ខេត្តកំពង់ឆ្នាំង ៖ ប្រធានមន្ទីរវប្បធម៌និងវិចិត្រសិល្បៈខេត្តកំពង់ឆ្នាំង លោក ប៊ុនថន សុខាណារិទ្ធ បានបញ្ជាក់ នៅព្រឹកថ្ងៃទី៨ វិច្ឆិកា ឆ្នាំ២០២៤…
ខេត្តកំពង់ឆ្នាំង ៖ ប្រធានមន្ទីរវប្បធម៌និងវិចិត្រសិល្បៈខេត្តកំពង់ឆ្នាំង លោក ប៊ុនថន សុខាណារិទ្ធ បានបញ្ជាក់ នៅព្រឹកថ្ងៃទី៨ វិច្ឆិកា ឆ្នាំ២០២៤ នេះថា សារមន្ទីរខេត្តកំពង់ឆ្នាំង បានបើកទ្វារចាំទទួលភ្ញៀវជាតិ និងអន្តរជាតិជារៀងរាល់ថ្ងៃក្នុងពេលម៉ោងធ្វើការ ។
ប្រធានមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំងមានប្រសាសន៍បែបនេះ គឺក្នុងគោលបំណងឲ្យភ្ញៀវជាតិ ជាពិសេសអ្នកខេត្តកំពង់ឆ្នាំងបានអញ្ជើញចូលទស្សនានូវវត្ថុបុរាណ មានដូចជាព្រះបដិមា កូលាលភាជពីជំនាន់ដើម ក៏ដូចជាវត្ថុបុរាណធ្វើអំពីលោហៈផ្សេងៗផងដែរ ដែលទាំងអស់នេះជាស្នាដៃរបស់បុព្វបុរសយើងជំនាន់មុន ហើយកូនចៅខ្មែរជំនាន់ក្រោយខ្លះពុំដែលបានឃើញ ។ ជាមួយនេះ លោកក៏សូមអំពាវនាវដល់បងប្អូនប្រជាពលរដ្ឋទាំងភ្ញៀវជាតិទាំងអន្តរជាតិ សូមអញ្ជើញមុខទស្សនាឲ្យបានគ្រប់ៗគ្នារៀងរាល់ពេលម៉ោងធ្វើការ ។
បើតាមការបកស្រាយរបស់លោកសនចាន់ធឿន ប្រធានសារមន្ទីរនៃមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំងបានឲ្យដឹងថា បុរាណវត្ថុដែលបានតម្កល់ក្នុងសារមន្ទីរខេត្តកំពង់ឆ្នាំង បច្ចុប្បន្ន មានចំនួន៤៣២ដុំ បំណែកមានដូចជាថ្មភក់ លោហៈឈើ និងកូលាលភាជ ។ ក្នុងនោះ វត្ថុបុរាណធ្វើអំពីថ្មមាន៩៩ ដុំបំណែក វត្ថុបុរាណធ្វើអំពីលោហៈមាន ១៤៥ដុំបំណែក ក្នុងនោះ(កាក់ធ្វើពីលោហៈមាន១៥៦៣ កាក់ )។
ចំណុចនេះ លោកបញ្ជាក់ថាកាក់ដូចគ្នា និងផលិតឆ្នាំជាមួយគ្នាទោះបី មាន១០០កាក់ក៏រាប់តែមួយបំណែកដែរ ។ កុលាលភាជ១២១ដុំបំណែក ឈើមានចំនួន១០ដុំបំណែក កែវមានចំនួន៦៤ដុំបំណែក និងសាត្រាស្លឹករិត មានចំនួន ៤៧ ខ្សែ ដែលមានសរុបជាសន្លឹកចំនួន៧១៦ សន្លឹក ។ក្រៅពីវត្ថុបុរាណក្នុងខេត្តកំពង់ឆ្នាំងដែលមានចំនួន៤៣២ ដុំ យើងក៏នៅមានសមុច្ច័យ ជាកុលាលភាជដែលខ្ចីអំពីខេត្តចំនួន ៣គឺខេត្តកោះកុង បន្ទាយមានជ័យនិងឧត្តរមានជ័យ យកមកដាក់តាំង រយៈពេល៣ឆ្នាំផងដែរ។
ការខ្ចីកូលាលភាជពីខេត្តគេ យកតាំងក្នុងខេត្តយើងក្នុងគោលបំណងឲ្យប្រជាពលរដ្ឋបានស្វែងយល់អំពីកុលាលភាជ ផលិតនៅខេត្ត គេនិងខេត្តយើងខុសគ្នាដូចម្ដេច ដើម្បីឲ្យងាយស្រួលចំណាំ។
លោកបានបញ្ជាក់ថាកន្លងមកសារមន្ទីរបានបើកទ្វារជាយូរណាស់មកហើយ។ប៉ុន្តែពុំទាន់មានភ្ញៀវទេសចរណ៍ចេញចូលច្រើននៅឡើយ។ ហើយថ្ងៃនេះផងដែរលោកក៏សូមអំពាវនាវដល់បងប្អូនទាំងភ្ញៀវជាតិនិងអន្តរជាតិអញ្ជើញមកទស្សនាវត្ថុបុរាណរបស់ខ្មែរយើងឲ្យបានច្រើនកុះករដូចដែលបានដាក់ស្លាកជូនដំណឹងនៅរបងក្លោងទ្វារសារមន្ទីរស្រាប់៕
ចែករំលែកព័តមាននេះ