ទីក្រុងវ៉ាស៊ីនតោន៖ ក្រោយការផ្លោងវោហារសាស្ត្រដាក់គ្នាពាក់ព័ន្ធនឹងអាវនុយក្លេអ៊ែរ មន្ត្រីជាន់ខ្ពស់អាមេរិកយល់ថានៅពេលនេះ រុស្ស៊ីមិនទាន់លេងដៃធ្ងន់ដល់ថ្នាក់ប្រើអាវុធនេះទេ។ ត្រឹមតែអាមេរិកអនុញ្ញាតឱ្យអ៊ុយក្រែនបាញ់មីស៊ីលឆ្ងាយៗចូលទឹកដីរុស្ស៊ី មិនទាន់ដល់ថ្នាក់រុស្ស៊ីមានលេសប្រើអាវុធនេះឡើយ។ នេះបើយោងតាមប្រភពស៊ើបការណ៍សម្ងាត់អាមេរិក។
ទោះជាមិនទាន់ប្រើនុយក្លេអ៊ែរ ប៉ុន្តែរុស្ស៊ីអាចនឹងបើយុទ្ធនាការធ្វើវិច្ឆេទកម្មនយោបាយប្រឆាំងនឹងពួកអឺរ៉ុបដើម្បីព្យាយាមដាក់សម្ពាធទៅលើក្រុមបស្ចិមប្រទេសដែលនៅតែបន្តជួយឧបត្ថម្ភ-គាំទ្រអ៊ុយក្រែន។ ខាងលើនេះជាអ្វីដែលមន្ត្រីជាន់ខ្ពស់អាមេរិក២រូប រួមទាំងអ្នកតំណាងរាស្ត្រអាមេរិក និងជំនួយការសភាអាមេរិកបានឡើងរាយការណ៍អំពីបញ្ហានេះ។
ភ្នាក់ងារស៊ើបការណ៍សម្ងាត់អាមេរិកវាយតម្លៃទៅលើសភាពការណ៍រយៈពេល៧ខែចុងក្រោយ ហើយសន្និដ្ឋានថាសង្គ្រាមនុយក្លេអ៊ែរមិនអាចផ្ទុះឡើងដោយគ្រាន់តែអាមេរិកឱ្យអ៊ុយក្រែនបាញ់មីស៊ីលចូលទឹកដីរុស្ស៊ីនោះទេ។ សភាពការណ៍គ្មានអ្វីប្រែប្រួលឡើយ ហើយនៅដូចដើមទាំងអស់ចាប់តាំងពីលោកបៃដិនផ្លាស់ប្ដូរជំហរដើម្បីឱ្យអ៊ុយក្រែនបាញ់មីស៊ីលដាក់រុស្ស៊ី។
ប្រភពដែលស្នើសុំមិនបញ្ចេញឈ្មោះបង្ហើបឱ្យដឹងថាការវាយតម្លៃនេះពិតជាត្រឹមត្រូវ។ ជាក់ស្ដែងនៅពេលអ៊ុយក្រែនប្រើប្រាស់មីស៊ីលម៉ាកអាត់តាខំ (ATACMS) រុស្ស៊ីមិនបានបញ្ចេញនុយក្លេអ៊ែរយកមកប្រើទេ។ ក្រោយមក រុស្ស៊ីបាញ់មីស៊ីលលឿនជាងសំឡេងម៉ាកអូរេស្នីក (Oreshnik) ចូលទីក្រុងឌីនីប្រូ (Dnipro) ដើម្បីសងសឹក។ អ្នកវិភាគយល់ថានោះជាការព្រមានរបស់រុស្ស៊ីដើម្បីកុំឱ្យអាមេរិក និងអឺរ៉ុបធ្វើខ្លាំងដៃពេក។ ប៉ុន្តែរុស្ស៊ីនៅតែមិនទាន់បញ្ចេញនុយក្លេអ៊ែរយកមកប្រើប្រាស់ដដែល។
តាមពិត លោកបៃដិនបន្ធូរដៃឱ្យអ៊ុយក្រែនបាញ់មីស៊ីលឆ្ងាយៗចូលទឹកដីរុស្ស៊ីនោះហាក់ដូចជាយឺតពេលបន្តិចទៅហើយ។ រហូតដល់ជិតចប់អាណត្តិទើបលោកហ៊ានអនុវត្តវិធីនេះ។ ម៉្យាងទៀត លោកក៏ធ្វើឡើងទាំងប្រថុយប្រថានផងដែរព្រោះខ្លាចអំណាចរបស់លោកពូទីន ក្រែងលោលោកពូទីនផ្ទុះកំហឹង និងទ្រាំមិនបាន ពន្លះអ៊ុយក្រែន១ប្រាវដោយនុយក្លេអ៊ែរខ្នាតតូច។
កាលពីមុននេះ មន្ត្រីរដ្ឋាភិបាលអាមេរិកមានអារម្មណ៍ផ្អែមមាត់មិនតិចទេទាំងមន្ត្រីនៅសេតវិមាន, មន្ទីរបញ្ចកោណ និងក្រសួងការបរទេស។ ពួកគេបារម្ភថារុស្ស៊ីអាចនឹងវាយបកវិញដោយវាយប្រហារបុគ្គលិកយោធា, បុគ្គលិកទូត និងអង្គការណាតូ។
ប៉ុន្តែលោកបៃដិនប្រហែលជាទ្រាំលែងបានតទៅទៀត ហើយសុខចិត្តប្រថុយនឹងគ្រោះថ្នាក់បន្ទាប់ពីរុស្ស៊ីដាក់ផែនការវាយបណ្ដេញកងទ័ពអ៊ុយក្រែនឱ្យអស់ពីតំបន់ខឺសមុនពេលលោកត្រាំស្បថចូលកាន់តំណែង។ ប្រភពខ្លះបង្ហើបឱ្យដឹងថាក្រុមបស្ចិមប្រទេសចង់ឱ្យអ៊ុយក្រែនកាន់កាប់តំបន់នេះជាបន្តទៀតដើម្បីមានទម្ងន់នៅក្នុងការចរចាគ្នា។ រុស្ស៊ីបានហៅកងទ័ពកូរ៉េខាងជើងជាង១ម៉ឺននាក់ទៅជួយច្បាំងនៅខឺសថែមទៀត។ ម៉្លោះហើយ លោកបៃដិនត្រូវតែធ្វើអ្វីម៉្យាងដើម្បីឱ្យមានតុល្យភាពគ្នា៕
ចែករំលែកព័តមាននេះ