ដើមអំពិល អាយុកាលរាប់រយឆ្នាំ ត្រូវកា.ប់រំលំក្នុងតម្លៃ១,០០០ដុល្លារ
ខេត្តស្ទឹងត្រែង ៖ កន្លងមកមិនថា ដើមពោធិ៍ ដើមរាំង ដើមជ្រៃ សូម្បីដើមអំពិលជូស្រុក ក៏ឈ្មួញដើរប្រមូលទិញ កាប់គាស់រំលើងខ្ទេចខ្ទីដែរ។ ជាក់ស្តែងថ្មីៗនេះ…
ខេត្តស្ទឹងត្រែង ៖ កន្លងមកមិនថា ដើមពោធិ៍ ដើមរាំង ដើមជ្រៃ សូម្បីដើមអំពិលជូស្រុក ក៏ឈ្មួញដើរប្រមូលទិញ កាប់គាស់រំលើងខ្ទេចខ្ទីដែរ។ ជាក់ស្តែងថ្មីៗនេះ មានការលុកលុយពីសំណាកឈ្មួញមួយចំនួន លួងលោមប្រជាពលរដ្ឋតាមភូមិ លក់ទិញ ដើមឈើស្រុក ដែលមានអាយុកាលយូរឆ្នាំ និងមានទំហំធំ យកទៅជួញដូរបន្ត បង្កឱ្យបាត់បង់សម្បត្តិមរតក និងបង្កផលប៉ះពាល់ដល់ផ្នែកជំនឿសាសនា ជាទីសក្ការៈ នៅតាមមូលដ្ឋានផងដែរ នៅភូមិភ្លុក ឃុំភ្លុក ស្រុកសេសាន ។
ដើមអំពិលមួយដើម មុខកាត់ជាង២ម៉ែត្រ ក្នុងអាយុកាលរាប់រយឆ្នាំ ដែលអ្នកស្រុកមួយចំនួន តែងអាស្រ័យលើផលប្រយោជន៍ ទៅតាមរដូវ កាលរបស់វា និងមានជំនឿលើសាសនា ផងនោះ ត្រូវបានឈ្មួញលួងលោម ប្រជាពលរដ្ឋទិញលក់ កាប់គាស់បំរុង ដឹកជញ្ជូនបម្លាស់ទីពីស្រុកសេសានទៅកាន់ទីកន្លែងផ្សេង ត្រូវបានទប់ស្កាត់ក្នុងការដឹកជញ្ជូន ក្រោយទទួលព័ត៌មានពីប្រជាពលរដ្ឋ លោកអភិបាលខេត្តដាក់បទបញ្ជាឱ្យអាជ្ញាធរស្រុក ឃាត់រក្សាទុក និងស្រាវជ្រាវរកអ្នកទិញ ដើម្បីមានវិធានការ ។
លោកអភិបាលខេត្ត ក៏បានដាក់បទបញ្ជាដល់អាជ្ញាធរស្រុកទាំងអស់ ត្រូវអនុវត្តវិធានការទប់ស្កាត់សកម្មភាពនេះ នៅគ្រប់មូលដ្ឋាន និងអប់រំ ប្រជាពលរដ្ឋ ដោយឱ្យធ្វើកិច្ចសន្យា តែក្នុងករណីមិនស្តាប់តាមការណែនាំ ឱ្យមន្ត្រីជំនាញចាត់វិធានការតាមផ្លូវច្បាប់តែម្តង ។
អភិបាលស្រុកសេសាន លោក សុវណ្ណ ពិសេដ្ឋ ថាករណីខាងលើនេះ លោកបានឱ្យមេប៉ុស្តិ៍រដ្ឋបាលឃុំភ្លុក ធ្វើការឃាត់រថយន្ត និងក្រុមឈ្មួញសួរនាំបានហើយ ។ ប៉ុន្តែផ្ទុយទៅវិញ មិនដឹងជាមានហេតុផលយ៉ាងណាទេ បែរជាលោកមន្ត្រីប៉ុស្តិ៍រដ្ឋបាលឃុំ ដោះលែងបក្ខពួកជនខិលខូចនេះទៅវិញ ដោយមិនបានរាយការណ៍ មកអាជ្ញាធរស្រុកសោះ ។
