ខេត្តស្ទឹងត្រែង ៖ ប្រជាពលរដ្ឋប្រមាណជាជាង៨៩០គ្រួសារ រស់នៅស្រុកសៀមបូក បានទផ្តល់ប័ណ្ណកម្មសិទ្ធិដីធ្លី(ប្លង់រឹង) ចេញពីមន្ទីរដែនដី នគរូបនីយកម្ម និងសំណង់ខេត្ត ដើម្បីបានកាន់កាប់ស្របច្បាប់ផ្ទាល់ខ្លួន ។…
ខេត្តស្ទឹងត្រែង ៖ ប្រជាពលរដ្ឋប្រមាណជាជាង៨៩០គ្រួសារ រស់នៅស្រុកសៀមបូក បានទផ្តល់ប័ណ្ណកម្មសិទ្ធិដីធ្លី(ប្លង់រឹង) ចេញពីមន្ទីរដែនដី នគរូបនីយកម្ម និងសំណង់ខេត្ត ដើម្បីបានកាន់កាប់ស្របច្បាប់ផ្ទាល់ខ្លួន ។
ក្នុងពិធីចែកប័ណ្ណកម្មសិទ្ធិដីធ្លីខាងលើ ប្រមុខថ្នាក់ដឹកនាំខេត្ត បានសង្កត់ធ្ងន់ និងផ្ដល់សិទ្ធិទៅប្រជាពលរដ្ឋ អាចរាយការទាក់ទងជូនប្រធានមន្ទីរសូរិយោដីខេត្ត ភ្លាម ប្រសិនបើមានមន្ត្រីណាទាមទារយកថវិកាខុសពីគោលនយោបាលដីធ្លី ដែលមានតារាងបិទបង្ហាញនោះ ។
រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានក្រុមការងារ រាជរដ្ឋាភិបាលចុះមូលដ្ឋានខេត្តស្ទឹងត្រែង លោក ផៃ ប៊ុនឈឿន បានមានប្រសាសន៍កាលថ្ងៃទី៨ មករា ២០២៥ ថា ៖ នេះជាការគ្រប់គ្រងឱ្យមានតម្លាភាពត្រឹមត្រូវ ហើយប័ណ្ណកម្មសិទ្ធិជាប្លង់រឹង ដែលចែកជូននេះជាទម្រង់ផ្នែកច្បាប់ លើវិស័យដីធ្លី ជូនប្រជាពលរដ្ឋកាន់កាប់ស្របច្បាប់ ជាដីរបស់ខ្លួន និងគ្មានការកាប់ទន្ទ្រានពីអ្នកដទៃទៀតឡើយ ។
លោកថា វិញ្ញាបនប័ត្រសម្គាល់ម្ចាស់អចលនវត្ថុនេះ មានផលប្រយោជន៍សំខាន់សម្រាប់បងប្អូនយើងបន្តអនុវត្តចែកដីកម្មសិទ្ធិរបស់ខ្លួននេះ ទៅឱ្យកូនចៅបន្តបាន ហើយអាចយកទៅប្រើប្រាស់តាមតម្រូវការផ្សេងៗទៀត ទៅតាមនិតិវិធីច្បាប់ ។
លោក សរ សុពុត្រា អភិបាលខេត្តស្ទឹងត្រែង មានប្រសាសន៍ថា លទ្ធផល ដែលបងប្អូនទទួលបាននេះ គឺកើតចេញពីការយកចិត្តទុកដាក់របស់ រាជរដ្ឋាភិបាល និងការចុះអនុវត្តផ្ទាល់ពីមន្ត្រីជំនាញផ្នែកសុរិយោដី មន្ត្រីជំនាញថ្នាក់ ខេត្ត ក្រុង ស្រុក។ នៅពេលបងប្អូនទទួលបានវិញ្ញាបនប័ត្រស្របច្បាប់នេះហើយ សូមយកទៅទុកដាក់ថែរក្សាឲ្យបានគត់មុត ហើយប្រើប្រាស់ឲ្យបានត្រឹមត្រូវ ចៀសវាងយកទៅបញ្ចាំ គ្មានការដឹងឮពីអាជ្ញាធរមូលដ្ឋាន ដែលផ្ទុយនិងច្បាប់ នាំឲ្យកើតរឿងរ៉ាវ ពិបាកក្នុងការដោះស្រាយ ដោយសារតែទ្រព្យសម្បត្តិរបស់ខ្លួននោះ ។
លោកស្រី ពៅ យឿន ប្រជាពលរដ្ឋរស់នៅភូមិដំរីផុង ឃុំកោះសំពាយសាទរក្នុងការទទួលបានប័ណ្ណកម្មសិទ្ធិកាន់កាប់ដីធ្លីស្របច្បាប់នេះ ព្រោះស្ទើរតែមួយជីវិតទៅហើយ ការរស់នៅលើដីធ្លី ពុំដែលបានគិតពីសុវត្ថិភាពផ្នែកច្បាប់នោះទេ ។
លោកស្រីសប្បាយចិត្ត និងថែរក្សាប័ណ្ណនេះឲ្យបានល្អ ព្រោះបានផ្ដល់តម្លៃមិនអាចកាត់ថ្លៃបានដល់ការរស់នៅ និងចៀសវាងពីទំនាស់ដីធ្លីផ្សេងៗ ដែលកើតមានឡើងដោយសារព្រំដី ។
សូមបញ្ជាក់ថា ប័ណ្ណកម្មសិទ្ធិដីធ្លី ចំនួនជាង២,៤០០ក្បាលដី ត្រូវបានចែកជូនប្រជាពលរដ្ឋ ចំនួនជាង៨៩៨គ្រួសារ រស់នៅភូមិដំរីផុង ភូមិកោះសំពាយ ឃុំកោះសំពាយ និងភូមិស្រែក្រសាំង ឃុំស្រែក្រសាំង ក្នុងស្រុកសៀមបូក ខេត្តស្ទឹងត្រែង ដើម្បីធានាផ្នែកច្បាប់ ក្នុងការគ្រប់គ្រងដីធ្លី សម្រាប់ការរស់នៅ និងអាស្រ័យផលមានសុវត្ថិភាពទៅតាមគ្រួសារនីមួយៗ ៕
ចែករំលែកព័តមាននេះ