រាជធានីភ្នំពេញ ៖ អាជ្ញាធរនៅតាមថ្នាក់រដ្ឋបាលមូលដ្ឋាន បានរៀបចំប្រារព្ធ ទិវាអនាម័យបរិស្ថានជាតិ ២៣ វិច្ឆិកា ក្រោមប្រធានបទ «មូលដ្ឋានស្អាត បរិស្ថានបៃតង»…
រាជធានីភ្នំពេញ ៖ អាជ្ញាធរនៅតាមថ្នាក់រដ្ឋបាលមូលដ្ឋាន បានរៀបចំប្រារព្ធ ទិវាអនាម័យបរិស្ថានជាតិ ២៣ វិច្ឆិកា ក្រោមប្រធានបទ «មូលដ្ឋានស្អាត បរិស្ថានបៃតង» ។
នាព្រឹកថ្ងៃទី២៣ ខែវិច្ឆិកា ឆ្នាំ២០២៤នេះ រដ្ឋបាលខណ្ឌ៧មករា បានរៀបចំប្រារព្ធទិវាអនាម័យបរិស្ថានជាតិ ២៣ វិច្ឆិកា ដែលជាទិវាជាតិសម្ខាន់ សំដៅការថែទាំបរិស្ថានអនាម័យក្នុងសង្គមជាតិ ឱ្យមានរបៀបរៀបរយល្អ និងសោភ័ណ្ឌភាពក្នុងសង្គម ។
ការរៀបចំទិវាខាងលើ ធ្វើឡើងក្រោមវត្តមានលោក ថេង សុថុល អភិបាល នៃគណៈអភិបាលខណ្ឌ៧មករា និងដោយមានការចូលរួមពីលោកអភិបាលរងខណ្ឌ, អធិការនគរបាល, មេបញ្ជាការកងរាជអាវុធហត្ថ, លោកលោកស្រីជាចៅសង្កាត់ រួមទាំងមន្ត្រីចំណុះជំនាញជាច្រើនទៀត ទាំងថ្នាក់រដ្ឋបាលសង្កាត់ និងខណ្ឌ ។
លោក ថេង សុថុល អភិបាលខណ្ឌ បានឱ្យដឹងថា ៖ បរិស្ថានអនាម័យ អាចស្អាតបាន គឺផ្តើមចេញពីយើងម្នាក់ៗ គ្រប់ៗគ្នា មិនអាចផ្តោតតែទៅលើអ្នកដែលប្រឹងសម្អាតតែមួយមុខ គឺមិនគ្រប់គ្រាន់។ សំរាម គឺកើតឡើងដោយយើងជាអ្នកប្រើប្រាស់វា ដូច្នោះហើយ យើងគួរតែយល់ដឹងឱ្យបានច្បាស់ និងចូលរួមក្នុងសកម្មភាពទុកដាក់ឱ្យបានត្រឹមត្រូវ នៅតាមទីតាំងសម្រាប់ការចោលសំរាម ជៀសវៀងការចោលពាសវាលពាសកាល ដែលជាផ្នែកធ្វើឱ្យប៉ះពាល់ដល់បរិស្ថានសង្គម និងខូចខាតដល់របៀបរៀបរយសាធារណៈ ផងដែរ ។
បងប្អូនជាកម្មករប្រមូលសំរាម បង្ហាញក្តីរីករាយ ជាមួយការជួយប្រមូលសំរាម ដើម្បីសម្អាតបិស្ថានសង្គម។ ពួកគាត់លើកឡើងថា ៖ បច្ចុប្បន្ននេះ ការងារប្រមូលមិនសូវនឿយណាយខ្លាំងដូចមុននោះទេ ព្រោះតែពលរដ្ឋមានការយល់ដឹងច្រើន អំពីការទុកដាក់ ដូច្នោះការប្រមូល ក៏មានភាពងាយស្រួល ក្នុងការប្រមែប្រមូលទៅតាមបរិបទជាក់ស្តែងដូចគ្នា ។
លោក ស្រី សុន សុធារី ប្រជាពលរដ្ឋ ដែលចូលរួមបានយល់ឃើញថា បញ្ហាអនាម័យបរិស្ថាន ក្នុងសង្គមកាន់តែមានភាពប្រសើរឡើងទៅៗ ដោយសារតែរាជរដ្ឋាភិបាល ពិសេសក្រសួងពាក់ព័ន្ធ បានដាក់ចេញយន្តការជាច្រើនក្នុងការអនុវត្ត សំដៅធានាប្រសិទ្ធិភាពខ្ពស់លើកិច្ចការងារនេះ ពិសេសកត្តាចូលរួមបានយ៉ាងខ្ជាប់ខ្ជួនផងដែរ ពីសំណាក់ពលរដ្ឋនៅគ្រប់មជ្ឈដ្ឋានទូទៅទាំងអស់ ៕
ចែករំលែកព័តមាននេះ