លោកបន្តថា បងប្អូនប្រជាពលរដ្ឋ បានសម្ដែងការសោកស្តាយយ៉ាងខ្លាំង ចំពោះការកាប់រំលំដើមអំពិល ដែលបន្សល់ទុកតាំងពីដូនតា មកមានអាយុរាប់រយឆ្នាំមកហើយ។ នេះដោយសារតែការយល់ដឹងរបស់ប្រជាពលរដ្ឋយើងនៅមានកម្រិត និងចង់បានលុយតិចតួច នាំគ្នាទៅកាប់លក់ ។
លោក ថង សាយ ដែលជាអ្នកលក់ដើមអំពិលនោះ បានទទួលកំហុសថា ខ្លួនពិតជាបានចរចា ជាមួយឈ្មួញទិញដើមអំពិលនោះមែន។ ឈ្មួញខាងលើនោះ ឈ្មោះ វ៉ា ឌី ភេទប្រុស អាយុ៣៨ឆ្នាំ រស់នៅភូមិព្រះផ្តៅ ឃុំត្រពាំងក្នុង ស្រុកក្រែក ខេត្តត្បូងឃ្មុំ ។
លោកបន្តថា ដំបូងឈ្មួញនេះ ឱ្យក្នុងតម្លៃ៥០០ដុល្លារ ហើយលោកតថ្លៃចុះឡើង ក៏បានតម្លៃ១,០០០ដុល្លារ ស្មើ៤លានរៀល ទើបសម្រេចលក់ និងទៅឱ្យមេភូមិធ្វើលិខិតស្នាម ព្រោះគិតថា ដើមអំពិលនេះ ស្ថិតនៅក្នុងដីកម្មសិទ្ធរបស់ខ្លួន ។
លោកស្រី ឡន ខាំហ្វាត មេភូមិភ្លុក បានបញ្ជាក់ថា លោកស្រីពិតជាបានចេញលិខិតទិញលក់ ឱ្យភាគីទាំងពីរ ពិតមែន ។ ព្រោះយល់ថា ជាដើមឈើក្នុងស្រុក ប្រជាពលរដ្ឋ លក់ដូរ គ្រាន់បានប្រាក់ដោះស្រាយជីវភាព តែប៉ុណ្ណោះ ។
ប្រជាពលរដ្ឋ ក្នុងភូមិនោះថា ទាក់ទងទៅនឹងអបិយជំនឿសាសនា ប្រជាពលរដ្ឋមានក្តីព្រួយបារម្ភ ព្រោះក្រោយការកាប់គាស់រំលំដើមអំពិលនោះ អ្នកដែលស៊ីឈ្នួលកាប់គាស់ម្នាក់ ឈ្មោះ ប្រុស វៃ ក៏បានស្លា.ប់ ដោយសារគ្រោះអាសន្ន ដូចមានខ្មោចនាំឱ្យដើរទៅចុះទឹកទន្លេ មុខដើមអំពិលនោះ ចម្ងាយជាង១០០ប៉ុណ្ណោះ ។ ហើយតាមការយល់សប្តិរបស់អ្នកភូមិ និងត្រូវយកជីវិតទៅបន្ថែមចំនួនបីនាក់ទៀត ដែលជាអ្នកកាប់ដើមអំពិលនេះ។ ការបាត់អាយុជីវិត សមាជិកក្រុមស៊ីឈ្នួលកាប់ដើមអំពិលនោះ ជាការចៃដន្យមួយ ដែលប្រជាពលរដ្ឋ គិតថា ជាអបិយជំនឿ បែបសាសនា ពួកគាត់យល់ឃើញប៉ុណ្ណោះ ។
ពាក់ព័ន្ធរឿងរ៉ាវ គណៈបញ្ជាការឯកភាពស្រុក ចាត់ទុកថា ដោយខ្វះការទទួលខុសត្រូវរបស់មន្ត្រីប៉ុស្តិ៍ ដែលបណ្តោយឱ្យឈ្មួញគេចខ្លួនបាត់ ចំណែកបក្ខពួកឃាត់ខ្លួនបានហើយ ក៏ត្រូវដោះលែងទៅវិញ មិនដឹងមូលហេតុ ធ្វើឱ្យប្រជាពលរដ្ឋបាត់បង់ជំនឿ លើការដឹកនាំរបស់អាជ្ញាធរមូលដ្ឋាន ។
ក្រោយការទប់ស្កាត់ក្នុងជំនួញជួញដូរដើមឈើស្រុកខាងលើ ដើមអំពិល ដែលជាមរតកចាស់វស្សា រងការខូចខាតនេះ អាជ្ញាធរស្រុក មានបំណងដឹកយកទៅដាំ នៅមុខវត្តភ្លុក ជាកន្លែងទីតាំងតំបន់ទេសចរណ៍ ផងដែរ ៕
ចែករំលែកព័តមាននេះ