អ្នកស្រុកចូលរួមធ្វើខ្លែងឯកត្រៀមសម្រាប់ព្រឹត្តិ ការណ៍បង្ហោះខ្លែងនៅសៀមរាប
- សៀមរាប
ខេត្តសៀមរាប ៖ បុរសឈ្មោះអ៊ូច វ៉ា វ័យ ៧៦ឆ្នាំ រស់នៅភូមិដំដែកលើ ឃុំដំដែក ស្រុកសូទ្រនិគម ខេត្តសៀមរាប…
ខេត្តសៀមរាប ៖ បុរសឈ្មោះអ៊ូច វ៉ា វ័យ ៧៦ឆ្នាំ រស់នៅភូមិដំដែកលើ ឃុំដំដែក ស្រុកសូទ្រនិគម ខេត្តសៀមរាប បានស្ម័គ្រចិត្តចូលរួម ផលិតខ្លែងឯកសម្រាប់ព្រឹត្តិការណ៍បង្ហោះក្លែងឯក ។ ព្រឹត្តិការណ៍នេះចាប់ពីថ្ងៃទី២៧ ដល់ទី២៩ ខែធ្នូ ឆ្នាំ២០២៤ ស្ថិតនៅក្នុងបរិវេណព្រលានយន្តហោះចាស់ក្នុងភូមិគោកដូង សង្កាត់ ទឹកវិល ក្រុងសៀមរាប ។
ថ្មីៗកន្លងមកលោកអ៊ូច វ៉ា ឱ្យដឹងថា ការធ្វើខ្លែងឯកមានគ្នាចំនួន៤នាក់ មកពីស្រុកសូទ្រនិគម ស្រុកបន្ទាយស្រី ក្រុងរុនតាឯក និងស្រុកប្រាសាទបាគង ។ គាត់ថា«មិនមែនស្រួលដូចគេនិយាយទេបងប្អូន ។ ខ្លែងឯកមួយ យើងធ្វើឡើងក្នុង រយៈពេល៣ទៅ៤ថ្ងៃ ទើបរួចរាល់» ។
បុរសដដែលរៀបរាប់ថា ខ្លែងឯកធ្វើឡើងដោយយកឫស្សីមកបិតឱ្យតូចល្មម ,បាយម៉ាន និងក្រណាត់ ។ មានគ្រឿងទាំងនេះហើយយកមកបិទភ្ជាប់ជាមួយគ្នា និងតខ្សែឱ្យវែង ទើបយកទៅបង្ហោះ ។
អ្នកស្រីម៉ន មុន្នីរួត អាយុ៥៨ឆ្នាំ បានចូលរួមជួយធ្វើខ្លែងជូនកូនសិស្ស និងក្រុមយុវជនស្ម័គ្រចិត្តស.ស.យ.ក.ដើម្បីត្រៀមចូលរួមក្នុងព្រឹត្តិការណ៍បង្ហោះខ្លែងឯក ។ អ្នកស្រីចេះបិតឫស្សីមកពីលោកតាឈ្មោះអ៊ូច វ៉ា វ័យ៧៦ឆ្នាំ រស់នៅភូមិដំដែកលើ ឃុំដំដែក ។
រដ្ឋបាលខេត្តសៀមរាប បានសហការជាមួយមន្ទីរវប្បធម៌ និងវិចិត្រសិល្បៈខេត្ត ត្រៀមរៀបចំព្រឹត្តិការណ៍បុណ្យបង្ហោះខ្លែងឯក និងក្លែងសេរី ហៅក្លែងស្វ័យរិន នៅព្រលានយន្តហោះខេត្តសៀមរាបចាស់ ដែលនឹងប្រព្រឹត្តទៅចាប់ពីថ្ងៃទី២៧ ដល់ទី២៩ ខែធ្នូនេះ ។
រដ្ឋបាលខេត្តសៀមរាបរៀបចំពិធីបុណ្យបង្ហោះខ្លែងឯកនេះឡើង ក្នុងគោលបំណងធ្វើការផ្សព្វផ្សាយអំពីប្រវត្តិខ្លែងឯកខ្មែរយើង ដែលដូនតាបានចារឹកនៅតាមប្រាង្គប្រាសាទ និងរក្សានូវទំនៀមទម្លាប់ប្រពៃណីវប្បធម៌ អរិយធម៌របស់ដូនតាខ្មែរ ។
លោកមួន សុភាព ប្រធានមន្ទីរវប្បធម៌ និងវិចិត្រសិល្បៈខេត្តសៀមរាប ឱ្យដឹងអំពីប្រវត្តិនៃការបង្ហោះខ្លែង គឺជាទំនៀមទម្លាប់ប្រពៃណីរបស់ជនជាតិខ្មែរយើងតាំងពីសម័យនគរភ្នំមកម៉្លេះ ។ ខ្លែង គឺជាវត្ថុលេងម្យ៉ាងដែលអាចហោះបានដោយសារកម្លាំងខ្យល់ទាញយឹតតាមរយៈខ្សែដែលគេចង់ភ្ជាប់នឹងតួរបស់វា ។ ក្រៅពីត្រូវបានប្រើសម្រាប់លេងកម្សាន្ត វាក៏ជាសិល្បៈមួយប្រភេទក្នុងវប្បធម៌របស់ជនជាតិខ្មែរទៀតផង ។
ភាគច្រើនគេតែងបង្ហោះខ្លែងឯកលេងកម្សាន្តក្នុងរដូវលំហើយ ចាប់ផ្ដើមរាប់ពីថ្ងៃពាក់កណ្ដាលខែកញ្ញា ដល់ពាក់កណ្ដាលខែធ្នូ ហើយពេលខ្លះខ្មែរយើងលេងបន្តរហូតដល់រដូវបន្ទាប់ទៀត គឺសិសិររដូវ ។
ពិធីបង្ហោះខ្លែងឯក និងខ្លែងសេរី នៅខេត្តសៀមរាបមានកម្មវិធីដង្ហែក្បួនខ្លែងឯក ខ្លែងសេរី និងតុក្តាយក្ស ព្រមទាំងនៅពេលរាត្រីមានការសម្តែងសិល្បៈល្ខោនបាសាក់ និងការតាំងពិព័រណ៍ ការបង្ហាញពីរបៀបធ្វើខ្លែងឯកផង ដែរ ៕
ចែករំលែកព័តមាននេះ