ចក្រភពអង់គ្លេស ៖ ក្រុមយក្សអង់គ្លេស Manchester City បច្ចុប្បន្នកំពុងស្ថិតក្នុងស្ថានភាពដ៏លំបាកបំផុតមួយ ដើម្បីតស៊ូជាមួយការធ្លាក់ទម្រង់លេងយ៉ាងខ្លាំងមិនធ្លាប់មាន។ ក្រុមរហស្សនាម «មេឃ​ខៀវ» មួយនេះ បានរងបរាជ័យ៩លើក ស្មើ២លើក និងឈ្នះតែ១លើកគត់ក្នុងការប្រកួត​១២លើកចុងក្រោយរបស់ពួកគេ។

ក្រុមរបស់លោក Pep Guardiola ធ្វើបានយ៉ាងល្អនៅដើមរដូវកាលនេះ ប៉ុន្តែចាប់តាំងចាញ់ក្រុមមាន់ខ្នាយមាស Tottenham Hotspur លទ្ធផល ២-១ ធ្លាក់ចេញពីពានរង្វាន់ EFL Cup ត្រឹមវគ្គ១៦ក្រុមចុងក្រោយ កាលពីថ្ងៃទី៣០ ខែតុលា ឆ្នាំ២០២៤ មក Man City បន្តធ្លាក់ទម្រង់កាន់តែខ្លាំង ហើយដើមហេតុផ្តើមចេញពីបញ្ហាកីឡាកររងរបួសជាច្រើននាក់។

លោក Pep Guardiola ត្រូវបានរាយការណ៍ថាបានបង្កើតយុទ្ធសាស្ត្របម្រុងទុក ដើម្បីដោះស្រាយបញ្ហាអវត្តមានខ្សែបម្រើការពារ Rodri ដោយសាររបួស។ ប៉ុន្តែទោះយ៉ាងណាក៏ដោយ អ្នកចាត់ការទូទៅសញ្ជាតិអេស្ប៉ាញវ័យ៥៣ឆ្នាំរូបនេះ ហាក់ដូចជាមិនចង់ស្វែងរកខ្សែបម្រើការពារបន្ថែមនោះទេ លោកហាក់បានផ្តល់សេចក្តីទុកចិត្តលើខ្សែបម្រើកណ្តាល Ilkay Gundogan ដែលរ៉ាប់រងតំបន់នោះរួចហើយ។

យ៉ាងណាមិញ ដូចដែលបានរាយការណ៍ដោយកាសែត Tuttosport របស់អ៊ីតាលី កាលពីពេលថ្មីៗនេះបានឱ្យដឹងថា លោក Pep Guardiola ត្រូវបានរាយការណ៍ថាកំពុងផ្តោតលើកូនក្រុមចាស់ គឺខ្សែប្រយុទ្ធឆ្នើម Lionel Messi នៅទីផ្សារដោះដូរកីឡាកររដូវរងារខាងមុខនេះ។ ប្រភពដដែលបានបន្តថា អតីតគ្រូបង្វឹកក្រុមអ្នកមានបុណ្យ Barcelona រូបនេះ បង្ហាញការចាប់អារម្មណ៍ចុះហត្ថលេខាលើប្រធានក្រុមជម្រើសជាតិអាហ្សង់ទីន Lionel Messi នៅក្នុងកិច្ចសន្យាខ្ចីជើងរយៈពេល៦ខែពីក្លិប Inter Miami នៃលីគកំពូលសហរដ្ឋអាមេរិក ដើម្បីជួយស្តារទម្រង់ក្រុម Man City ឱ្យល្អឡើងវិញ ខណៈការប្រកួតពាក់កណ្តាលរដូវកាលខិតជិតមកដល់។

ខ្សែប្រយុទ្ធឆ្នើម Lionel Messi វ័យ៣៧ឆ្នាំ បច្ចុប្បន្នកំពុងតែរីករាយជាមួយក្លិប Inter Miami ដែលមានលោក David Beckham គឺជាសហម្ចាស់ក្លិបមួយនេះ។ ហើយចាប់តាំងពីចាកចេញពីក្លិបអ្នកមានបារាំង PSG មកចូលរួមជាមួយក្លិបនៅអាមេរិកមួយនេះ កាលពីខែកក្កដា ឆ្នាំ ២០២៣ Messi បានបង្ហាញខ្លួន ៣៩ប្រកួត ដោយស៊ុតបញ្ចូលទីបាន ៣៤គ្រាប់ និងឈ្នះពានរង្វាន់ធំចំនួន២ផងដែរ។ ការចាប់អារម្មណ៍របស់លោក Pep Guardiola ក៏ទាក់ទាញចំណាប់អារម្មណ៍របស់ Messi ផងដែរ ដោយសារនៅចុងបញ្ចប់នៃអាជីព Messi នឹងត្រូវបង្ហាញវត្តមានសាជាថ្មីម្តងទៀត នៅលីគទ្វីបអឺរ៉ុបដែលមានការប្រកួតប្រជែងបំផុតរបស់ពិភពលោក។

គួររំលឹកថា អាជីពដ៏អស្ចារ្យបំផុតរបស់ Lionel Messi គឺជាមួយក្លិប Barcelona ហើយគ្រាប់ពេជ្រដ៏មានតម្លៃមួយនេះ លេចធ្លោកាន់តែខ្លាំង ក្រោមការដឹកនាំរបស់លោក Pep Guardiola ឆ្នាំ ២០០៨ ដល់ ២០១២ ដោយឈ្នះពានរង្វាន់ជាច្រើនជាមួយគ្នា។ តាមពិតនៅឆ្នាំ ២០២០ Messi ត្រូវបានផ្សារភ្ជាប់យ៉ាងខ្លាំងនឹងការផ្លាស់ទៅចូលរួមជាមួយMan City ប៉ុន្តែអ្វីៗមិនដំណើរការដូចផែនការនោះទេ។ ហើយជាលទ្ធផលប្រធានក្រុមអាហ្សង់ទីនរូបនេះ សម្រេចផា្លស់ទៅចូលរួមជាមួយក្លិប PSG កាលពីឆ្នាំ ២០២១ ពោលមុនពេលម្ចាស់ជើងឯកពានរង្វាន់ World Cup ឆ្នាំ ២០២២ នៅប្រទេសកាតា៕