ខេត្តព្រះវិហារ ៖ បុរសម្នាក់ត្រូវជនមិនស្គាល់មុខចាក់ជាច្រើនកាំបិតចំពាក់កណ្តាលខ្លួនទៅផ្នែកខាងលើបណ្តាលឱ្យរបួសធ្ងន់ ហើយប្លន់យកម៉ូតូជិះគេចខ្លួនបាត់ កាលពីវេលាម៉ោង១១ព្រឹក ថ្ងៃទី០៤ កុម្ភៈ ២០១៥
ខេត្តព្រះវិហារ ៖ បុរសម្នាក់ត្រូវជនមិនស្គាល់មុខចាក់ជាច្រើនកាំបិតចំពាក់កណ្តាលខ្លួនទៅផ្នែកខាងលើបណ្តាលឱ្យរបួសធ្ងន់ ហើយប្លន់យកម៉ូតូជិះគេចខ្លួនបាត់ កាលពីវេលាម៉ោង១១ព្រឹក ថ្ងៃទី០៤ កុម្ភៈ ២០១៥ នៅចំណុចក្រោយបញ្ជាការកងរាជអាវុធហត្ថស្រុកជាំក្សាន្តចម្ងាយជាង៣០០ម៉ែត្រផ្លូវទី៣កែងខាងក្រោយចំណុចស្រះក្តុល ស្ថិតក្នុងភូមិធម្មជាតិ ឃុំស្រអែម ស្រុកជាំក្សាន្ត ។
តាមសម្តីស្ត្រីឈ្មោះ អឿន វណ្ណា ត្រូវជាប្រពន្ធជនរងគ្រោះខាងលើ រស់នៅភូមិស្រឯមជើង ឃុំស្រឯម ស្រុកជាំក្សាន្ត បានឲ្យដឹងថា ប្តីរបស់គាត់ឈ្មោះ វណ្ណ សុខខឿន អាយុ៤៥ឆ្នាំ ជាកងទ័ពបម្រើការនៅវរសេនាតូចលេខ៣៧១ ចំណុះកងពលតូចអន្តរាគមន៍លេខ៧ ក្រៅពីការងារកងទ័ព ប្តីរបស់គាត់ក៏បានឆ្លៀតពេលរត់ម៉ូតូឌុបដើម្បីបានកម្រៃខ្លះៗចិញ្ចឹមគ្រួសារ ។
ប្រពន្ធជនរងគ្រោះបន្តថា មុនកើតហេតុ ប្តីរបស់គាត់បានចេញពីផ្ទះបម្រុងទៅចាំយកកូនចេញពីរៀននៅភូមិធម្មជាតិ នៅវេលាម៉ោង១០ព្រឹក ថ្ងៃទី០៤ កុម្ភៈនេះ ស្របពេលនោះមានអ្នកដំណើរម្នាក់បានទូរស័ព្ទឲ្យប្តីរបស់គាត់ទៅយក ខណៈមកដល់ចំណុចកើតហេតុ ក្រោយមូលដ្ឋានកងរាជអាវុធហត្ថភូមិធម្មជាតិចម្ងាយជាង៣០០ម៉ែត្រ ស្រាប់តែជនល្មើសដែលជិះជាមួយប្តីរបស់គាត់បានដកកូនកាំបិតចាក់ទៅលើប្តីរបស់គាត់ជាច្រើនកាំបិតឡើងសុសខ្លួន បណ្តាលឲ្យប្តីរបស់គាត់រងរបួសធ្ងន់សន្លប់បាត់ស្មារតី រួចជនល្មើសក៏បានយកម៉ូតូម៉ាកវ៉េវ ស៊េរី២០១៣ ពណ៌ខ្មៅ របស់ជនរងគ្រោះជិះគេចខ្លួនបាត់ស្រមោលទៅ ។
សូមបញ្ជាក់ផងដែរថា ជនរងគ្រោះ មកដល់ពេលនេះត្រូវបានក្រុមគ្រូពេទ្យនៅភូមិធម្មជាតិបញ្ជូនទៅសង្គ្រោះបន្ទាន់នៅមន្ទីរពេទ្យបង្អែក១៦មករា ក្រុងព្រះវិហារ ចំណែកឯជនដៃដល់ សមត្ថកិច្ចចម្រុះឃុំស្រឯមក៏បានស្ទាក់ចាប់បានភ្លាមៗ ប៉ុន្តែសមត្ថកិច្ចមិនទាន់បង្ហើបឲ្យដឹងពីអត្តសញ្ញាណជនដៃដល់នៅឡើយទេ និងបានបញ្ជូនមកកាន់ទីបញ្ជាការ បញ្ជាការដ្ឋានកងរាជអាវុធហត្ថខេត្តព្រះវិហារ កសាងសំណុំរឿងចាត់ការតាមនីតិវិធី ៕
ចែករំលែកព័តមាននេះ