រដូវនេះជាពេលនៃការរៀបចំអាពាហ៍ពិពាហ៍ ។ ប៉ុន្តែឪពុកម្តាយ និងសាមីខ្លួនដែលមានផែនការរៀបអាពាហ៍ពិពាហ៍ គួរកុំខំប្រឹងប្រែងតាមគេតាមឯង ដើម្បីយកមុខមាត់ពេក ។ ជំនួសមកវិញ ពិធីនេះ គួរតែរៀបចំយ៉ាងណាដោយផ្អែកលើលទ្ធភាព…
រដូវនេះជាពេលនៃការរៀបចំអាពាហ៍ពិពាហ៍ ។ ប៉ុន្តែឪពុកម្តាយ និងសាមីខ្លួនដែលមានផែនការរៀបអាពាហ៍ពិពាហ៍ គួរកុំខំប្រឹងប្រែងតាមគេតាមឯង ដើម្បីយកមុខមាត់ពេក ។ ជំនួសមកវិញ ពិធីនេះ គួរតែរៀបចំយ៉ាងណាដោយផ្អែកលើលទ្ធភាព និងធនធានដែលយើងមានល្មមៗទៅបានហើយ ដើម្បីបង្ការកុំអោយពិធីនេះក្លាយជាបំណុល ។
អ្វីដែលយើងត្រូវចាំពិធីធំប៉ុណ្ណាក៏មិនមែនជាកត្តាកំណត់ជីវិតអាពាហ៍ពិពាហ៍ដែរ ។ ប្តីប្រពន្ធស្រឡាញ់គ្នាដល់ចាស់ស្លា.ប់ មិនអាស្រ័យលើពិធីចាយលានខ្ជះខ្ជាយឡើយ ។ វាអាស្រ័យលើការស្រឡាញ់គ្នាពិតប្រាកដ ការគោរពគ្នា និង ការអត់ឱនអោយគ្នាទៅវិញទៅមក ។
តាំងពីដើមរៀងមក ការរៀបចំអាពាហ៍ពិពាហ៍ដែលខ្មែរយើងចាត់ទុកថា ជាពិធីដ៏មហាមង្គល គឺជាកំពូលពិធីដែលនឹងត្រូវចំណាយដ៏ច្រើន ហើយមកដល់សម័យនេះការចំណាយនោះ គឺរឹតតែច្រើនបន្ថែមទៀត ។ តម្លៃនៃការចំណាយសម្រាប់ពិធីនេះពីមួយជំនាន់ទៅមួយជំនាន់ គឺកាន់តែថ្លៃ និងកាន់តែច្រើនដែលតម្រូវឲ្យសាមីខ្លួនដែលជាកូនក្រមុំ និងកូនកម្លោះក៏ដូចជា គ្រួសារគួរតែរិះគិត។
ការរៀបចំពិធីដ៏មហាមង្គលនេះកាលពី១០ឆ្នាំមុន ការចំណាយសរុប គឺត្រឹមសមរម្យនៅក្នុងរង្វង់ត្រឹម២ម៉ឺនដុល្លារអីប៉ុណ្ណោះ ប៉ុន្តែសម័យនេះអាចឡើងរហូតដល់៤ទៅ៥ម៉ឺនដុល្លារ ហើយអាចលើសនេះរាប់សិបដងទៀតក៏មាន អាស្រ័យលើទំហំនៃធនធានដែលសាមីដើមការហ៊ានចំណាយ ។
ឃើញកញ្ចប់នៃការចំណាយទាំងនេះ តើអ្នកយល់យ៉ាងណា? តើអ្នកមានលទ្ធភាពទេ ? ហើយបើមាន តើអ្នកអាចនៅសល់អ្វីទេពីការចំណាយដ៏ធំបែបនេះ? តើការចំណាយទាំងនោះអាចបានផលអ្វីមកវិញ? សម្រាប់អ្នកដែលមានធនធានមានលទ្ធភាពការចំណាយទាំងនោះ គឺអាចបានមកវិញ គឺកិត្តិយស ការសរសើរ ប៉ុន្តែទន្ទឹមនឹងនោះក៏អាចនឹងបានមកវិញនូវការច្រណែន និងការសម្លឹងពីភាពខ្ជះខ្ជាយពីសាធារណជនផងដែរ ។ ចំណែកអ្នកថ្លើមធំហ៊ានខ្ចីលុយធនាគារ ដើម្បីធ្វើពិធីធំអោយគេឯង គឺអាចនឹងប្រឈមនឹងបំណុល ។ ដូច្នេះកុំថ្លើមធំពេកចង់បានមុខមាត់ហួសសមត្ថភាពពេក ។
សរុបទៅអាពាហ៍ពិពាហ៍ គឺគ្រាន់តែជាពិធីប្រកាសសុំការទទួលស្គាល់ពីសង្គមថាបុរសនេះ និងស្ត្រីនោះ ចាប់ដៃគ្នាបង្កើតគ្រួសារថ្មីមួយប៉ុណ្ណោះ ។ ប៉ុន្តែទោះបីជាយ៉ាងណាក៏ដោយវាមិនស្របច្បាប់ឡើយ ។ ប្រសិនបើឲ្យស្របច្បាប់ គឺទាល់តែទៅចុះសំបុត្រអាពាហ៍ពិពាហ៍មួយបន្ថែមទៀត ។
ការរៀបចំអធិកអធមមិនមែនមានន័យថា ជាការរៀបចំឲ្យគូស្វាមីភរិយាថ្មីមានសេចក្តីសុខ និងសុភមង្គលខ្លាំង និងយូរអង្វែងឡើយ ។ ប្រសិនបើអាពាហ៍ពិពាហ៍នោះគូស្វាមីមិនយល់ចិត្តគ្នា មិនជួយគ្នា ជាពិសេសមិនយោគយល់ និងស្គាល់ទុក្ខធុរៈគ្នាទេនោះ ក៏អាចបែកបាក់គ្នាដែរ ។ ប៉ុន្តែប្រសិនបើយើងរៀបចំពិធីល្មមៗហើយអ្នកខ្លះមិនមានធនធានការ គឺបានត្រឹមតែចុះសំបុត្រអាពាហ៍ពិពាហ៍ឲ្យតែចុះសម្រុងនឹងគ្នាចាប់ដៃគ្នាកសាងគ្រួសារក៏ពួកគេអាចមានសុភមង្គល ហើយគ្រួសារចម្រុងចម្រើននៅថ្ងៃអនាគតបានដែរ ។
ចូរចាំក្នុងចិត្តថា កុំរៀបការព្រោះចង់អួតគេឯង ពីព្រោះវាជារឿងអត់ប្រយោជន៍ឡើយក្នុងការខ្ជះខ្ជាយលុយហួសហេតុ ។ ឃើញដំរីជុះ កុំជុះតាមដំរី ។ អ្វីៗត្រូវធ្វើតាមសមត្ថភាពរបស់យើង ហើយកុំធ្វើតាមគេអោយសោះ ៕
ចែករំលែកព័តមាននេះ