អ្នកនិយមប្រើប្រាស់បណ្ដាញសង្គមនៅជុំវិញពិភពលោក បាន និងកំពុងផ្ទុះការភ្ញាក់ផ្អើល និងមានការចាប់អារម្មណ៍យ៉ាងខ្លាំងទៅលើរឿងសណ្ឋាគារ Sanwa Hotel នៅក្នុងទីក្រុង Kobe ប្រទេសជប៉ុន ដោយសារតែបន្ទប់ស្នាក់នៅនៃសណ្ធាគារនេះមានតម្លៃថោកខ្លាំងស្ទើរមិនគួរឲ្យជឿ…
អ្នកនិយមប្រើប្រាស់បណ្ដាញសង្គមនៅជុំវិញពិភពលោក បាន និងកំពុងផ្ទុះការភ្ញាក់ផ្អើល និងមានការចាប់អារម្មណ៍យ៉ាងខ្លាំងទៅលើរឿងសណ្ឋាគារ Sanwa Hotel នៅក្នុងទីក្រុង Kobe ប្រទេសជប៉ុន ដោយសារតែបន្ទប់ស្នាក់នៅនៃសណ្ធាគារនេះមានតម្លៃថោកខ្លាំងស្ទើរមិនគួរឲ្យជឿ ពោល គឺត្រឹមតែ១១០០យេន ស្មើនិង9.60$ ប៉ុណ្ណោះក្នុងមួយយប់ ។ នេះបើយោងតាមការចុះផ្សាយរបស់គេហទំព័រសារព័ត៌មានឈ្មោះ 8days កាលពីថ្ងៃទី២៨ ខែ វិច្ឆិកា ឆ្នាំ២០២៤ កន្លងទៅថ្មីៗនេះ ។
ប្រភពខាងលើបានឲ្យដឹងបន្តថា ខណៈព័ត៌មានត្រូវបានចែកចាយច្រើននៅលើប្រព័ន្ធផ្សព្វផ្សាយសង្គម ស្រាប់តែមានបុរសម្នាក់ដែលជាអ្នក review សណ្ឋាគារនានានៅជុំវិញពិភពលោក បានចេញមកទម្លាយបទពិសោធរបស់លោកក្នុងការស្នាក់នៅសណ្ឋាគារនោះ ក្រោយឃើញការផ្សព្វផ្សាយពីតម្លៃដ៏ធូរថ្លៃបំផុតនេះ ។
បើយោងតាមការរៀបរាប់ពីបុរសរូបនោះដំបូងឡើយលោកគិតថា ខ្លួនឯងសំណាងដែលជួលបានសណ្ឋាគារដែលមានតម្លៃថោកខ្លាំងបែបនេះ ប៉ុន្តែក្តីរំពឹងរបស់លោកប្រែទៅជាបទពិសោធគួរឱ្យខ្លាចព្រឺរោម ក្រោយពីបានធ្វើដំណើរទៅដល់ទីតាំងបន្ទប់នៃសណ្ធាគារ ។
តាមការបញ្ជាក់ បុរសខាងលើបាននិយាយថា ពេលដើរចូលទៅដល់ភ្លាមវាប្រៀបដូចជា ក្នុងរឿងបែបរន្ធត់ព្រឺព្រួចតក់ស្លុតអ៊ីចឹង ដោយសារសណ្ឋាគារមានសភាពចាស់ខ្លាំងគ្រប់កន្លែងប្រៀបដូចជា អគារដែលត្រូវបានគេបោះបង់ចោលរាប់សិបឆ្នាំអញ្ចឹង ។
