ខេត្តបាត់ដំបង ៖ មហាជនបានរិះគន់យ៉ាងខ្លាំងចំពោះម្ចាស់ផ្ទះជាងក្រឡឹងម្នាក់ ដែលបានជីកគាស់ថ្មបេតុងលើផ្លូវដាំដើមឈើរចំនួន០៦ដើមនៅក្បែររបងសាលាបឋមសិក្សា «មោង» ស្ថិតក្នុងភូមិមោង ឃុំមោង ស្រុកមោងប្ញស្សី តែអាជ្ញាធរស្រុកមិនទើសភ្នែក ហើយបែរជាលើកទឹកចិត្តអ្នកដាំទៅវិញ…
ខេត្តបាត់ដំបង ៖ មហាជនបានរិះគន់យ៉ាងខ្លាំងចំពោះម្ចាស់ផ្ទះជាងក្រឡឹងម្នាក់ ដែលបានជីកគាស់ថ្មបេតុងលើផ្លូវដាំដើមឈើរចំនួន០៦ដើមនៅក្បែររបងសាលាបឋមសិក្សា «មោង» ស្ថិតក្នុងភូមិមោង ឃុំមោង ស្រុកមោងប្ញស្សី តែអាជ្ញាធរស្រុកមិនទើសភ្នែក ហើយបែរជាលើកទឹកចិត្តអ្នកដាំទៅវិញ ដោយផ្អែកលើយុទ្ធនាការ «ផ្ទះមួយខ្នង ដាំដើមឈើមួយដើម» ។
អ្នកភូមិបានប្រាប់ថា អ្នកដាំដើមឈើនោះឈ្មោះ បាន កេង ភេទប្រុស មុខរបរជាងក្រឡឹង រស់នៅភូមិ ឃុំខាងលើ ។ គាត់មិនព្រមជីករណ្ដៅ ដាំកូនឈើនៅខាងមុខផ្ទះគាត់ទេ តែបែរជាទៅជីកគាស់ផ្លូវបេតុងរ៉បចិញ្ចើមផ្លូវជាប់របងសាលារៀន រួចដាំកូនឈើចំនួន០៦ដើម ដោយគ្មានអាជ្ញាធរ ឬមន្ត្រីជំនាញណាម្នាក់ទើសភ្នែក ឬមានវិធានការអ្វីឡើយ បើទោះជាគេឃើញលោកអភិបាលរងស្រុកម្នាក់បានចុះត្រូតពិនិត្យក្ដី។
បើតាមអ្នករស់នៅក្បែរនោះបាននិយាយថា ដំបូងឡើយនៅក្បែរសាលានោះ មានដើមឆាត់ធំៗ ហើយគេតែឃើញម្ចាស់ផ្ទះជាងក្រឡឹងនោះ តែងយកដែកទៅកាត់ ឬធ្វើការងារផ្សេងៗជ្រកក្រោមឆាត់នោះ ។ ប្រភពដដែលបានបញ្ជាក់ថា កាលពីពេលថ្មីៗនេះ សប្បុរសជនបានឧបត្ថម្ភជួយរៀបការ៉ូឡាលើដីចំណីផ្លូវជាប់របងសាលាឲ្យស្អាត និងសម្រាប់ផ្លូវថ្មើជើងផង ហើយបានកាត់ដើមឆាត់ធំៗចេញ ចៀសវាងកុំឲ្យខូចការ៉ូឡា ។ ប៉ុន្តែប៉ុន្មានថ្ងៃកន្លងទៅនេះ ស្រាប់តែគេឃើញម្ខាស់ផ្ទះជាងក្រឡឹងជីកគាស់លើផ្លូវបេតុង រួចយកកូនឈើទៅដាំចំនួន០៦ដើមធ្វើឲ្យចិញ្ចើមផ្លូវខូចខាត តែអាជ្ញាធរអត់មានចំណាត់ការអ្វីសោះ ។
