ខេត្តស្ទឹងត្រែង ៖ វិស័យសុខាភិបាល គឺជាវិស័យមួយដ៏សំខាន់ ដែលបម្រើឲ្យសេវាសាធារណៈ ជូនប្រជាពលរដ្ឋទូទៅប្រកបទៅដោយគុណភាពខ្ពស់ ក្នុងការថែទាំសុខមាលភាពប្រជាជនគ្រប់ស្រទាប់វណ្ណៈ ។ ក្នុងនោះអ្នកប្រកបវិជ្ជាជីវៈវិស័យសុខាភិបាល ក៏ត្រូវទទួលស្គាល់ពីក្រោមសីលធម៌…
ខេត្តស្ទឹងត្រែង ៖ វិស័យសុខាភិបាល គឺជាវិស័យមួយដ៏សំខាន់ ដែលបម្រើឲ្យសេវាសាធារណៈ ជូនប្រជាពលរដ្ឋទូទៅប្រកបទៅដោយគុណភាពខ្ពស់ ក្នុងការថែទាំសុខមាលភាពប្រជាជនគ្រប់ស្រទាប់វណ្ណៈ ។ ក្នុងនោះអ្នកប្រកបវិជ្ជាជីវៈវិស័យសុខាភិបាល ក៏ត្រូវទទួលស្គាល់ពីក្រោមសីលធម៌ ដែនកំណត់ និងនិយាមវិជ្ជាជីវៈវេជ្ជសាស្ត្រ ផងដែរ ។
លោកសាស្ត្រាចារ្យជំនួយ តាត សុវណ្ណ ប្រធានក្រុមប្រឹក្សាគណៈគ្រូពេទ្យខេត្តស្ទឹងត្រែង និងជានាយកស្ដីទី សាលាមធ្យមសិក្សាសុខាភិបាលភូមិភាគស្ទឹងត្រែង កាលពីរសៀលថ្ងៃទី២៣ ខែធ្នូ ឆ្នាំ២០២៤ បានលើកឡើងអំពីច្បាប់ ស្ដីពីការគ្រប់គ្រងអ្នកប្រកបរបរវិជ្ជាជីវៈវិស័យសុខាភិបាល ក្រមសីលធម៌ ដែនកំណត់ និងនិយាមវិជ្ជាជីវៈវេជ្ជសាស្ត្រ និងបទដ្ឋានគតិយុត្តនានា ដែលគ្រូពេទ្យក្នុងសេវាសាធារណៈ និងឯកជនក្នុងខេត្តស្ទឹងត្រែង ជូនដល់សិស្សនិស្សិត មុនពេលបញ្ចប់ការសិក្សា នៅសាលាមធ្យមសិក្សាសុខាភិបាលខេត្តស្ទឹងត្រែង ឲ្យបានយល់កាន់តែច្បាស់អំពីភាពចាំបាច់ នៃក្រមសីលធម៌របស់គ្រូពេទ្យ នៅពេលបំពេញវិជ្ជាជីវៈក្នុងវិស័យសុខាភិបាល ។
លោកបានលើកឡើងថា យើងទាំងអស់គ្នា សុទ្ធតែយល់ឃើញថា ចំណេះដឹងជំនាញវិជ្ជាជីវៈ ជាកត្តាសំខាន់ ចម្បង ប៉ុន្តែកត្តានេះ មិនអាចកាត់ផ្តាច់ អំពីគុណធម៌ ក្រមសីលធម៌ វិជ្ជាជីវៈ និងបទដ្ឋានគតិយុត្តិ វិជ្ជាជីវៈនានា បានឡើយ ពោលគឺត្រូវដើរទន្ទឹមគ្នា ទើបធ្វើឲ្យសកម្មភាពព្យាបាល ប្រកបដោយអាកប្បកិរិយា ទន់ភ្លន់ បង្កើតជាកិត្តិយស ដ៏ជាទីគោរពស្រឡាញ់ និងជាទីពេញចិត្ត ព្រមទាំងទទួលបាននូវទំនុកចិត្តអំពីអ្នកជំងឺ និងក្រុមគ្រួសារអ្នកជំងឺ ដូចប្រសាសន៍របស់ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានផ្ដាំផ្ញើជាប្រចាំដល់ថ្នាក់ដឹកនាំ និងមន្ត្រីរាជការបុគ្គលិក នៅគ្រប់មូលដ្ឋានសុខាភិបាលទាំងអស់ ឱ្យចងចាំ នូវពាក្យស្លោកមួយឃ្លា ក្នុងចិត្តថា “ទុកព្រួយរបស់អ្នកជំងឺ គឺជាទុក្ខព្រួយរបស់គ្រូពេទ្យ” ។
