្នុងគ្រួសារ ។
សូមបញ្ជាក់ថា មាស វន្នី ដែលជាសន្តិសុខរោងចក្រស៊ិនតាយ ស្ថិតនៅសង្កាត់ចោមចៅ ខណ្ឌពោធិ៍សែនជ័យ ត្រូវបានស្ត្រីឈ្មោះ ស្រឿន ណាន់ អាយុ៣៨ឆ្នាំ យកទឹកអាស៊ីតមួយដបទឹកបរិសុទ្ធ ស្រោចទៅលើនាងនិងជះដាក់ផ្ទៃមុខបណ្តាលឱ្យក្តៅក្រហល់ក្រហាយស្រែកយំយ៉ាងរន្ធត់ ខណៈនាងកំពុងធ្វើដំណើរចេញពីធ្វើការ ដោយយាមរោងចក្រ១យប់ កាលពីវេលាម៉ោង៦និង១០នាទីព្រឹកព្រលឹម ថ្ងៃទី៦ មីនា ស្ថិតនៅមុខផ្សារកាណាស៊ីធី ដោយសារតែការប្រចណ្ឌនឹងប្តីរបស់ខ្លួន ។
ឃុំខ្លួនស្ត្រីវាយប្រហារដោយទឹកអាស៊ីតជាប់ចោទពីបទប៉ុនប៉ងឃាតកម្ម
កាលពីល្ងាចថ្ងៃទី៩ មីនា ក្រោយពីតំណាងអយ្យការអមសាលាដំបូងរាជធានីភ្នំពេញ សាកសួរស្ត្រីជាប់ចោទវាយប្រហារដោយទឹកអាស៊ីតទៅលើនារីជាសន្តិសុខរោងចក្រចប់សព្វគ្រប់ហើយ លោក អ៊ុំ សុភ័ក្ត្រ ព្រះរាជអាជ្ញារង បានធ្វើការចោទប្រកាន់ជនត្រូវចោទឈ្មោះ ស្រឿន ណាន់ ពីបទប៉ុនប៉ងឃាតកម្ម ។ បទល្មើសនេះមានចែងតាមបញ្ញត្តិមាត្រា២៧ និងមាត្រា១៩៩ នៃក្រមព្រហ្មទណ្ឌ ហើយបានចាត់បញ្ជូនទៅចៅក្រមស៊ើបសួរដើម្បីសម្រេចឃុំខ្លួនដាក់ពន្ធនាគារជាបណ្តោះអាសន្ន ។
ប៉ុន្តែនៅល្ងាចថ្ងៃដដែលនោះ ខាងចៅក្រមបានផ្ញើជនជាប់ចោទទៅសមត្ថកិច្ចវិញ ដោយតម្រូវឱ្យព្រឹកថ្ងៃទី១០ មីនា នាំខ្លួនមកសាកសួរបន្ត ។ លុះដល់ម៉ោង៩ព្រឹកថ្ងៃទី១០ មីនា លោក ស្វាយ តុញ ចៅក្រមស៊ើបសួរបានចេញដីកាសម្រេចឃុំខ្លួនជនត្រូវចោទដាក់ពន្ធនាគារ និងតម្រូវឱ្យសមត្ថកិច្ចនាំទៅឃុំខ្លួនតែម្តង ។
លោកព្រះរាជអាជ្ញារងដែលកាន់សំណុំរឿងនេះបានបង្ហើបឱ្យដឹងថា បទល្មើសដូចការចោទប្រកាន់ពីបទប៉ុនប៉ងឃាតកម្មនេះ នៅមិនទាន់កំណត់បាននៅទ្បើយទេ គឺចង់និយាយថា បើជនរងគ្រោះមានការវិវត្តកាន់តែធ្ងន់ធ្ងរ ឬឈានដល់ស្លាប់នោះ តំណាងអយ្យការអមសាលាដំបូងនឹងកែប្រែការចោទប្រកាន់ជនជាប់ចោទទ្បើងវិញ ពោលគឺបទឃាតកម្មគិតទុកជាមុន ដែលបទល្មើសនេះតាមបញ្ញត្តិមាត្រា២០០នៃក្រមព្រហ្មទណ្ឌតម្រូវឱ្យផ្តន្ទាទោសដាក់ពន្ធនាគារអស់១ជីវិត ។ ចំពោះស្ថានភាពស្ត្រីរងគ្រោះនៅមន្ទីរពេទ្យកាល់ម៉ែត គឺស្ថិតក្នុងការសង្គ្រោះបន្ទាន់នៅទ្បើយទេ មានន័យថា ស្ថិតក្នុងអាការៈធ្ងន់ធ្ងរ និងគួរឱ្យសង្វេគណាស់៕
ចែករំលែកព័តមាននេះ