ប្រទេសវៀតណាម ៖ យោងតាមប្រភពពីសារព័ត៌មាន VnExpress កាលពីថ្ងៃទី១ ខែកុម្ភៈ បានឱ្យដឹងថា បទប្បញ្ញត្តិនៃការនាំចូលកាន់តែតឹងតែង នៅក្នុងប្រទេសចិនដីគោក សហរដ្ឋអាមេរិក និងតៃវ៉ាន់ ត្រូវបានរំពឹងថានឹងប៉ះពាល់ដល់ការនាំចេញកសិកម្ម និងអាហារសមុទ្ររបស់ប្រទេសវៀតណាម នៅឆ្នាំនេះ។

បទប្បញ្ញត្តិថ្មីមួយចំនួនក្នុងគោលដៅនាំចេញចម្បងរបស់វៀតណាម បានបង្កើតឧបសគ្គយ៉ាងធ្ងន់ធ្ងរសម្រាប់អាជីវកម្ម និងកសិកររបស់ប្រទេសនេះ។ ជាឧទាហរណ៍ ប្រទេសចិន ដែលជាអ្នកទិញផ្លែទុរេនវៀតណាម ថ្មីៗនេះបានណែនាំការធ្វើតេស្តចាំបាច់សម្រាប់ សារធាតុគីមីដែលអាចបង្កមហារីក បន្ថែមពីលើការត្រួតពិនិត្យជាធម្មតា។ តម្រូវការនេះ បង្កការលំបាកធំរួចហើយ សម្រាប់បណ្តាអ្នកនាំចេញ ត្រូវបានណែនាំបន្ទាប់ពីសារធាតុគីមីត្រូវបានរកឃើញក្នុងការនាំចេញទុរេនថៃជាច្រើននៅចុងឆ្នាំ ២០២៤។

បញ្ហាប្រឈមស្រដៀងគ្នានេះ ក៏បានឡោមព័ទ្ធលើការនាំចេញកសិកម្មផ្សេងទៀតរបស់វៀតណាម ដោយចំណូលពីការនាំចេញបន្លែផ្លែឈើក្នុងខែមករាបានធ្លាក់ចុះ ១១,៣% មកនៅត្រឹម ៤១៧លានដុល្លារ ដោយសារបទប្បញ្ញត្តិសំណល់ថ្នាំសម្លាប់សត្វល្អិតកាន់តែតឹងរ៉ឹងដោយសហរដ្ឋអាមេរិក សហភាពអឺរ៉ុប និងកោះតៃវ៉ាន់។ ការកាត់បន្ថយតម្រូវការពីប្រទេសចិន ក៏បានជះឥទ្ធិពលយ៉ាងខ្លាំងដល់វិស័យផ្លែឈើ និងបន្លែវៀតណាម។ លើសពីនេះទៀត ការរអាក់រអួលផ្នែកភស្តុភារ និងការកើនឡើងថ្លៃដឹកជញ្ជូន បានធ្វើឱ្យមានភាពស្មុគស្មាញដល់ការបំពេញការបញ្ជាទិញទាន់ពេលវេលាផងដែរ។

ការនាំចេញអង្កររបស់វៀតណាម ក៏ស្ថិតនៅក្រោមសម្ពាធផងដែរ ជាមួយនឹងកម្រិតស្តុកខ្ពស់នៅក្នុងប្រទេសហ្វីលីពីន និងឥណ្ឌូណេស៊ី និងការប្រកួតប្រជែងជាថ្មីពីប្រទេសឥណ្ឌាបានជំរុញឱ្យតម្លៃធ្លាក់ចុះដល់ ៤០០ដុល្លារក្នុងមួយតោន ដែលជាតម្លៃទាបបំផុតក្នុងរយៈពេល៥ឆ្នាំ។ ក្រឡេកទៅវិស័យអាហារសមុទ្រវៀតណាមឯណោះវិញ ក៏ប្រឈមមុខនឹងឧបសគ្គផ្ទាល់ខ្លួនជាមួយនឹងបទប្បញ្ញត្តិដ៏តឹងរឹងរបស់សហរដ្ឋអាមេរិក និងសហភាពអឺរ៉ុបស្តីពីសុវត្ថិភាពចំណីអាហារ និងការប្រឆាំងការអនុវត្តការនេសាទខុសច្បាប់ ដោយបង្ខំឱ្យបណ្តាក្រុមហ៊ុនវៀតណាមជាច្រើនវិនិយោគលើបច្ចេកវិទ្យា និងការកែលម្អដំណើរការ។

