រាជធានីភ្នំពេញ ៖ បុរសស្ត្រីពីរនាក់ប្តីប្រពន្ធ ខណៈជិះរថយន្តមួយគ្រឿងម៉ាករ៉េវហ្វ័រ ពណ៌ទឹកប្រាក់ ពាក់ស្លាកលេខភ្នំពេញ 2M-9163 ត្រឡប់មកពីចូលរួមក្នុងពិធីជប់លៀងមង្គលការបងប្អូននៅមជ្ឈមណ្ឌលកោះពេជ្រ ដល់មុខលំនៅឋានស្ថិតនៅភូមិចំរើនផល សង្កាត់បឹងទំពុន ខណ្ឌមានជ័យ កាលពីវេលាម៉ោង៨និង៣០នាទីយប់ ថ្ងៃទី២១ ធ្នូ ក៏ត្រូវចោរប្រដាប់វុធពីរនាក់ ជិះម៉ូតូស៊េរីថ្មីមួយគ្រឿង ចូលភ្ជង់ប្លន់ ដោះយកគ្រឿងអលង្ការ និងកាបូបប្រាក់ដែលសរុបតម្លៃនៃការបាត់បង់តាមការអះអាងថារាប់មុឺនដុល្លារ ។
ប្រភពព័ត៌មានពីកន្លែងកើតហេតុ ឱ្យដឹងថា បុរសដែលត្រូវចោរតាមប្លន់ដល់លំនៅឋាននេះឈ្មោះ អុី លីកា អាយុ៤៤ឆ្នាំ ជាមន្ត្រីរាជការ រួមជាមួយស្ត្រីជាភរិយា បានជិះរថយន្តត្រឡប់មកពីចូលរួមពិធីមង្គលការ ដល់មុខលំនៅឋានក៏ឈប់រថយន្តរង់ចំាកូនក្មួយដែលនៅចាំផ្ទះបើកទ្វាររបង ។ ពេលអ្នកនៅក្នុងផ្ទះបើកទ្វាររួច ប្តីប្រពន្ធនេះក៏បើករថយន្តចូលទៅចតក្នុងដីឡូត៍មុខលំនៅឋាន ខណៈនោះស្រាប់តែមានក្រុមចោរពីរនាក់ស្លៀកពាក់សុីវិល ប្រដាប់ដោយអាវុធខ្លីគ្រប់ដៃ ភ្ជង់អ្នកបើកទ្វាររបងជាប់ រួចហើយម្នាក់ទៀតសម្រុកចូលទៅភ្ជង់បុរសស្ត្រីជាប្តីប្រពន្ធដែលមិនទាន់ចុះពីរថយន្តស្រួលបួលផងនោះ ឱ្យដោះគ្រឿងអលង្ការ និងកាបូបលុយឱ្យពួកគេ ។ ពេលយកបានសម្រេចហើយ ពួកចោរក៏នាំគ្នាឡើងជិះម៉ូតូគេចខ្លួនបាត់ភ្លាមៗដែរ ។
ប្រភពដដែលបានបន្តថា ដោយឃើញក្រុមចោរប្លន់មានអាវុធគ្រប់ដៃ ហើយស្រែកសម្លុតគំរាមរកបាញ់ទើបទាំងពីរនាក់ប្តីប្រពន្ធសុខចិត្តប្រគល់កាបូបដែលមានលុយជាង២ពាន់ដុល្លារ និងដោះគ្រឿងអលង្ការរួមមាន ខ្សែដៃ ចិញ្ចៀនពេជ្រ និងខ្សែ.ក ប្រគល់ឱ្យក្រុមចោរប្លន់ទាំងក្តីសោកស្តាយ និងភិតភ័យតក់ស្លុត ។ ចំពោះករណីខាងលើនេះ សមត្ថកិច្ចមូលដ្ឋានបានចុះទៅពិនិត្យស្រាវជ្រាវនៅកន្លែងកើតហេតុរួចធ្វើការសន្និដ្ឋានជាជំហានដំបូងថា ក្រុមចោរដែលធ្វើសកម្មភាពប្លន់នេះ គឺពិតជាបានតាមដានជនរងគ្រោះតាំងពីមជ្ឈមណ្ឌលកោះពេជ្រមកម៉្លេះ ទើបតាមធ្វើសកម្មភាពប្លន់ដល់មុខផ្ទះ ។ ករណីបទល្មើសបែបនេះ មិនមែនទើបតែកើតឡើងលើកទីមួយនោះឡើយ ហើយសកម្មភាពប្លន់តាមរូបភាពនេះ តែងកើតមានជារឿយៗនៅក្នុងរាជធានីភ្នំពេញ ដូច្នេះដើម្បីចូលរួមទប់ស្កាត់បទល្មើសនេះ ប្រជាពលរដ្ឋទាំងអស់ត្រូវមានការប្រុងប្រយ័ត្នដោយខ្លួនឯង កុំប្រើប្រាស់រំលេចគ្រឿងអលង្ការទៅចូលរួមក្នុងពិធីផ្សេងៗច្រើនពេក នាំឱ្យមុខសញ្ញាចោរប្លន់តាមកត់សម្គាល់ ។
ករណីនេះដែរ សមត្ថកិច្ចកំពុងបន្តស្រាវជ្រាវស្វែងរកមុខសញ្ញាចោរប្លន់ ដើម្បីចាប់ខ្លួនយកមកផ្តន្ទាទោសតាមច្បាប់ ៕
ចែករំលែកព័តមាននេះ