បរទេស ៖ ក្រុមអ្នកវិទ្យាសាស្ត្រសម្តែងភាពភ្ញាក់ផ្អើល ក្រោយពីកាមេរាចាប់រូបភាពពីបាតសមុទ្រដែលបំពាក់លើមនុស្សយន្តស្វ័យប្រវត្តិបានថតជាប់ សត្វដង្កូវសមុទ្រដ៏ចម្លែកមួយប្រភេទអោយពួកគេបានដាក់រហស្សនាមវាថា ជាដង្កូវផ្កាភ្លើង ឬ Sassy sparkler ដោយសារពន្លឺចែងចាំងភ្លឹបភ្លែតរបស់វាប្រៀបបីដូចទៅនឹងពន្លឺផ្កាភ្លើងនៃផាវកាំជ្រួចខួបកំណើត…
បរទេស ៖ ក្រុមអ្នកវិទ្យាសាស្ត្រសម្តែងភាពភ្ញាក់ផ្អើល ក្រោយពីកាមេរាចាប់រូបភាពពីបាតសមុទ្រដែលបំពាក់លើមនុស្សយន្តស្វ័យប្រវត្តិបានថតជាប់ សត្វដង្កូវសមុទ្រដ៏ចម្លែកមួយប្រភេទអោយពួកគេបានដាក់រហស្សនាមវាថា ជាដង្កូវផ្កាភ្លើង ឬ Sassy sparkler ដោយសារពន្លឺចែងចាំងភ្លឹបភ្លែតរបស់វាប្រៀបបីដូចទៅនឹងពន្លឺផ្កាភ្លើងនៃផាវកាំជ្រួចខួបកំណើត ។
យោងតាមសារព័ត៌មាន nypost បានចេញផ្សាយដោយប្រើចំណងជើងប្រៀបធៀបរូបរាងសត្វដង្កូវចម្លែក ឬដង្កូវក្រៅភពមួយនេះទៅនឹងដើមណូអែល ឬជក់ដុសបង្គន់ ? ប៉ុន្តែសារព័ត៌មានភាគច្រើនបានប្រដូចរូបរាងរបស់វាទៅនឹងរោមភ្នែក ដែលនារីៗនិយមយកទៅត ដើម្បីបង្កើនសម្រស់ ។ ថ្មីៗនេះវិទ្យាស្ថាន Schmidt Ocean Institute ដែលជាស្ថាប័នមិនស្វែងរកប្រាក់ចំណេញបានចែករំលែកវីដេអូ ដង្កូវផ្កាភ្លើង តាមរយៈគណនី Instagram និង X ដោយពណ៌នាថា ដង្កូវទឹកសមុទ្រទឹកជ្រៅនេះត្រូវបានថតជាប់អំឡុងបេសកកម្ម #ChileMargin2024 កំឡុងពាក់កណ្តាលខែវិច្ឆិកា ឆ្នាំ២០២៤ ដែលចូលរួមដោយក្រុមវិទ្យាសាស្ត្រអន្តរជាតិ ដើម្បីសិក្សាពីជីវកម្រ និងបរិស្ថានក្នុងសមុទ្រទឹកជ្រៅ នៅតាមបណ្តោយជ្រលងទ្វីបដែលមានសភាពចោតខ្លាំង ដែលត្រូវបានលិចនៅក្រោមបាតមហាសមុទ្រប៉ាស៊ីហ្វិក ។
ក្រៅពីដង្កូវផ្កាភ្លើង ឃ្លីបវីដេអូនោះក៏បង្ហាញឱ្យពីសត្វចម្លែកៗដែលមិនធ្លាប់បានឃើញជាច្រើនប្រភេទទៀត ដែលកំពុងមានវត្តមានរស់នៅក្នុងបាតសមុទ្រ ។ លោក Karen Osborn អ្នកជំនាញនៅសារមន្ទីរជាតិប្រវត្តិសាស្ត្រធម្មជាតិ Smithsonian បានពន្យល់ថា ដង្កូវផ្កាភ្លើង ស្ថិតនៅក្នុងចំណោមប្រភេទដង្កូវសមុទ្ររាប់ម៉ឺនប្រភេទ ហើយដែលពួកវាអាចមានពណ៌ចម្រុះលើសពីនេះ ។ ពួកគេមិនមែនគ្រាន់តែជាដង្កូវដែលបង្កើនសម្រស់ និងពន្លឺដល់បាតសមុទ្រតែប៉ុណ្ណោះទេ តែពួកវា គឺជីវៈចម្រុះដ៏សំខាន់នៅក្នុងវដ្ដអាហារក្រោមបាតសមុទ្រ ហើយដើរតួនាទីសំខាន់ក្នុងការសម្អាតបរិស្ថានបាតសមុទ្រ ដោយស៊ីសាកស.ព ឬឆ្អឹងសត្វសមុទ្រ ដើម្បីកម្ចាត់ជាតិពុល និងបង្កើនអុកស៊ីសែននៅបាតសមុទ្រ ។
គួរកត់សម្គាល់ថា បេសកកម្ម Chile Margin 2024 ដែលកំពុងដំណើរការនេះ ផ្តោតលើការចុះជ្រៅនៅក្នុងបាតសមុទ្រដាច់ស្រយាលប្រមូលផ្តុំទៅឧស្ម័នពុលដែលបង្កឡើងពីសត្វសមុទ្ររលួយរាប់លានឆ្នាំ ដើម្បីសិក្សាឱ្យច្បាស់ពីបរិស្ថាននៅទីនោះដែលពោរពេញទៅដោយអតិសុខុមប្រាណ និងភាវៈចម្លែកៗ ។ ជាឧទាហរណ៍ បេសកកម្មស្រាវជ្រាវបានរកឃើញថា ជីវិតនៅក្រោមបាតមហាសមុទ្រមានសក្តានុពលដ៏អស្ចារ្យសម្រាប់ឱសថដែលមាននៅក្នុងប្រលោមលោកទេវកថា ។
អ្នកវិទ្យាសាស្ត្រកំពុងសិក្សាស្រាវជ្រាវឈានទៅរករបកគំហើញថ្មី ដើម្បីផលិតថ្នាំប្រឆាំងជំងឺមហារីក បន្ទាប់ពីពួកគេបានរកឃើញសត្វឆ្អឹងខ្នង ឬថនិកសត្វសមុទ្រ មានសមត្ថភាពអាចផលិតអង់ទីប៊ីយ៉ូទិកប្រឆាំងនឹងមហារីក និងសារធាតុប្រឆាំងការរលាកដោយខ្លួនវា ខ្ពស់ជាងភាវៈរស់ដែលស្ថិតនៅលើគោក ។
សូមជម្រាបថា មានដង្កូវសមុទ្រប្រហែល៨០០០ប្រភេទ ដែលត្រូវគេស្គាល់ ដែលមានទំហំចាប់ពីពីរបីមិល្លីម៉ែត្រទៅប្រហែល១០ហ្វីត ប៉ុន្តែគ្មានអ្នកអាចកំណត់ឱ្យច្បាស់ថា តើនៅក្រោមបាតសមុទ្រដ៏ធំមហិមារ និងពោរពេញទៅដោយអាថ៌កំបាំងរាប់មិនអស់នោះ តើមានភាវរស់ប៉ុន្មានលានប្រភេទនោះទេ ជាពិសេសនៅតំបន់បាតសមុទ្រជ្រៅៗដែលក្រុមអ្នកវិទ្យាសាស្ត្រមិនអាចចុះទៅដល់ ៕
ចែករំលែកព័តមាននេះ