ខេត្តសៀមរាប ៖ កម្លាំងកងរាជអាវុធហត្ថខេត្តសៀមរាប បានឃាត់ខ្លួនក្មេងទំនើងម្នាក់ ក្នុងចំណោម២នាក់ ខណៈជិះម៉ូតូ១គ្រឿងធ្វើសកម្មភាព ដោយប្រើកាំបិតខ្វែវដេញកាប់ទៅលើជនរងគ្រោះ២នាក់ តែមិនបណ្តាលឱ្យរងរបួសនោះទេ ព្រោះកាប់មិនបាន ។…
ខេត្តសៀមរាប ៖ កម្លាំងកងរាជអាវុធហត្ថខេត្តសៀមរាប បានឃាត់ខ្លួនក្មេងទំនើងម្នាក់ ក្នុងចំណោម២នាក់ ខណៈជិះម៉ូតូ១គ្រឿងធ្វើសកម្មភាព ដោយប្រើកាំបិតខ្វែវដេញកាប់ទៅលើជនរងគ្រោះ២នាក់ តែមិនបណ្តាលឱ្យរងរបួសនោះទេ ព្រោះកាប់មិនបាន ។ ប៉ុន្តែទោះតាមកាប់ម្ចាស់ម៉ូតូមិនបានក៏ដោយ មិនបំបាត់កំហឹងទេ បែរជាមកកាប់បំផ្លាញម៉ូតូរបស់ជនរងគ្រោះ បណ្តាលឱ្យខូចខាតយ៉ាងដំណំ គឺកាប់ចិញ្ច្រាំខ្ទេច បង្កការភ្ញាក់ផ្អើល ។
ហេតុការណ៍បង្កហិង្សានេះ បានកើតឡើងនៅវេលាម៉ោង១១និង១០នាទីយប់ ថ្ងៃទី២០ ខែមករា ឆ្នាំ២០២៥ ត្រង់ចំណុចលើផ្លូវកៅស៊ូ ក្នុងភូមិធ្លកអណ្ដូង សង្កាត់ស្លក្រាម ក្រុងសៀម រាប ។បើតាមប្រភពពីកម្លាំងកងរាជអាវុធហត្ថខេត្ត បានប្រាប់ឱ្យដឹងនៅថ្ងៃទី២១ ខែមករា ឆ្នាំ២០២៥ថា មានក្រុមក្មេងទំនើងធ្វើសកម្មភាពដេញកាប់គ្នា រួចក្រុមបង្កបានជិះម៉ូតូគេចខ្លួនបាត់ ខណៈពេលនោះកម្លាំងជំនាញឃាត់ខ្លួនបានម្នាក់ ក្នុងចំណោម២នាក់ រួចយកមកធ្វើការសួរនាំនៅទីបញ្ជាការកងរាជអាវុធហត្ថខេត្ត ។
ក្រោយពីទទួលបានព័ត៌មាន កម្លាំងជំនាញអាវុធហត្ថខេត្តសៀមរាប បានចុះទៅដល់កន្លែងកើតហេតុធ្វើការស្រាវជ្រាវ និងដោយបានសហការពីកម្លាំងប៉ុស្តិ៍នគរបាលរដ្ឋបាលសង្កាត់នគរធំ ក្រុងសៀមរាប រហូតឈានដល់ធ្វើការឃាត់ខ្លួនបានជនសង្ស័យរូបនេះឈ្មោះ អាត លីមិញ ភេទប្រុស អាយុ១៦ឆ្នាំ មុខរបរគ្មាន ត្រូវបាននាំយកមកស្តាប់ចម្លើយអំពីរឿងហេតុ ដើម្បីចាត់ការបន្តតាមនីតិវិធី ។ វត្ថុតាងចាប់យករួមមាន កាំបិតខ្វែវ១ដើម រួមនឹងសម្ភារៈមួយចំនួនទៀត ។
ក្រោយពីសួរនាំ ក្មេងទំនើងឈ្មោះ អាត លីមិញ បានសារភាពឱ្យដឹងថា ខ្លួនរួមនឹងបក្ខពួកម្នាក់ទៀត ពិតជាបានប្រព្រឹត្តអំពើហិង្សាលើជនរងគ្រោះប្រាកដមែន ។ បច្ចុប្បន្នក្មេងទំនើងខាងលើ ត្រូវបានកម្លាំងជំនាញការិយាល័យប្រឆាំងបទល្មើសព្រហ្មទណ្ឌ នៃកងរាជអាវុធហត្ថខេត្តសៀមរាប កសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធី ។ ចំណែកឯបក្ខពួកដែលរត់គេចខ្លួន កម្លាំងជំនាញអាវុធហត្ថខេត្តសៀមរាប កំពុងស្រាវជ្រាវតាមរកឃាត់ខ្លួនជាបន្តទៀត ៕
ចែករំលែកព័តមាននេះ