ប្រទេសអារ៉ាប៊ីសាអូឌីត ៖ កីឡាករបាល់ទាត់ឆ្នើម Cristiano Ronaldo ដែលជាប់ជាអត្តពលិករកចំណូលបានច្រើនជាងគេនៅលើពិភពលោកនោះ កាលពីពេលថ្មីៗនេះ ទើបតែជះលុយទិញយន្តហោះឯកជនដ៏ប្រណីត១គ្រឿង ដែលត្រូវបានរាយការណ៍ថាមានតម្លៃរហូតដល់ ៧៣លានដុល្លារអាមេរិក។

ប្រភពពីសារព័ត៌មានរបស់អារ៉ាប៊ីសាអូឌីត Al Arabiya បានឱ្យដឹងថា យន្តហោះឯកជនថ្មីថ្មោងរបស់កំពូលខ្សែប្រយុទ្ធ Cristiano Ronaldo ម៉ូដែល Gulfstream G650 រចនាដ៏អស្ចារ្យជាមួយល្បឿនលឿនពិសេស និងរត់ចម្ងាយបាន ១៣,៨៩០គីឡូម៉ែត្រ ហើយបច្ចប្បន្នម៉ូដែលនេះ កំពុងស្ថិតក្នុងចំណោមយន្តហោះល្បឿនលឿនបំផុតលើពិភពលោក។ យន្តហោះឯកជនដ៏ប្រណីតនេះទំនើបខ្លាំង ដោយកាប៊ីនមួយមានកន្លែងស្នាក់នៅបីផ្សេងគ្នា ហើយអាចផ្ទុកអ្នកដំណើរបានដល់១៩នាក់។

យន្តហោះឯកជនដ៏ប្រណីតរបស់ប្រធានក្រុមជម្រើសជាតិព័រទុយហ្កាល់វ័យ៣៩ឆ្នាំរូបនេះ មានលក្ខណៈពិសេសប្លែកពីគេ ដោយតួយន្តហោះធ្វើពីលោហធាតុភ្លឺចាំង រំលេចអក្សរ CR7 រួមជាមួយរូបភាពរបស់ខ្សែប្រយុទ្ធឆ្នើមក្រុម Al Nassr រូបនេះ កាន់តែទាក់ទាញខ្លាំងថែមទៀត។ តាមរបាយការណ៍របស់កាសែត The Sun បានឱ្យដឹងថា Cristiano Ronaldo ​ពីមុនគឺជាម្ចាស់យន្តហោះម៉ូដែល Gulfstream G200 ហើយត្រូវបានរាយការណ៍ថាបានលក់ ដើម្បីទិញម៉ូដែលដ៏ទំនើប Gulfstream G650 ។

គួរបញ្ជាក់ថា​ Cristiano Ronaldo ​បានឈរនៅលើកំពូលតារាងរបស់ទស្សនា Forbes នៃបញ្ជីអត្តពលិករកចំណូលបានច្រើនបំផុតសម្រាប់ឆ្នាំ ២០២៤ ដោយរកបានរហូតដល់ ២៨៥លានដុល្លារអាមេរិក។ មិនត្រឹមតែប៉ុណ្ណោះ អតីតខ្សែប្រយុទ្ធឆ្នើមក្រុម Sporting Lisbon Manchester United Real Madrid និង Juventus រូបនេះ ក្រៅពីជាកីឡាករមានថ្លៃពលកម្មខ្ពស់បំផុតលើពិភពលោកនាពេលបច្ចុប្បន្ន ២០០លានអឺរ៉ូជាមួយក្លិប Al Nassr ហើយនោះ Ronaldo ​ក៏ជាបុគ្គលមានឥទ្ធិពលបំផុតលើបណ្តាញទំនាក់ទំនងសង្គមផងដែរ ដោយកាលពីខែកញ្ញាកន្លងទៅ រូបគេគឺជាបុគ្គល​ដំបូង​គេ​លើ​លោក​មាន​អ្នក​តាមដាន​លើ​ប្រព័ន្ធ​ផ្សព្វផ្សាយ​សង្គមរួមមាន Instagram Facebook X YouTube Kuaishou និង Weibo រហូតដល់​១​ពាន់​លាន​នាក់៕