រាជធានីភ្នំពេញ ៖ សម្រាប់ព្រះរាជពិធីបុណ្យអុំទូកថ្ងៃទី២ម្សិលមិញនេះ កំណើនមហាជន បានចូលរួមអបអរសាទរ និងដើរលេងកម្សាន្តសប្បាយរីករាយច្រើនជាងថ្ងៃទី១ ចំណែកសំរាមក៏មានការកើនឡើង បើប្រៀបទៅនឹងថ្ងៃអុំទូកទីមួយ ដែលក្រុមការងារត្រូវបោសសំអាត និងប្រមូលកើបដឹកចេញយកទៅចាក់ចោលនៅទីលានចាក់សំរាម។…
រាជធានីភ្នំពេញ ៖ សម្រាប់ព្រះរាជពិធីបុណ្យអុំទូកថ្ងៃទី២ម្សិលមិញនេះ កំណើនមហាជន បានចូលរួមអបអរសាទរ និងដើរលេងកម្សាន្តសប្បាយរីករាយច្រើនជាងថ្ងៃទី១ ចំណែកសំរាមក៏មានការកើនឡើង បើប្រៀបទៅនឹងថ្ងៃអុំទូកទីមួយ ដែលក្រុមការងារត្រូវបោសសំអាត និងប្រមូលកើបដឹកចេញយកទៅចាក់ចោលនៅទីលានចាក់សំរាម។ នេះបើតាមការអះអាងពីមន្ត្រីរដ្ឋបាលរាជធានីភ្នំពេញ។
លោក ស៊ូ សាវ៉ន ប្រធានការិយាល័យសួនច្បារ និងរុក្ខជាតិនៃមន្ទីរសាធារណការ និងដឹកជញ្ជូនរាជធានីភ្នំពេញបានឱ្យដឹងថា ព្រះរាជពិធីបុណ្យអុំទូកថ្ងៃទី២បានបញ្ចប់ បានបន្សល់នូវសម្រាម ដែលបងប្អូនប្រជាពលរដ្ឋយើងបានដើរលេងកម្សាន្ត និងលំហែលកាយ ហូបចុក តាមសួនច្បារនានាក្នុងរាជធានីភ្នំពេញ ដែលត្រូវបោសសំអាត និងប្រមូលកើបចេញ ។
លោកបន្តថា ក្រោយពីព្រះរាជពិធីបុណ្យអុំទូកថ្ងៃទី២បានបញ្ចប់ កម្លាំងការិយាល័យសួនច្បារ និងរុក្ខជាតិនៃម្ទីរសាធារណកា និងដឹកជញ្ជូនរាជធានីភ្នំពេញ បានបោសសម្អាតសម្រាមនៅសួនច្បារនានានិងតំបន់ប្រារព្ធពិធីចាប់ពីម៉ោង១២យប់ រហូតដល់ម៉ោង៧ព្រឹក ទើបរួចរាល់។ លោកបន្តថា ព្រះរាជពិធីបុណ្យអុំទូកឆ្នាំនេះ បងប្អូនប្រជាពលរដ្ឋយើងមានការយល់ដឹងខ្ពស់ក្នុងការទុកដាក់សម្រាម។
ចំណែកលោកស្រី ដោ សម្ផស្ស នាយិការងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញបានឱ្យដឹងថា សម្រាប់ថ្ងៃទី២នៃព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ឆ្នាំ២០២៤នេះ មានបងប្អូនប្រជាពលរដ្ឋខ្មែរ និងជនបរទេសប្រមាណ២លាន២សែននាក់បានចូលរួមទស្សនាកម្សាន្តប្រកបដោយទឹកមុខសប្បាយរីករាយក្រោមម្លប់នៃសន្តិភាព ។
លោកស្រីបានបន្តថា ចំពោះការងាររក្សាសន្តិសុខ សណ្តាប់ធ្នាប់ និងរៀបរយ ក្រោមការយកចិត្តទុកដាក់ខ្ពស់បំផុតពីឯកឧត្តម ឃួង ស្រេងអភិបាលនៃគណអភិបាលរាជធានីភ្នំពេញ រួមជាមួយថ្នាក់ជាតិ និងកងកម្លាំង និងគ្រប់ផ្នែកដែលពាក់ព័ន្ធ គឺមានសន្តិសុខ សណ្តាប់ល្អពុំមានបញ្ហាអ្វីកើតឡើងគួរអោយកត់សម្គាល់នោះទេ៕
ចែករំលែកព័តមាននេះ