រាជធានីភ្នំពេញ ៖ បន្ទាប់ពីសហរដ្ឋអាម៉េរិក ក្រោមការដឹកនាំដោយលោក ដូណាល់ ត្រាំ (Donald Trump) បានប្រកាសបណ្តេញជនអន្តោប្រវេសន៍ខុសច្បាប់ ចេញពីអាម៉េរិក…
រាជធានីភ្នំពេញ ៖ បន្ទាប់ពីសហរដ្ឋអាម៉េរិក ក្រោមការដឹកនាំដោយលោក ដូណាល់ ត្រាំ (Donald Trump) បានប្រកាសបណ្តេញជនអន្តោប្រវេសន៍ខុសច្បាប់ ចេញពីអាម៉េរិក ប្រមាណ១លាន៤សែននាក់ ទៅប្រទេសកំណើតវិញ ហើយក្នុងចំណោមជាង១លាននាក់នោះ ក៏មានប្រជាពលរដ្ឋកម្ពុជា ប្រមាណជិត២ពាន់នាក់ ក៏នឹងត្រូវបណ្តេញពីទឹកដីអាមេរិកនេះដែរ ប៉ុន្តែមកដល់ពេលនេះ កម្ពុជាមិនទាន់ទទួលបានព័ត៌មានផ្លូវការនៅឡើយ ។
ពាក់ព័ន្ធករណីនេះ អ្នកនាំពាក្យក្រសួងការបរទេស និងសហប្រតិបត្តិការកម្ពុជា ត្រូវបានសារព័ត៌មានមួយ ស្រង់សម្ដីដោយបានបញ្ជាក់ថា ៖ “កម្ពុជា មិនទាន់ទទួលបានការជូនដំណឹងផ្លូវការពីភាគីអាម៉េរិកនៅឡើយទេ ហើយបានកម្ពុជាត្រៀមខ្លួនជាស្រេច ក្នុងការទទួលយកប្រជាពលរដ្ឋខ្មែរ មករស់នៅប្រទេសកំណើតវិញ” ។
ឯកឧត្តម ជុំ សុន្ទរី អ្នកនាំពាក្យក្រសួងការបរទេសកម្ពុជា បានគូសបញ្ជាក់ថា កម្ពុជា និងអាម៉េរិក មានកិច្ចសហប្រតិបត្តិការ លើការបញ្ជូនពលរដ្ឋខ្មែរពីអាម៉េរិកមកកម្ពុជា បានចាប់ផ្តើមនៅឆ្នាំ២០០២ ហើយបន្ទាប់ពីការចុះហត្ថលេខារវាងប្រទេសទាំងពីរ លើកិច្ចព្រមព្រៀង ស្តីពីមាតុភូមិនិវត្តន៍របស់ពលរដ្ឋកម្ពុជា ។
បើតាមអ្នកនាំពាក្យ ក្រសួងការបរទេសកម្ពុជា បានលើកឡើងថា កិច្ចសហប្រតិបត្តិការនេះ ត្រូវបានពង្រឹងបន្ថែមដោយការចុះហត្ថលេខាលើ អនុស្សារណៈ នៃការយោគយល់ ក្នុងខែឧសភា ឆ្នាំ២០២៣ កន្លងមកនេះ ហើយត្រូវបានដំណើរការ ដោយអាជ្ញាធរពាក់ព័ន្ធរបស់ប្រទេសទាំងពីរក្រោមទិដ្ឋភាព២ ៖ ទី១ គឺដំណើរការបញ្ជូន និងទទួលយកពលរដ្ឋខ្មែរពីអាម៉េរិកមកកម្ពុជា និងទី២ គឺការធ្វើសមាហរណកម្មពលរដ្ឋខ្មែរ ដែលត្រូវបានបញ្ជូនមកវិញ ទៅក្នុងសហគមន៍ខ្មែរ ។
ឯកឧត្តម ជុំ សុន្ទរី លើកឡើងទៀតថា ដំណើរការកិច្ចសហប្រតិបត្តិការខាងលើនេះ ត្រូវបានអាជ្ញាធររបស់ប្រទសទាំងពីរ វាយតំលៃថា បានប្រព្រឹត្តទៅដោយរលូន មិនមានការប្រឈមនឹងបញ្ហាអ្វីដែលមិនអាចដោះស្រាយបាននោះឡើយ ។ ទាក់ទងនឹងបច្ចុប្បន្ននេះ ក្រសួងការបរទេស មិនទាន់ទទួលបានការជូនព័ត៌មានផ្លូវការណាមួយពីភាគីអាម៉េរិក ទន្ទឹមនឹងនេះ កម្ពុជាក៏បានបង្ហាញនូវការតាំងចិត្ត និងឆន្ទះ បន្តកិច្ចសហប្រតិបត្តិការ នេះដោយអិតមានងាករេឡើយ ។
បើយោងតាមការចុះផ្សាយពីអគ្គនាយករដ្ឋានអន្តោប្រវេសន៍អាម៉េរិក ICE អាម៉េរិកត្រៀមបណ្តេញជនអន្តោប្រវេសន៍ខុសច្បាប់ ចេញពីអាម៉េរិក ប្រមាណ ១លាន៤សែននាក់ ទៅប្រទេសកំណើតវិញ។ នៅក្នុងចំណោមមនុស្សជាង១លាននាក់នោះ មានជនជាតិខ្មែរប្រមាណ ១ ៧៤៧នាក់ ហើយប្រទេសជិតខាងកម្ពុជា ដូចជាឡាវ មានប្រមាណ ៤ ៨៥០នាក់ ថៃប្រមាណ ៦១៩នាក់ និងវៀតណាមប្រមាណ ៨ ៦៧៥នាក់ ៕
ចែករំលែកព័តមាននេះ