រាជធានីភ្នំពេញ ៖ ត្រីនៅតាមព្រែក ស្ទឹង បឹងបួរ ឆ្នាំនេះ សំបូរគួរឲ្យកត់សម្គាល់ ខណៈពេលដែលទឹកឆ្នាំនេះធំ ហើយត្រូវបានប្រជានេសាទប្រើឧបករណ៍ផ្សេងៗចាប់យកទៅលក់នៅតាមទីផ្សារនានា និងនាំមកលក់ចែកចាយនៅមណ្ឌលបែងចែកផលនេសាទនានានៅរាជធានីភ្នំពេញ…
រាជធានីភ្នំពេញ ៖ ត្រីនៅតាមព្រែក ស្ទឹង បឹងបួរ ឆ្នាំនេះ សំបូរគួរឲ្យកត់សម្គាល់ ខណៈពេលដែលទឹកឆ្នាំនេះធំ ហើយត្រូវបានប្រជានេសាទប្រើឧបករណ៍ផ្សេងៗចាប់យកទៅលក់នៅតាមទីផ្សារនានា និងនាំមកលក់ចែកចាយនៅមណ្ឌលបែងចែកផលនេសាទនានានៅរាជធានីភ្នំពេញ ដើម្បីចែកចាយបន្តនៅទីផ្សារនានា។
ដោយឡែក ត្រីដែលចុះតាមទន្លេសាបរហូតមកដល់ថ្ងៃសុក្រ ៦កើត ខែមិគសិរ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី៦ ខែធ្នូ ឆ្នាំ២០២៤នេះ ត្រីមិនទាន់ត្រូវនៅឡើយ (មិនទាន់ចុះ) ខណៈពេលដែលប្រជានេសាទបានត្រៀមឧបករណ៍ផ្សេងៗនៅតាមដងទន្លេ ដើម្បីចាប់ត្រីធ្វើផ្អកប្រហុកនៅរដូវត្រីត្រូវ ។
នៅព្រឹកថ្ងៃទី៥ ខែធ្នូ ឆ្នាំ២០២៤ កោះសន្តិភាពក៏បានចុះផ្ទាល់ដល់មណ្ឌលបែងចែកផលនេសាទនៅគីឡូម៉ែត្រលេខ៩ ហើយសង្កេតឃើញថា ត្រីទន្លេឆ្នាំនេះសំបូរគួរឲ្យកត់សម្គាល់ ។ តាមអាជីវករបោះដុំម្នាក់បានឲ្យកោះសន្តិភាពដឹងថា រយៈពេល៣ថ្ងៃមកហើយ ត្រីចាប់ផ្ដើមសម្បូរបណ្តើរៗហើយ គាត់បានប្រមូលទិញពីអ្នកនេសាទដែលធ្វើនេសាទនៅតាមព្រែក ស្ទឹងបឹងបួរនៅតំបន់ជុំវិញបឹងទន្លេសាប ហើយនាំមកលក់ចែកចាយនៅយឿត្រីគីឡូម៉ែត្រលេខ៩នេះ ។
អាជីវកររូបនោះបានឲ្យដឹងទៀតថា ត្រីដែលគាត់នាំយកមកលក់ជាត្រីលេខ២ គឺត្រីតូចៗដូចជាត្រីកេះមួយគីឡូ២ម៉ឺនរៀលទៅ៤ម៉ឺនរៀលទៅតាមប្រភេទត្រី ។ ដោយឡែក ត្រីឆ្ពិន,ត្រីប្រមា,ត្រីរៀល គឺលក់ក្នុងមួយគីឡូ៦ទៅ៨ពាន់រៀលតែប៉ុណ្ណោះ ។
តាមអាជីវករលក់ដូរនៅតាមរោងចក្រម្នាក់បានឲ្យដឹងថា ជារៀងរាល់ថ្ងៃ គាត់តែងតែមកទិញត្រីនៅមណ្ឌលបែងចែកផលនេសាទគីឡូម៉ែត្រលេខ៩នេះ ដើម្បីយកទៅលក់នៅតាមរោងចក្រនៅម្ដុំទួលពង្រ ។ នៅព្រឹកនោះដែរ គេឃើញអាជីវករជាច្រើនបានជិះរ៉ឺម៉កមកចតត្រៀបត្រានៅក្នុងយឿត្រីគីឡូម៉ែលេខ៩ ហើយទិញត្រីចងជាចង្កោមៗយកទៅលក់នៅតាមរោងចក្រនានានៅក្នុងរាជធានីភ្នំពេញ ។
លោកទូច គង់ម្ចាស់ មណ្ឌលចែកចាយផលនេសាទនៅគីឡូម៉ែលេខ៩បានឲ្យដឹងថា រហូតមកដល់ថ្ងៃនេះហើយត្រីទន្លេមិនទាន់ត្រូវនៅឡើយ ។ ហើយត្រីដែលនាំមកលក់ចែកចាយនៅក្នុងយឿត្រីរបស់គាត់ភាគជាត្រីចិញ្ចឹមនៅតាមស្រះ និងមួយចំនួនជាត្រីទន្លេ ។
លោកទូច គង់ ក៏បានបញ្ជាក់ឲ្យដឹងទៀតថា ៩០ភាគរយជាត្រីស្រះដែរលក់សល់ពេលយប់ពីផ្សារត្រីនៅព្រែកព្នៅ ហើយព្រឹកឡើងនាំយកមកលក់នៅយឿត្រីរបស់គាត់នៅគីឡូម៉ែត្រលេខ៩នេះ ។ មណ្ឌលបែងចែកផលនេសាទគីឡូម៉ែត៩នេះ ជាទីផ្សារលក់រាយត្រីចែកចាយទៅលក់បន្តនៅក្នុងរាជធានីភ្នំពេញមិនមែនលក់បោះដុំត្រីនៅតាមរាជធានីខេត្តដូចផ្សារត្រីព្រែកព្នៅនោះឡើយ។
ទោះបីត្រីទន្លេនៅតាមផ្សារសំបូរគួរឲ្យកត់សម្គាល់យ៉ាងណា អាជីវករលក់ត្រីអះអាងថា ត្រីទាំងនោះជាត្រីដែលចុះនៅតាមព្រែក ស្ទឹងបឹង បួរដែលប្រជានេសាទបានហើយយកមកលក់ចែកចាយបន្ត។ ចំណែកត្រីចុះនៅតាមទន្លេសាបមិនទាន់ត្រូវនៅឡើយ ៕
ចែករំលែកព័តមាននេះ