រាជធានីភ្នំពេញ ៖ ថ្លែងការពិសេសក្នុងសម័យប្រជុំពេញអង្គសភាអន្តរជាតិ ដើម្បីភាពអត់ឱន និងសន្តិ ភាពលើកទី១១ សម្ដេចតេជោ ហ៊ុន សែន ប្រធានព្រឹទ្ធសភានៃកម្ពុជាបានលើកឡើងថា…
រាជធានីភ្នំពេញ ៖ ថ្លែងការពិសេសក្នុងសម័យប្រជុំពេញអង្គសភាអន្តរជាតិ ដើម្បីភាពអត់ឱន និងសន្តិ ភាពលើកទី១១ សម្ដេចតេជោ ហ៊ុន សែន ប្រធានព្រឹទ្ធសភានៃកម្ពុជាបានលើកឡើងថា លទ្ធផលនៃការបោះឆ្នោតសកលនៅសហរដ្ឋអាមេរិកនឹងធ្វើឱ្យមានការប្រកួតប្រជែងភូមិសាស្ត្រនយោបាយ រវាងមហាអំណាចកាន់តែខ្លាំង ជាពិសេសចិន អាមេរិក និងរុស្ស៊ី ។
ថ្លែងក្នុងពិធីបើកសម័យប្រជុំពេញអង្គសភាអន្តរជាតិ ដើម្បីភាពអត់ឱន និងសន្តិភាពលើកទី១១ នៅថ្ងៃទី២៤ ខែវិច្ឆិកា ឆ្នាំ២០២៤ នៅសណ្ឋាគាសុខាសម្ដេចតេជោ ហ៊ុន សែន បានមានប្រសាសន៍ថា នៅក្នុងពេលដែលកម្ពុជាកំពុងរៀបចំវេទិកាជជែកគ្នាអំពីភាពអត់ឱន និងសន្តិភាពនេះពិភពលោកកំពុងប្រឈមនឹងការប្រែប្រួលនៃសណ្ដាប់ធ្នាប់ពិភពលោក ។
សម្ដេចតេជោបន្តថា សង្គ្រាម និងជម្លោះដែលកំពុងកើតឡើង នៅតាមតំបន់មួយចំនួនតួយ៉ាងដូចសង្គ្រាមរវាងរុស្ស៊ី និងអ៊ុយក្រែន ដែលបានបន្តអូសបន្លាយយ៉ាងរាំរ៉ៃគ្មាននរណាអាចកំណត់ពេលវេលា ដើម្បីបញ្ចប់សង្គ្រាម ។
សម្ដេចបានបន្ថែមថា ជម្លោះនៅមជ្ឈឹមបូព៌ាមានលក្ខណៈស្មុគស្មាញក្នុងរូបភាពជាសង្គ្រាមក្នុងតំបន់ និងអាចរីករាលដាលដល់សង្គ្រាមសាសនាដែលធ្វើឱ្យមានការជាប់ជំពាក់ជាមួយនឹងសង្គ្រាមកូនអុករបស់មហាអំណាច ។ សង្គ្រាមពាណិជ្ជកម្មរវាងអាមេរិក និងចិនសង្គ្រាមបែបថ្មី នៅអាហ្វ្រិករវាងជនជាតិស្បែកស និងជនជាតិស្បែកខ្មៅ និងការគំរាមកំហែងសង្គ្រាម នៅឧបទ្វីបកូរ៉េ បញ្ហានយោបាយ និងជម្លោះប្រដាប់អាវុធនៅមីយ៉ាន់ម៉ា ដែលមិនទាន់អាចរកច្រកចេញបាន ។
ជាមួយគ្នានោះដែរ សម្ដេចតេជោ ហ៊ុន សែន គូសបញ្ជាក់ថា «លទ្ធផលបោះឆ្នោតសកលនៅសហរដ្ឋអាមេរិកនឹងធ្វើឱ្យមានការប្រកួតប្រជែងភូមិសាសនយោបាយរវាងមហាអំណាចកាន់តែខ្លាំង ជាពិសេសសហរដ្ឋអាមេរិក ចិន និងរុស្ស៊ី» ។
សម្ដេចតេជោ ប្រធានព្រឹទ្ធសភា បន្ថែមថា កត្តាសំខាន់ក្នុងការជំរុញកត្តាទាំងអស់នេះឱ្យផុតពីការរីករាលដាលនៃសង្គ្រាមដណ្ដើមភូមិសាស្ត្រនយោបាយទៅជាសង្គ្រាមប្រជែងអរិយធម៌សង្គ្រាមដណ្ដើមឧត្ដមភាពនៃបច្ចេកវិទ្យា ។
សូមរំលឹកថា លោក ដូ ណាល់ត្រាំ ដែលធ្លាប់បានប្រកាសដាក់ចេញជាផ្លូវការនូវយុទ្ធសាស្ត្រឥណ្ឌូប៉ាស៊ីហ្វិក ដើម្បីទប់ទល់ទៅនឹងឥទ្ធិពលរបស់ចិនត្រូវបានជាប់ឆ្នោតជាប្រធានាធិបតីសហរដ្ឋអាមេរិកជាថ្មី ក្រោយផ្តួលលោកស្រី Kamala Harris ដែលជាដៃគូប្រកួតប្រជែកមកពីគណបក្សប្រជាធិបតេយ្យអាមេរិកកាលពេលថ្មីៗកន្លងមកនេះ ៕
ចែករំលែកព័តមាននេះ