ទោះជាយ៉ាងណាក៏ដោយ អ្នកខ្លះមើលឃើញបញ្ហាប្រឈមទាំងនេះ គឺជាឱកាសសម្រាប់កំណើននៃការនាំចេញ ព្រោះតម្រូវការងើបឡើងវិញ សម្រាប់ការនាំចូលអាហារសមុទ្រនៅក្នុងប្រទេសសេដ្ឋកិច្ចធំៗដូចជា សហរដ្ឋអាមេរិក សហភាពអឺរ៉ុប និងជប៉ុន ហើយទីផ្សារក៏កំពុងរីកចម្រើននៅទ្វីបអាហ្វ្រិក និងមជ្ឈិមបូព៌ាផងដែរ។ សមាគមអ្នកនាំចេញ និងផលិតអាហារសមុទ្រវៀតណាមរំពឹងថា ប្រាក់ចំណូលនាំចេញអាហារសមុទ្រឆ្នាំនេះ នឹងកើនឡើងដល់១១ពាន់លានដុល្លារ ដែលត្រូវបានជួយដោយគោលនយោបាយពន្ធរបស់អាមេរិកអំណោយផល ខណៈផលិតផលចិនប្រឈមនឹងពន្ធខ្ពស់។

ឧស្សាហកម្មកាហ្វេក៏ត្រូវបានកំណត់ដើម្បីទទួលបានអត្ថប្រយោជន៍ផងដែរ ដោយរំពឹងថាប្រាក់ចំណូលនឹងកើនឡើងដល់៦ពាន់លានដុល្លារ ដោយសារតែកង្វះខាតផលិតកម្មកាហ្វេជាសាកលនៅក្នុងរដូវកាល ២០២៤-២០២៥ ដែលរក្សាតម្លៃកាហ្វេឱ្យនៅខ្ពស់។

ដើម្បីសម្រេចបាននូវគោលដៅនាំចេញពី ៦៤ ទៅ ៦៥ពាន់លានដុល្លារ នៅឆ្នាំនេះ ក្រសួងកសិកម្ម និងអភិវឌ្ឍន៍ជនបទវៀតណាម កំពុងអនុវត្តយុទ្ធសាស្ត្រផ្សេងៗ រួមទាំងការលើកកម្ពស់កសិកម្មបច្ចេកវិទ្យាទំនើប គាំទ្រដល់អាជីវកម្មក្នុងការលើកកម្ពស់ការកែច្នៃ និងការគ្រប់គ្រងគុណភាព ក៏ដូចជា ការពង្រីកទីផ្សារថ្មីដូចជា មជ្ឈិមបូព៌ា អាហ្រ្វិក និងអាមេរិកឡាទីន។ ការលើកទឹកចិត្តផ្នែកពន្ធ និងការគាំទ្រផ្នែកហិរញ្ញវត្ថុ ក៏កំពុងត្រូវបានអនុវត្តផងដែរ ដើម្បីជំរុញការវិនិយោគលើផលិតផលកែច្នៃ និងកសាងម៉ាកយីហោអន្តរជាតិ។

អ្នកជំនាញមកពីសមាគមផ្សេងៗគ្នា ទទួលស្គាល់បញ្ហាប្រឈមសំខាន់ៗ ប៉ុន្តែនៅតែមានសុទិដ្ឋិនិយមអំពីសក្តានុពល នៃវិស័យកសិកម្មក្នុងការរៀបចំរចនាសម្ព័ន្ធឡើងវិញ និងរីកចម្រើនកាន់តែរឹងមាំជាមួយនឹងគោលនយោបាយត្រឹមត្រូវ បញ្ជាក់ពីភាពរឹងមាំ និងជំហររបស់ប្រទេសវៀតណាម នៅក្នុងទីផ្សារពិភពលោក៕ ប្រភព ៖ VnExpress