ខេត្តព្រៃវែង ៖ រថយន្តចំនួន៤គ្រឿង បានបុករះបន្តកន្ទុយគ្នា នៅលើកំណាត់ផ្លូវជាតិលេខ១ ដោយសារតែការបើកបរធ្វេសប្រហែសខ្វះការប្រុងប្រយ័ត្ន ប៉ុន្តែសំណាងល្អ ពុំបានបណ្ដាលឱ្យនរណាម្នាក់រងរបួសឡើយ ។ គ្រោះថ្នាក់ចរាចរណ៍នេះ…
ខេត្តព្រៃវែង ៖ រថយន្តចំនួន៤គ្រឿង បានបុករះបន្តកន្ទុយគ្នា នៅលើកំណាត់ផ្លូវជាតិលេខ១ ដោយសារតែការបើកបរធ្វេសប្រហែសខ្វះការប្រុងប្រយ័ត្ន ប៉ុន្តែសំណាងល្អ ពុំបានបណ្ដាលឱ្យនរណាម្នាក់រងរបួសឡើយ ។
គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ២រសៀល ថ្ងៃទី២៨ ខែវិច្ឆិកា ឆ្នាំ២០២៤នេះ នៅលើកំណត់ផ្លូវជាតិលេខ១ ត្រង់ចំណុចភូមិស្ទឹងស្លូត ឃុំអ្នកលឿង ស្រុកពាមរក៍ ខេត្តព្រៃវែង ។
យោងតាមសាក្សីនៅកន្លែងកើតហេតុ បានឲ្យដឹងថា មុនពេលមានករណីបុករះ បន្តកន្ទុយគ្នានេះ មានរថយន្តជាច្រើនគ្រឿង ដែលបើកមកក្នុងទិសដៅពីកើតទៅលិច បានកកស្ទះ និងឈប់បន្តកន្ទុយគ្នារាប់សិបគ្រឿង លុះបន្តិចក្រោយមក ស្រាប់តែមានរថយន្តសណ្ដោងធុងក្រឡុកស៊ីម៉ង់ត៍ មួយគ្រឿង បើកមកក្នុងល្បឿនយ៉ាងលឿន បានជ្រុលទៅបុកគូទរថយន្តដឹកទំនិញរបស់ក្រុមហ៊ុន វីរៈ ប៊ុនថាំ យ៉ាងពេញទំហឹង ធ្វើឲ្យរថយន្តនោះ ជ្រុលទៅបុកគូថរថយន្តសាំយ៉ុង ដែលនៅខាងមុខ ហើយរថយន្តសាំយ៉ុងនោះ ក៏បន្តជ្រុលទៅបុករថយន្ត ford មួយគ្រឿងទៀតដែលនៅខាងមុខដែរ គឺបុករុញ តគ្នាចំនួន ៤គ្រឿង តែម្ដង ។
ក្រោយកើតហេតុ អ្នកបើកបររថយន្តដឹកស៊ីម៉ង់ត៍ ដឹងថាខ្លួនជាអ្នកខុស ក៏បានចុះរត់គេចខ្លួនបាត់ បន្សល់ទុកតែរថយន្ត នៅលើផ្លូវ ព្រមទាំងរថយន្ត ៣គ្រឿងផ្សេងទៀត នៅឈប់ពេញផ្លូវរង់ចាំ ឱ្យសមត្ថកិច្ចទៅអន្តរាគមន៍ ។
សាក្សីបានបញ្ជាក់ថា ដោយសារតែរថយន្តទាំង៤គ្រឿង នៅឈប់ចំកណ្ដាលផ្លូវ ហើយសមត្ថកិច្ចមិនងាយទៅដល់ បានធ្វើអោយរថយន្តផ្សេងៗទៀតរាប់រយគ្រឿង បានកកស្ទះបន្តកន្ទុយគ្នា ប្រមាណជាង ១គីឡូដី ហើយដោយមើលឃើញស្ថានភាពបែបនេះ ម្ចាស់រថយន្តហ្វត ដែលនៅខាងមុខគេ ក៏បានសុខចិត្ត បើករថយន្តរបស់ខ្លួន យកទៅជួសជុលដោយខ្លួនឯង ដោយមិននៅរង់ចាំទាមទារសំណរនោះទេ ។
ទោះជាយ៉ាងណាក៏ដោយ ការធ្វើចរាចរណ៍នៅលើទីតាំងនេះ គឺនៅតែមានការកកស្ទះ រហូតដល់សមត្ថកិច្ចចុះទៅដល់ អូសយករថយន្តទាំង៣គ្រឿង ចេញពីលើដងផ្លូវ និងជួយសម្រួលចរាចរណ៍ អស់រយៈពេលជាងមួយម៉ោង ទើបចរាចរណ៍បានប្រសើរឡើងវិញ ៕
ចែករំលែកព័តមាននេះ