ប្រជាពលរដ្ឋបាននិយាយដែរថា រឿងម្ចាស់ផ្ទះជាងក្រឡឹងគាស់ផ្លូវបេតុងដាំកូនឈើនេះ គេបានរាយការណ៍ប្រាប់លោកអភិបាលស្រុកមោងប្ញស្សីដែរ ។ ហើយគេឃើញលោកឡុង សុភឿន អភិបាលរងស្រុក ដឹកនាំកម្លាំងចុះទៅពិនិត្យផ្ទាល់ដែរ តែហាក់មិនមានប្រតិកម្មចំពោះការដាំដើមឈើលើផ្លូវនេះទេ ។ បើតាមបប្រជាពលរដ្ឋបានប្រាប់ថា គេថែមទាំងបានទូរស័ព្ទទៅកាន់លោកទេព ហន អភិបាលស្រុកមោងប្ញស្សីថែមទៀតផង ដើម្បីរាយការណ៍ និងសួរនាំពីរឿងជាងក្រឡឹងដាំកូនឈើលើផ្លូវ តែការឆ្លើយតបរបស់លោកអភិបាលស្រុករូបនេះ ក៏មិនមានប្រតិកម្មទៅនឹងរឿងនេះដែរ ។ ផ្ទុយទៅវិញ លោកអភិបាលស្រុកហាក់ត្រូវដងត្រូវផ្លែជាមួយអ្នកដាំកូនឈើ ព្រោះជាងក្រឡឹងនោះមានលុយច្រើន ។
មិនតែប៉ុណ្ណោះ លោកអភិបាលស្រុករូបនេះ ថែមទាំងនិយាយថា ការដាំកូនឈើលើផ្លូវនោះ គឺស្របទៅនឹងគោលការណ៍របស់លោកអភិបាលខេត្តដែលបានប្រកាសបើកយុទ្ធនាការ «ផ្ទះមួយខ្នង ដាំកូនឈើមួយដើម» ដូច្នេះ មិនប៉ះពាល់អ្វីទេ ។
ជុំវិញករណីនេះ កោះសន្តិភាពមិនអាចទំនាក់ទំនងសុំការបំភ្លឺពីម្ចាស់ផ្ទះជាងក្រឡឹងឈ្មោះ បាន កេង ដែលជាដាំគាស់បេតុងដាំកូនឈើលើផ្លូវបានទេ នៅរសៀលថ្ងៃទី ០៨ វិច្ឆិកា ។ ដោយឡែក លោក ទេព ហន អភិបាលស្រុកមោងប្ញស្សី ដែលប្រជាពលរដ្ឋសង្ស័យថា បានត្រូវដង ត្រូវផ្លែជាមួយអ្នកដាំកូនឈើលើផ្លូវនោះ ក៏មិនអាចសុំការបំភ្លឺបានដែរ ព្រោះលោកមិនលើកទូរស័ព្ទ ។
បើតាមមន្ត្រីម្នាក់ ដែលសុំមិនប្រាប់ឈ្មោះបាននិយាយថា គាត់បានឃើញកន្លែងគេដាំកូនឈើនោះហើយ គឺដាំរបៀបនេះមិនត្រឹមត្រូវទេ ព្រោះដាំលើផ្លូវ ។ មន្ត្រីដដែលបានផ្ដល់ជាមតិថា លោកចៅហ្វាយស្រុក គួរតែប្រាប់ឲ្យអ្នកដាំដើមឈើនោះដកចេញវិញ ព្រោះអាចបង្កឲ្យមានបញ្ហាគ្រប់យ៉ាងនៅពេលដើមឈើនោះធំ ធ្វើឲ្យខូចទាំងផ្លូវ ហើយថែមទាំងប៉ះពាល់ដល់សណ្ដាប់ធ្នាប់សាធារណៈទៀតផង ។
មន្ត្រីរូបនេះក៏បានរិះគន់ដែរថា អ្នកដាំដើមឈើលើផ្លូវខាងលើនេះ គឺមានចេតនាដាំជាម្លប់ដើម្បីងាយស្រូលជ្រកធ្វើការងារខ្លួនឯង តែមិនបានគិតពីផលប៉ះពាល់សណ្ដាប់ធ្នាប់សាធារណៈនោះទេ ។ រីឯអាជ្ញាធរស្រុកវិញ បានចុះទៅពិនិត្យឃើញផ្ទាល់ហើយ បែជាមិនទើសភ្នែកបន្តិចសោះទុកឲ្យមហាជនរិះគន់បែកផ្សែង៕
ចែករំលែកព័តមាននេះ