ទីក្រុងប្រ៊ុចសែល៖ ថ្មីៗនេះ មានកិច្ចពិភាក្សាពិសេសរវាងអគ្គលេខាធិការអង្គការណាតូ ជាមួយលោកត្រាំស្ដីពីសន្តិសុខពិភពលោកដែលក្រុមបស្ចិមប្រទេសកំពុងជួបប្រទះ។ កិច្ចជំនួបនោះធ្វើឡើងនៅរមណីយដ្ឋានផាមប៊ីច (Palm Beach) កាលពីថ្ងៃសុក្រ។ នេះបើតាមការបង្ហើបឱ្យដឹងពីលោកស្រីហ្វារ៉ា ដាក់ក្លាឡា…
ទីក្រុងប្រ៊ុចសែល៖ ថ្មីៗនេះ មានកិច្ចពិភាក្សាពិសេសរវាងអគ្គលេខាធិការអង្គការណាតូ ជាមួយលោកត្រាំស្ដីពីសន្តិសុខពិភពលោកដែលក្រុមបស្ចិមប្រទេសកំពុងជួបប្រទះ។ កិច្ចជំនួបនោះធ្វើឡើងនៅរមណីយដ្ឋានផាមប៊ីច (Palm Beach) កាលពីថ្ងៃសុក្រ។ នេះបើតាមការបង្ហើបឱ្យដឹងពីលោកស្រីហ្វារ៉ា ដាក់ក្លាឡា (Farah Dakhlallah) ដែលជាអ្នកនាំពាក្យអង្គការណាតូ។
កាលពីអាណត្តិមុន, លោកត្រាំធ្លាប់បានបង្ខំឱ្យរដ្ឋជាសមាជិកអង្គការណាតូចូលរួមវិភាគទានឱ្យបានច្រើនបន្ថែមទៀតទៅក្នុងខ្ទង់ថវិការបស់អង្គការណាតូដើម្បីអ្វីដែលលោកហៅថាជាការបង់ថ្លៃការពារ។ លោកធ្លាប់ព្រលយពាក្យនៅចំពោះមុខប្រធានគណៈកម្មការអឺរ៉ុបថាលោកសុខចិត្តឈរឱបដៃមើលប្រទេសដទៃវាយប្រហារអឺរ៉ុបបើអឺរ៉ុបមិនព្រមបង់ថ្លៃការពារ។
ម៉្យាងទៀតលោកហាក់ដូចជាកិចកុកចង់ដោះដៃចេញពីណាតូ។ លោកធ្លាប់បានលើកទឡ្ហីករណ៍ថាអង្គការណាតូជាស្ថាប័នចាស់ហួសសម័យ។ ដោយសារហេតុផលទាំងនេះ អឺរ៉ុបចង់ដោះស្រាយបញ្ហាខ្វែងគំនិតគ្នា។ អគ្គលេខាធិការអង្គការណាតូ លោកម៉ាក់រ៉ាត់ថ្លែងថាតាមពិត លោកចង់ជួបលោកត្រាំតាំងពី២ថ្ងៃក្រោយពេលលោកជាប់ឆ្នោតនៅអាណត្តិថ្មីដើម្បីពិភាក្សាអំពីការគំរាមកំហែងកាន់តែខ្លាំងឡើងៗចំពោះសន្តិសុខពិភពលោកនៅពេលពីរុស្ស៊ី និងកូរ៉េខាងជើងខិតជិតគ្នាកាន់តែខ្លាំង។
ដំណឹងស្ដីពីការឈ្នះឆ្នោតរបស់លោកត្រាំនៅអាណត្តិថ្មីនោះជាសញ្ញាគួរឱ្យព្រួយបារម្ភសម្រាប់សហភាពអឺរ៉ុប។ ជាពិសេស ពួកគេបារម្ភថាលោកត្រាំអាចនឹងកាត់បន្ថយជំនួយយោធាសម្រាប់អ៊ុយក្រែន។ បើដូច្នេះមែន វាអាចនឹងធ្វើចុះខ្សោយចំពោះកិច្ចខិតខំប្រឹងប្រែងនៅក្នុងសង្គ្រាម។ បើសិនអឺរ៉ុបត្រូវរ៉ាប់រងនៅក្នុងរឿងនេះតែម្នាក់ឯងពិតជាមិនងាយស្រួលប៉ុន្មានឡើយ។
រដ្ឋជាសមាជិកអង្គការណាតូថ្លែងថាការបន្តឧបត្ថម្ភ-គាំទ្រចំពោះអ៊ុយក្រែនដើម្បីឱ្យអ៊ុយក្រែនមានដង្ហើមដកនៅក្នុងការទប់ទល់នឹងរុស្ស៊ីជាចំណុចគន្លឹះដ៏សំខាន់ណាស់ទាំងសម្រាប់ទ្វីបអឺរ៉ុប និងអាមេរិកនៅក្នុងវិស័យសន្តិសុខជាតិ និងការពារជាតិ។ នៅឯកិច្ចប្រជុំជាមួយថ្នាក់ដឹកនាំអឺរ៉ុបនៅទីក្រុងប៊ុយដាប៉ែស (Budapest) ប្រទេសហុងគ្រី លោកម៉ាករ៉ាត់ថ្លែងថាអ្វីដែលយើងសម្លឹងឃើញកាន់តែច្បាស់នោះគឺថាកូរ៉េខាងជើង, អ៊ីរ៉ង់, ចិន និងរុស្ស៊ីកំពុងរួបរួមកម្លាំងគ្នាដើម្បីធ្វើអ្វីៗប្រឆាំងនឹងអ៊ុយក្រែន។
ទន្ទឹមនឹងនោះ រុស្ស៊ីត្រូវតែរ៉ាប់រងថ្លៃចំណាយទៅលើប្រទេសទាំងនោះដើម្បីឱ្យពួកគេទទួលបានផងប្រយោជន៍ (ពីរុស្ស៊ី)។ អត្ថប្រយោជន៍មួយដែលរុស្ស៊ីអាចផ្ដល់ជូនគឺការចែករំលែកបច្ចេកវិទ្យា (យោធា) ទៅឱ្យកូរ៉េខាងជើង។ លោកម៉ាករ៉ាត់ចង់រំលេចឱ្យឃើញត្រង់ចំណុចនេះថាទង្វើរបស់កូរ៉េខាងជើងបង្កការគំរាមកំហែងចំពោះសន្តិសុខជាតិរបស់អាមេរិក និងអឺរ៉ុប។ ដូច្នេះ លោកចង់ពិភាក្សាគ្នាដោយផ្ទាល់ជាមួយលោកត្រាំដើម្បីពិនិត្យមើលថាតើត្រូវរួមគ្នាដោះស្រាយបញ្ហាគំរាមកំហែងនេះដោយវិធីណា៕
ចែករំលែកព័តមាននេះ