រាជធានីភ្នំពេញ ៖ ថ្លែងក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៤ និងលើកទិសដៅការងារបន្តរបស់ក្រសួងរៀបចំដែនដី នគរូបនីយកម្ម និងសំណង់ កាលពីរសៀលថ្ងៃទី២៦ ខែវិច្ឆិកា ឆ្នាំ២០២៤ សម្តេចបវរធិបតីហ៊ុន…
រាជធានីភ្នំពេញ ៖ ថ្លែងក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៤ និងលើកទិសដៅការងារបន្តរបស់ក្រសួងរៀបចំដែនដី នគរូបនីយកម្ម និងសំណង់ កាលពីរសៀលថ្ងៃទី២៦ ខែវិច្ឆិកា ឆ្នាំ២០២៤ សម្តេចបវរធិបតីហ៊ុន ម៉ាណែត នាយករដ្ឋមន្ត្រី បានបញ្ជាក់ថា ទំនាស់ដីធ្លីគឺជារឿងចាស់ដែលមានពីមុនមក ប៉ុន្តែវិវាទបុរីគឺជារឿងថ្មី ដែលប្រវត្តិសាស្ត្រមិនដែលមានក្នុងទ្រង់ ទ្រាយធំបែបនេះ ខណៈបញ្ហានេះ គឺជាបញ្ហាដែលរសើបបំផុត ទាមទារឱ្យដោះស្រាយ ដោយមានភាពបត់បែន យោគយល់គ្នា និងភាពអំណត់ ។
សម្តេចបវរធិបតី ហ៊ុន ម៉ាណែត បានថ្លែងទៀតថា កាលពីឆ្នាំ១៩៩៧ ខ្ញុំចាំ ពេលដែលមានវិបត្តិហិរញ្ញវត្ថុនៅអាស៊ីអាគ្នេយ៍ និងវិបត្តិអចលនទ្រព្យនៅប្រទេសថៃ កម្ពុជាអត់មានបញ្ហាទេ ព្រោះកាលនោះ ការទិញ-លក់អចលនទ្រព្យអត់មានច្រើនទេ ។ ប្រាកដណាស់ ពីដើមអាណត្តិ មានជនជាតិផ្សេងគេមកវិនិយោគទិញ-លក់ ប៉ុន្តែខ្មែរយើងមិនទាន់មាន ហើយទិញពេលនោះគឺអត់មានទិញដោយខ្ចីធនាគារទេ ។ ពេលនោះភាគច្រើនប្រើលុយសុទ្ធ ។ អីុចឹងវិបត្តិអីវិបត្តិទៅ អត់មានបញ្ហាប៉ុន្មានទេ ហើយយើងក៏មិនប៉ះពាល់ច្រើន ប៉ុន្តែលើកនេះគឺមានទំហំធំ ។
សម្តេចធិបតី បានមើលឃើញថា ដោយសារបញ្ហាកូវីដ-១៩ ដែលមិនអាចប៉ាន់ស្មានជាមុនបាននេះហើយ ទើបធ្វើឱ្យស្ថានភាពនៃវិស័យអចលនទ្រព្យ មានការធ្លាក់ចុះយ៉ាងខ្លាំង នាំឱ្យម្ចាស់គម្រោងបុរីមួយចំនួន ដែលកំពុងចាប់យកឱកាសវិនិយោគលើវិស័យនេះជួបវិបត្តិ ។ សម្តេចបវរធិបតីនាយករដ្ឋមន្ត្រី បានបញ្ជាក់ថា បញ្ហានេះគឺជាបញ្ហាដែលរសើបបំផុត បញ្ហាដែលត្រូវដោះស្រាយដោយមានភាពបត់បែន ។
បញ្ហាត្រូវដោះស្រាយដោយភាពយោគយល់គ្នានិងភាពអំណត់ ។ ខ្ញុំចែកជាពីរ បុរីដែលធ្វើពិត
មានចេតនាពិត គ្រាន់តែបញ្ហាប្រឈម ការវាយតម្លៃខុស និងបុរីដែលមានចេតនាបោកប្រាស់ គេហៅឆបោក ខ្លះអត់មានបុរីផង ។សម្តេចបវរធិបតីនាយករដ្ឋមន្ត្រី បន្ថែមថា ដំបូងគេបំផុត ពេលដែលខ្ញុំទទួលតួនាទី អ្វីដែលជាការតាមដានដោយយកចិត្តទុកដាក់របស់ខ្ញុំជាងគេ គឺរឿងអចលនទ្រព្យនេះឯង ។ ប្រសិនបើមានបញ្ហាជាមួយវិស័យអចលនទ្រព្យ គឺវាជះឥទ្ធិពលទៅដល់វិស័យធនាគារ និងផ្សេងៗទាំងអស់ ។ នេះហើយជាគោលដៅធំបំផុតរបស់យើង២ ទិសដៅ២មុខព្រួញដែលត្រូវធ្វើ ៖
ទី១-ដោះស្រាយបញ្ហាវិវាទចំពោះមុខ ។
ទី២ ត្រូវធ្វើម៉េច ធានាការរស់រានមានជីវិត មិនឱ្យស្លាប់វិស័យអចលនទ្រព្យ ។ នេះគឺជាគោលដៅដ៏ធំដែលត្រូវធ្វើ យើងដោះស្រាយបែបណា កុំឱ្យមានភាពច្របូកច្របល់ ។
សម្តេចបវរធិបតី ក៏បានថ្លែងអំណរគុណអាជ្ញាធរ និងស្ថាប័នពាក់ព័ន្ធ ដែលខិតខំធ្វើកិច្ចការងារដោះស្រាយនេះ ដោយភាពអត់ធ្មត់និងប្រសិទ្ធភាព ដោយសម្តេចយល់ឃើញថា បើពុំនោះទេ មិនដឹងថាត្រូវចាប់ខ្លួនមនុស្សប៉ុន្មាននាក់ឡើយ ចំពោះករណីអចលនទ្រព្យនេះ ។
ពាក់ព័ន្ធនឹងបញ្ហាវិវាទបុរីនេះ សម្តេចបវរធិបតី បានទម្លាយថា «ខាងបុរីមួយចំនួនសំណូមពរ
ថាត្រូវអនុវត្តច្បាប់ទៅលើអ្នកនេះរឹងកំព្រឹស អតិថិជនមួយចំនួនទាមទារឱ្យអនុវត្តច្បាប់ ចាប់ម្ចាស់បុរី ខាងធនាគារមួយចំនួន ថាត្រូវតែអនុវត្តឱ្យរឹងកំព្រឹស អ្នកអត់បង់ត្រូវចាប់ត្រូវអី ។ ខ្ញុំថា បើរវល់តែចាប់គ្រប់គ្នារលាយហើយ វាបង្កើតនូវភាពកាន់តែរំជើបរំជួល ៩៩គម្រោង បើសិនជាមានបញ្ហា ៩៩គម្រោង មានបញ្ហាទាំង៩៩ហើយយើងចេះតែចាប់ តើនរណាជាអ្នកដោះ ? នេះហើយដែលយើងត្រូវគិតគូរ» ៕
ចែករំលែកព័តមាននេះ