ខេត្តបាត់ដំបង ៖ មន្ត្រីអង្គភាពកំចាត់មីន «ស៊ីម៉ាក់» បានចុះរាវរកឃើញគ្រាប់មីនប្រភេទ«៦៩»ដែលសេសសល់ពីសម័យសង្គ្រាមនៅលើដីចម្ការរបស់ប្រជាពលរដ្ឋ ដោយប្រមូលបានយ៉ាងតិចជាង៧០គ្រាប់ កាលពីរសៀលថ្ងៃទី០៩ កុម្ភៈ នៅចំណុចដីចម្ការមួយកន្លែង ដែលនៅមិនឆ្ងាយប៉ុន្មានពីអូរព្រំដែនខ្មែរ-ថៃ…
ខេត្តបាត់ដំបង ៖ មន្ត្រីអង្គភាពកំចាត់មីន «ស៊ីម៉ាក់» បានចុះរាវរកឃើញគ្រាប់មីនប្រភេទ«៦៩»ដែលសេសសល់ពីសម័យសង្គ្រាមនៅលើដីចម្ការរបស់ប្រជាពលរដ្ឋ ដោយប្រមូលបានយ៉ាងតិចជាង៧០គ្រាប់ កាលពីរសៀលថ្ងៃទី០៩ កុម្ភៈ នៅចំណុចដីចម្ការមួយកន្លែង ដែលនៅមិនឆ្ងាយប៉ុន្មានពីអូរព្រំដែនខ្មែរ-ថៃ ស្ថិតក្នុងភូមិទូលជ្រៃ ឃុំសំពៅលូន ស្រុកសំពៅលូន ក្រោយពីម្ចាស់ចម្ការបានផ្ដល់ព័ត៌មាន ។
តាមរយៈរបាយការណ៍ លោកទឹម វិឆ័យ អធិការស្រុកសំពៅលូនបានឲ្យដឹងថា គ្រាប់មីនទាំងនោះស្ថិតនៅលើដីចម្ការរបស់ឈ្មោះ ស៊ុន ប្រុស ភេទប្រុស អាយុ៣៥ឆ្នាំ ដែលម្ចាស់ចម្ការរូបនេះ អាស្រ័យផលរាល់ឆ្នាំ ។ លោកបានប្រាប់ថា ដំបូងម្ចាស់ចម្ការប្រទះឃើញគ្រាប់មីននេះតែ០១គ្រាប់ទេ នៅលើដីរបស់គាត់ តែដោយមានការសង្ស័យ ទើបគាត់រាយការណ៍ទៅអាជ្ញាធរ ដើម្បីរិះរកវិធីដោះស្រាយ ផ្ដល់ដំណឹងទៅមន្ត្រីស៊ីម៉ាក់ ។
មន្ត្រីមូនដ្ឋានដែលបានចុះសហការជាមួយមន្ត្រីជំនាញស៊ីម៉ាក់បានប្រាប់ថា ក្រោយពីទទូលបានព័ត៏មានភ្លាម មន្ត្រីជំនាញក្នុងអង្គភាពស៊ីម៉ាក់ក៏បានចុះពិនិត្យ និងបានរាវរកឃើញបន្ថែមទៀត ដែលគ្រាប់មីនខ្លះអណ្ដែតនៅលើដី និងមួយចំនួនធំរកឃើញកប់នៅក្នុងដីនៅឡើយ ។
យោងតាមរបាយការណ៍គ្រាប់យុទ្ធភណ្ឌ ដែលមន្ត្រីស៊ីម៉ាក់រាវរកឃើញ និងប្រមូលបានពីក្នុងដីចម្ការប្រជាពលរដ្ឋនោះមាន៖ គ្រាប់មីន«៦៩»ចំនួន៧២គ្រាប់ និងគ្រាប់កាំភ្លើងត្បាល់ធុន«៦០ម.ម»ចំនួន០១គ្រាប់ ។ ម្ចាស់ចម្ការ លោក ស៊ុន ប្រុស ត្រូវបានសមត្ថកិច្ចស្រង់សម្ដីថា ដីចម្ការរបស់គាត់ខាងលើនេះ គាត់ធ្លាប់អាស្រ័យផលរាល់ឆ្នាំ តែមិនដែលប្រទះឃើញកាកសំណល់សង្គ្រាមច្រើនស្អេកស្កះកប់ក្នុងដីបែបនេះទេ ។
ប៉ុន្តែឆ្នាំនេះ ស្រាប់តែប្រទះឃើញគ្រាប់មីន៦៩ ដែលជាប្រភេទគ្រាប់មីនដ៏គ្រោះថ្នាក់បំផុត តែសំណាងល្អវាមិនបង្កគ្រោះថ្នាក់អ្វីទេ ។ បើតាមមន្ត្រីជំនាញបានប្រាប់ថា គ្រាប់មីនទាំងនោះ ភាគច្រើនខូចគុណភាព ហើយវាជាគ្រាប់ដែលសេសសល់ពីសម័យសង្គ្រាម ដែលគេកប់លាក់ទុកក្នុងដី ។ ប៉ុន្តែនៅពេលម្ចាស់ចម្ការធ្វើរាល់ឆ្នាំ និងត្រូវភ្លៀងជោកជាំផង ទើបមានគ្រាប់មីនមួយចំនួនផុសអណ្ដែតឡើង ។
យ៉ាងណា នេះចាត់ទុកជាគំរូល្អមួយរបស់ម្ចាស់ចម្ការ ដែលប្រទះឃើញគ្រាប់មិនប៉ះពាល់ ហើយមានមន្ទិលសង្ស័យក៏បានរាយការណ៍ជូនអាជ្ញាធរឲ្យជួយផ្ដល់ព័ត៏មានបន្តទៅអង្គភាពកំចាត់មីន«ស៊ីម៉ាក់» ដើម្បីចុះរុករកប្រមូលយកអស់ពីក្នុងដីយកទៅកម្ទេចចោល ៕
ចែករំលែកព័តមាននេះ