ទីក្រុងវីលនើស៖ ថ្ងៃនេះមានហេតុការណ៍គ្រោះថ្នាក់យន្តហោះរហូតដល់ទៅ២ផ្ទួនៗគ្នា។ ទី១គឺយន្តហោះដឹកឥវ៉ាន់របស់ក្រុមហ៊ុនឌីអេចអិល (DHL) ដែលបានធ្លាក់នៅពេលព្យាយាមចុះចតនៅអាកាសយានដ្ឋានមួយកន្លែងនៃប្រទេសលីទុយអានីតាំងពីព្រឹកព្រលឹមថ្ងៃចន្ទនេះតែម្ដងបណ្ដាលឱ្យស្លាប់មនុស្សម្នាក់។ និងទី២ ហេតុការណ៍យន្តហោះរុស្ស៊ីឆេះម៉ាស៊ីន។
សាក្សីនិយាយថាជនរងគ្រោះដែលស្លាប់នៅក្នុងហេតុការណ៍ទី១នោះជាអ្នកស្ថិតនៅក្នុងយន្តហោះនោះផ្ទាល់តែម្ដង។ មនុស្ស៣នាក់ទៀតដែលស្ថិតនៅលើយន្តហោះនោះដែរបានរងរបួស។ សំណាងល្អ ហេតុការណ៍នោះមិនបានបណ្ដាលឱ្យអ្នកដែលស្ថិតនៅលើដីរងរបួស ឬស្លាប់ទេ។ នេះជាយន្តហោះរបស់ក្រុមហ៊ុនអាកាសចរណ៍ស្វីហ្វអ៊ែរ (Swiftair) ដែលបើកដំណើរការជំនួសមុខឱ្យក្រុមហ៊ុនឌីអេចអិល ហើយបានហោះហើរចេញពីទីក្រុងឡេបហ្ស៊ីក (Leipzig) ប្រទេសអាល្លឺម៉ង់។
យន្តហោះនេះធ្លាក់នៅម៉ោង៣:៣០ព្រឹកម៉ោងសាកលនៅពេលហោះជិតដល់ព្រលានយន្តហោះ។ នេះបើយោងតាមការបញ្ជាក់ពីអ្នកនាំពាក្យមជ្ឈមណ្ឌលជាតិគ្រប់គ្រងគ្រោះមហន្តរាយនៃប្រទេសលីទុយអានី។ សមត្ថកិច្ច និងក្រុមអ្នកស៊ើបអង្កេតបានចុះទៅកន្លែងកើតហេតុ។ ប៉ុន្តែគេគិតថាប្រហែលជាគ្មានហេតុការណ៍ផ្ទុះអ្វី១កើតឡើងមុនពេលយន្តហោះនេះធ្លាក់ទេ។
នៅក្នុងព្រឹត្តិការណ៍ដាច់ដោយឡែក១ទៀត យន្តហោះដឹកអ្នកដំណើររបស់ក្រុមហ៊ុនអាកាសចរណ៍រុស្ស៊ីបានឆេះនៅក្នុងអណ្ដាតភ្លើងយ៉ាងសន្ធោសន្ធៅ និងមានផ្សែងហុយទ្រលោមចេញពីម៉ាស៊ីនយន្តហោះ។ មុនពេលកើតហេតុនោះ យន្តហោះរបស់រុស្ស៊ីម៉ាកសឺខយ ស៊ូបផឺចិន មួយរយ (Sukhoi Superjet 100) ព្យាយាមចុះចតនៅអាកាសយានដ្ឋាននៃប្រទេសតួកគី។
សំណាងល្អ អ្នកដំណើរ៨៩នាក់ និងបុគ្គលិកក្រុមហ៊ុន៦នាក់នៅក្នុងយន្តហោះអាចជម្លៀសខ្លួនដោយសុវត្ថិភាពទាន់ពេលវេលា។ យន្តហោះនេះជារបស់ក្រុមហ៊ុនអាកាសចរណ៍អាស៊ីមុត អែរឡាញ (Azimuth Airlines) ដែលហោះចេញពីតំបន់រមណីយដ្ឋាននៃទីក្រុងសូជី (Sochi) ស្ថិតនៅសមុទ្រខ្មៅ។ តាមរយៈវីឌីអូឃ្លីបដែលគេបង្ហោះព្រោងព្រាតនៅលើបណ្ដាញសង្គម គេឃើញក្រុមអ្នកជួយសង្គ្រោះនៅក្នុងគ្រាអាសន្នបានចុះទៅកន្លែងកើតហេតុ និងព្យាយាមពន្លត់ភ្លើងយ៉ាងសស្រាក់សស្រាំ។
វីឌីអូឃ្លីបដទៃទៀតបង្ហាញថាក្រុមអ្នកពន្លតអគ្គិភ័យបន្តបាញ់ពពុះសាប៊ូទៅលើយន្តហោះ និងម៉ាស៊ីនយន្តហោះដើម្បីពន្លត់ភ្លើងដែលនៅសេសសល់ និងដើម្បីឱ្យម៉ាស៊ីនដែលកំពុងតែឡើងកម្ដៅនោះចុះត្រជាក់មកវិញ។ ក្រុមហ៊ុនអាកាសចរណ៍ខាងលើនេះប្រាប់ថាមុនពេលកើតហេតុ យន្តហោះរបស់ខ្លួនព្យាយាមចុះចតនៅក្នុងស្ថានភាពដ៏គ្រោះថ្នាក់នៅពេលខ្យល់កំពុងតែបក់យ៉ាងខ្លាំង។ អាជ្ញាធរអាកាសចរស៊ីវិលរុស្ស៊ីថ្លែងថាខ្លួនទទួលបានដំណឹងនេះហើយ ហើយកំពុងស៊ើបអង្កេតជាបណ្ដើរៗ។
គេហទំព័ឈ្មោះហ្វ្លាយរ៉ាដាម្ភៃបួន (FlightRadar24) ដែលជាអ្នកឃ្លាំមើលចរាចរណ៍ដែនអាកាសទូទាំងពិភពលោកថ្លែងថាយន្តហោះដែលឆេះម៉ាស៊ីនខាងលើនេះបានដាក់ឱ្យដំណើរការរយៈពេល៧ឆ្នាំ។ សព្វថ្ងៃនេះ ក្រុមហ៊ុនអាកាសចរណ៍រុស្ស៊ីខ្វះខាតយន្តហោះថ្មីៗ និងគ្រឿងបន្លាស់ដោយសារការដាក់ទណ្ឌកម្មពីក្រុមបស្ចិមប្រទេសក្រោយពេលផ្ទុះសង្គ្រាមអ៊ុយក្រែន៕
ចែករំលែកព័តមាននេះ