រាជធានីភ្នំពេញ ៖ បន្ទប់ផ្ទះល្វែងមួយកន្លែង នៅជាន់ទី៤ ក្នុងភូមិបាក់ទូក សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ ត្រូវបានអគ្គិភ័យឆាបឆេះយ៉ាងសន្ធោសន្ធៅ បណ្ដាលឲ្យរងការខូចខាតទាំងស្រុង…
រាជធានីភ្នំពេញ ៖ បន្ទប់ផ្ទះល្វែងមួយកន្លែង នៅជាន់ទី៤ ក្នុងភូមិបាក់ទូក សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ ត្រូវបានអគ្គិភ័យឆាបឆេះយ៉ាងសន្ធោសន្ធៅ បណ្ដាលឲ្យរងការខូចខាតទាំងស្រុង ខណៈពេលដែលភ្លៀងបានបង្អុរធ្លាក់យ៉ាងខ្លាំង ។
ហេតុការណ៍នេះបង្កឲ្យមានការភ្ញាក់ផ្អើលនៅវេលាម៉ោង០៤រសៀលថ្ងៃទី០២ ខែវិច្ឆិកា ឆ្នាំ២០២៤ ហើយរថយន្តពន្លត់អគ្គិភ័យជាច្រើនគ្រឿង បានទៅអន្តរាគមន៍ បាញ់ពន្លត់ ។
ម្ចាស់ផ្ទះ ដែលត្រូវភ្លើងឆេះ មានឈ្មោះ អ៊ាង ណាត ភេទប្រុស អាយុ៧៩ឆ្នាំ ជាបុគ្គលិកក្រុមហ៊ុន ស្នាក់នៅផ្ទះលេខ១២៩ កន្លែងកើតហេតុខាងលើ ។
តាមសាក្សីបានឲ្យដឹងថា នៅមុនពេលកើតហេតុ គេឃើញភ្លើងបានឆាប់ឆេះចេញពីបន្ទប់ជាន់ទី៤ ផ្សែងហុយខ្មួលខ្មាញ់ទៅលើអាកាស និងមានអណ្ដាតភ្លើងយ៉ាងសន្ធោសន្ធៅ បង្គឲ្យមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋ និងអាជ្ញាធរមូលដ្ឋាន ហើយបានទាក់ទងហៅរថយន្តពន្លត់អគ្គិភ័យ មកអន្តរាគមន៍បាញ់ពន្លត់ ទាំងភ្លៀងធ្លាក់យ៉ាងខ្លាំង ។
តាមនគរបាលការិយាល័យបង្ការ ពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ បានឲ្យដឹងថា នៅក្នុងហេតុការណ៍នេះ រថយន្តពន្លត់អគ្គិភ័យចំនួន ៧គ្រឿង បានទៅអន្តរាគមន៍បាញ់ពន្លត់ ហើយភ្លើងបានរលត់ទៅវិញនៅវេលាម៉ោង៤និង៤៥នាទីរសៀលថ្ងៃដដែល ។
មន្ត្រីនគរបាល ឲ្យដឹងបន្តថា មូលហេតុកើតមានអគ្គិភ័យនេះ បណ្ដាលមកពីឆ្លងចរន្តអគ្គិសនីពីឆ្នាំងសាក តាមរយៈការសាកថ្មទូរសព្ទដៃ ។
តាមនគរបាលបានឲ្យដឹងទៀតថា អគ្គិភ័យនេះបណ្ដាលឲ្យបន្ទប់ផ្ទះល្វែងនៅជាន់ទី ៤ ទំហំ ៦ម៉ែត្រ គុណ ១៦ម៉ែត្រ ត្រូវភ្លើងឆេះរងការខូចខាតទាំងស្រុង រួមជាមួយសម្ភារមួយចំនួនទៀត ៕
ចែករំលែកព័តមាននេះ