រាជធានីភ្នំពេញ ៖ «រដ្ឋបាលជលផល» ដែលមានទីតាំងលើផ្ទៃដីដ៏ធំមហាសាលជិត១ហិកតា ស្ថិតនៅចំណុចផ្លូវបំបែកភ្លើងស្តុប រវាងមហាវិថីព្រះនរោត្តម និងមហាវិថីម៉ៅសេទុង តំបន់ចំការមន ត្រូវបាត់រូបរាងពីទីតាំងកំណើតរបស់ខ្លួនទៅហើយ…ឃើញនៅសល់តែផ្លាកយីហោដ៏ក្រៀមក្រំតែប៉ុណ្ណោះ ។…
រាជធានីភ្នំពេញ ៖ «រដ្ឋបាលជលផល» ដែលមានទីតាំងលើផ្ទៃដីដ៏ធំមហាសាលជិត១ហិកតា ស្ថិតនៅចំណុចផ្លូវបំបែកភ្លើងស្តុប រវាងមហាវិថីព្រះនរោត្តម និងមហាវិថីម៉ៅសេទុង តំបន់ចំការមន ត្រូវបាត់រូបរាងពីទីតាំងកំណើតរបស់ខ្លួនទៅហើយ…ឃើញនៅសល់តែផ្លាកយីហោដ៏ក្រៀមក្រំតែប៉ុណ្ណោះ ។
បានជាយើងពោលដូច្នោះ ពីព្រោះប៉ុន្មានថ្ងៃកន្លងមកនេះ មហាជនបានឃើញមន្ត្រីរាជការ «រើតោករើហ៊ឹង» ដឹកជញ្ជូនចេញឱ្យរពុយជាបន្តបន្ទាប់ ហើយម្នាក់ៗមុខមិនស្រស់ទេ…ប្រៀបដូចត្រូវគេបណ្តេញចេញឱ្យឆាប់កាន់តែល្អពីទីតាំងដ៏ស្រស់ស្អាតរបស់ខ្លួននៅកណ្តាលរាជធានីនេះ ។ពេលបានឃើញនិងសួរនាំ…គ្រាន់តែឮថា «កោះសន្តិភាព» ពុំមានមន្ត្រីណាម្នាក់ហ៊ាននិយាយឡើយ ។
ប៉ុន្តែក៏មានមន្ត្រីម្នាក់និយាយបោះសម្តីចោលថា កុំសួរច្រើនពេក នេះជារឿង «ចិនដេញខ្មែរ ខ្មែរដេញខ្មោច» ដូចកោះសន្តិភាពធ្លាប់និយាយកាលពីដើមហើយតើ !មានមន្ត្រីម្នាក់ទំនងថ្នាក់ទាបទេ និយាយបែបចំអកមិនឱ្យគេឮខ្លាំងទេថា មិនខុសពី«គេលក់ឆ្នាំងមាសដូរយកឆ្នាំងដី»ទេ…ក្រែងកោះសន្តិភាពធ្លាប់ផ្សាយដែរតើ ? សុំសួរមេៗថ្នាក់លើទៅ ទើបច្បាស់ ។
លទ្ធផលចុងក្រោយបញ្ជាក់ថា «ទីតាំងរដ្ឋបាលជលផល» ដ៏មហាសាលត្រូវបានលក់ឬដោះដូរតាំងតែពីឆ្នាំ២០១៩មកម្ល៉េះ សម័យលោក វេងសាខុន ជារដ្ឋមន្ត្រី ។ ទំនងម្ចាស់គេទើបបង្ខំឱ្យចេញនៅចុងឆ្នាំនេះ ទើបនាំគ្នាត្រូវតែ «បង្ខំចិត្ត» រើចេញដោយខានមិនបាន ព្រោះដល់ពេលម្ចាស់ថ្មីចូលមកគ្រប់គ្រងវិញហើយ ។ តើទីតាំងថ្មីនៅទីណា ? ចិនដេញខ្មែរ ខ្មែរដេញខ្មោចមែនឬ ? តើសេដ្ឋីណាដែលមានសំណាងបានទីតាំង «ឆ្នាំងមាស»នេះ ? តើក្រុមហ៊ុនសេដ្ឋីមួយណា ? នៅមិនទាន់បានព័ត៌មានច្បាស់ការណ៍១០០%នៅឡើយទេ ។
ប្រភពមួយថា បានទៅក្រុមហ៊ុនឈ្មោះ ម៉ូឌែន វិសិនគ្រុប… មិនដឹងសេដ្ឋីម្ចាស់ក្រុមហ៊ុនឈ្មោះអ្វីទេ បានជាមានសំណាងម្ល៉ឹងៗ ។ តាមប្រភពពីក្រុមហ៊ុនអចលនទ្រព្យមួយបង្ហើបប្រាប់កោះសន្តិភាពថា ដីនៅទីតាំងរដ្ឋបាលជលផល ក្នុងសម័យកាលឆ្នាំ២០២០ មានតម្លៃមហាសាលណាស់ គឺពី៨ពាន់ដុល្លារ ទៅមួយម៉ឺនដុល្លារ ក្នុងមួយម៉ែត្រការ៉េ គឺអាចមានតម្លៃពី៧០ទៅ៨០លានដុល្លារ ។ ទីតាំងដីនោះបានជាមានតម្លៃម្ល៉ឹងៗ ព្រោះនៅចំមហាវិថី និងកាច់ជ្រុងទៀត មិនងាយរកបានឡើយ ។ ចំណែកដីនៅទីតាំងថ្មីជាង១ហិកតាស្តើង ដែលស្ថិតនៅជាយបឹងទំពុន ក្នុងសង្កាត់ចាក់អង្រែនោះ កាលពីសម័យនោះជាដីបឹងមានតម្លៃពី១៥០ដុល្លារ ទៅ២០០ដុល្លារអស់ថ្លៃហើយ ។
ទោះបីមានសំណង់ដោះដូរ វាគ្រាន់តែជាសំណង់ថ្មីហុយប៉ុណ្ណោះ ។ ឯដីដោះដូរនេះមានតម្លៃប្រមាណជាង២លានដុល្លារ អស់ក្បាច់ហើយ ។ ធម្មតាឈ្មួញរកស៊ីជាមួយរដ្ឋ បើមិនចំណេញកប់មេឃគេមិនប្រថុយទេ ។ មិនដឹងគេពូកែរត់ការ ចំណាយក្រៅអស់ប៉ុន្មាននៅឡើយទេ ។ គង់តែធ្លាយ ព្រោះទោះផោមក្នុងទឹកគង់តែមានក្លិន ? ម្ល៉ោះហើយពាក្យថា «លក់ឆ្នាំងមាសដូរយកឆ្នាំងដី» អត់ខុសបន្តិចឡើយ ។ ឯពាក្យថា «ចិនដេញខ្មែរ ខ្មែរដេញខ្មោច» ក៏កាន់តែត្រូវដែរ…ហេ ! ហេ
ពេលណាមានព័ត៌មានប្លែក យើងនឹងផ្សាយជូនបន្តទៀត ៕
ចែករំលែកព័តមាននេះ