លោកសាស្ត្រាចារ្យ ថ្លែងបែបនេះក្នុងពិធីសំណេះសំណាលរវាងថ្នាក់ដឹកនាំ នៃមន្ទីរសុខាភិបាលខេត្តស្ទឹងត្រែង និងសិស្សនិស្សិត ប្រមាណជាង ១០០នាក់ ដែលនឹងត្រូវបញ្ចប់ការសិក្សា នាពេលខ្លីខាងមុខនេះ ។
លោកវេជ្ជបណ្ឌិត អ៊ុង សូវៀត ប្រធានសុខាភិបាល នៃរដ្ឋបាលខេត្តស្ទឹងត្រែង បានលើកឡើងថា ច្បាប់ ស្ដីពីការគ្រប់គ្រងអ្នកប្រកបវិជ្ជាជីវៈវិស័យសុខាភិបាល ក្រមសីលធម៌ ជាការសំខាន់ណាស់ ច្បាប់ គឺការពារសុខភាព និងសុវត្ថិភាព ជូនប្រជាពលរដ្ឋ ។
លោកក៏បានលើកឡើងដែរថា មន្ត្រីសុខាភិបាលក្របខ័ណ្ឌរដ្ឋ ដែលទៅបើកសេវាសុខាភិបាលឯកជន មានជាង ១៧០ទីតាំង ក្នុងចំណោមអ្នកដែលបានសុំច្បាប់បើកដំណើរការសេវាសុខាភិបាលមាន ២១២ទីតាំង មិនរាប់បញ្ចូលមន្ត្រីចូលនិវត្តន៍ ។
លោកប្រធានមន្ទីរ បានលើកឡើងទៀតថា អ្នកបើកសេវាឯកជន លើវិស័យសុខាភិបាល រហូតមកទល់នឹងពេលនេះ ក្នុងអាណត្តិទី៧ រយៈពេល១ឆ្នាំមកហើយ មិនទាន់កើតមានបញ្ហាធំដុំណាមួយកើតឡើងក្នុងខេត្តស្ទឹងត្រែងយើងនៅឡើយទេ ។ នេះក៏បញ្ជាក់ដែរអំពីការយកទុកដាក់អំពីវិជ្ជាជីវៈវិស័យសុខាភិបាល ទាំងសេវារដ្ឋ និងឯកជន ។
ជាមួយគ្នានេះ ក្រុមប្រឹក្សាគណៈគ្រូពេទ្យខេត្តស្ទឹងត្រែង និងមន្ទីរសុខាភិបាល ក៏បានធ្វើការងារចុះបញ្ជីការ ការផ្ដល់អាជ្ញាប័ណ្ណ និងការឃ្លាំមើល ការអនុវត្តក្រមសីលធម៌វិជ្ជាជីវៈ។ ក្នុងនោះបានដំណើរការចុះបញ្ជី និងបន្តសុពលភាពដល់គ្រូពេទ្យទាំងអស់ ដែលកំពុងប្រកបវិជ្ជាជីវៈវេជ្ជសាស្ត្រ ក្នុងខេត្តស្ទឹងត្រែង។ បានផ្សព្វផ្សាយ នូវច្បាប់ស្ដីពីការគ្រប់គ្រងអ្នកប្រកបវិជ្ជាជីវៈ ក្នុងវិស័យសុខាភិបាល នឹងបានចុះត្រួតពិនិត្យជាមួយក្រុមការងារមន្ទីរសុខាភិបាល នៃរដ្ឋបាលខេត្តស្ទឹងត្រែង ដើម្បីពិនិត្យមើលអំពី នៃភាពស្របច្បាប់វិជ្ជាជីវៈរបស់គ្រូពេទ្យក្នុងការអនុវត្តវិជ្ជាជីវៈរបស់ខ្លួនក្នុងវិស័យឯកជនផងដែរ ៕
ចែករំលែកព័តមាននេះ