ងាកមកចាប់អារម្មណ៍ទៅលើបន្ទប់ស្នាក់នៅវិញទ្វារបើកចេញចូល គឺមិនមានសោចាក់ដូចបន្ទប់សណ្ឋាគារទូទៅឡើយ ពោល គឺប្រើខ្សែជ័រយកមកចងតែប៉ុណ្ណោះ ។ ហើយបើចង់ចូល គឺត្រូវយកកន្ត្រៃមកកាត់ខ្សែនោះចេញទើបអាចចូលបាន ។ កាន់ តែរន្ធត់ និងគួរឲ្យរអើមទៀតនោះ ស្ថានភាពក្នុងបន្ទប់ពេលបើកទ្វារចូលទៅ គឺនិយាយលែងចេញតែម្តង់ បន្ទប់មានសភាពតូចចង្អៀតជញ្ជាំងចាស់ខ្លាំងរហូតប្រែទៅជាពណ៌លឿងប្រឡាក់មិនសមជាបន្ទប់មានមនុស្សស្នាក់នៅឡើយ រីឯគ្រែគេង តុទូវិញ គឺរឹតតែយ៉ាប់ថែមទៀត ។ បើនិយាយពីបន្ទប់ទឹកនៃសណ្ឋាគារនេះវិញ គឺកាន់តែព្រឺព្រួច និងគួរឱ្យខ្លាចជាងគេបំផុត ពោលគគ្រិចក៏គគ្រិច រីឯក្លិនឆ្អេះភាយចេញមកក្រៅដែលធ្វើឲ្យមនុស្សធម្មតាពិបាក និងចូលតែម្ដង ។
សរុប ជារួមស្ថានភាពបន្ទប់ស្នាក់នៅបន្ទប់ទឹក គ្រែគេង ទ្វារ ចេញចូល កាំជណ្ដើរដើរឡើងចុះនៃសណ្ធាគារមួយនេះ គឺគ្មានចំណុចណាមួយដែលល្អប្រសើរឡើយ ។ តែយ៉ាងណាក្ដី ស្ថិតក្នុងស្ថានភាពដែលពិបាកទទួលយកនេះមែនពិត ប៉ុន្តែបុរស review សណ្ឋាគារជុំវិញពិភពលោករូបនោះ គឺនៅតែប្រមូលភាពក្លាហានស្នាក់នៅទីនោះមួយយប់ និងថែមទាំងបញ្ជាក់ទៀតថា ការស្នាក់នៅរបស់លោកមិនមានជួបប្រទះរឿងរន្ធត់ ឬការលងបន្លាចអ្វីនោះឡើយ ត្បិតសណ្ធាគារនេះគួរឲ្យខ្លាចក៏ពិតមែន ។
យ៉ាងណាមិញ បើដូចតាមការរៀបរាប់របស់បុរសអ្នក review សណ្ឋាគារនានានៅជុំវិញពិភពលោកដែលនិយាយអំពីសណ្ឋាគារ Sanwa Hotel នៅក្នុងទីក្រុង Kobe ប្រទេសជប៉ុន ប្រាកដជា គ្មានថ្ងៃមាននរណាចូលស្នាក់នៅនោះឡើយ បើទោះបីជាមានការបញ្ជាក់ពីបុរសរូបនេះថា ការស្នាក់នៅគ្មានជួបរឿងរន្ធត់ ឬលងបន្លាចក្ដី ។
សូមបញ្ជាក់ផងដែរថា តាមការ review នៅលើ Google សណ្ឋាគារ Sanwa Hotel គឺត្រូវបានគេចាត់ទុកជា «សណ្ឋាគារដ៏អាក្រក់បំផុតក្នុងប្រទេសជប៉ុន» តែយ៉ាងណាសណ្ឋាគារមួយនេះ ក៏នៅតែមានមនុស្សរស់នៅក្នុងរយៈពេលយូរផងដែរ ។ បន្ទាប់ពីបានស្ដាប់រឿងរ៉ាវក៏ដូចជា ស្ថានភាពនៃសណ្ឋាគារ Sanwa Hotel របស់ប្រទេសជប៉ុននេះរួច តើប្រិយមិត្តយល់ឃើញយ៉ាងដែរ ហើយស្ថិតក្នុងតម្លៃថោកសមរម្យបែបនេះ តើមានចិត្តចង់សាកល្បងទៅលេងប្រទេសជប៉ុន និងឈៀងចូលទៅស្នាក់លេងមួយយប់ដែរឬអត់ ៕ អត្ថបទ៖ រៀម រ៉ាន់
ចែករំលែកព័តមាននេះ