រាជធានីភ្នំពេញ ៖ នៅក្នុងកិច្ចប្រជុំមួយកាលពីព្រឹកថ្ងៃទី២៨ ខែតុលា នៅមជ្ឈមណ្ឌលជាតិហ្វឹកហ្វឺនកីឡាក្នុងពហុកីឡដ្ឋានជាតិអូឡាំពិក ឯកឧត្តមវ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា…
រាជធានីភ្នំពេញ ៖ នៅក្នុងកិច្ចប្រជុំមួយកាលពីព្រឹកថ្ងៃទី២៨ ខែតុលា នៅមជ្ឈមណ្ឌលជាតិហ្វឹកហ្វឺនកីឡាក្នុងពហុកីឡដ្ឋានជាតិអូឡាំពិក ឯកឧត្តមវ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា តំណាងដ៏ខ្ពង់ខ្ពស់ឯកឧត្តមបណ្ឌិតសភាចារ្យហង់ជួន ណារ៉ុនឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជននិងកីឡា បានណែនាំនិងផ្ដាំផ្ញើទៅដល់ថ្នាក់ដឹកនាំកីឡាទាំងអស់ដែលមកពីតាមរាជធានី-ខេត្ត ត្រូវត្រៀមខ្លួនឱ្យបានល្អ និងយកចិត្តទុកដាក់ខ្ពស់ក្នុងការប្រកួតកីឡាជាតិដែលគ្រោងចាប់ផ្ដើមនៅថ្ងៃទី២៩ ខែតុលាឆ្នាំ២០២៤។
ឯកឧត្តម វ៉ាត់ ចំរើន បានគូសបញ្ជាក់ថាដំណាក់កាលនេះគេលែងនិយាយអំពីបច្ចេកទេសហើយ ត្រូវតែយកបេះដូងមកធ្វើ ព្រោះថាគ្រប់សហព័ន្ធកីឡាជាតិទាំងអស់សុទ្ធតែបានដឹងច្បាស់អំពីតួនាទីរបស់ខ្លួនថាត្រូវធ្វើអ្វីខ្លះហើយ ព្រោះអ្នកទាំងអស់គ្នាគឺជាអ្នកដឹកនាំកីឡាមកពីតាមបណ្ដាខេត្តក្រុង ដែលជាអ្នកត្រូវគិតគូរដោះស្រាយគ្រប់បញ្ហារបស់កីឡាករ កីឡាការិនី ជាពិសេសទៅលើការគ្រប់គ្រង ដូចជាការផ្ដល់ព័ត៌មាន ការងារភារកិច្ច ឱ្យបានច្បាស់លាស់ទៅដល់អ្នកដែលមានភារកិច្ចធ្វើការជាមួយគ្នា។
ប៉ុន្តែបើសិនជាយើងមានការឆកល្វែងក្នុងកិច្ចការណាមួយនោះ គឺយើងនេះហើយជាអ្នកដែលត្រូវ
រ៉ាប់រងកំហុសឆ្គងដែលបានកើតឡើងទាំងអស់នោះ។ ឯកឧត្តមបានសំណូមពរទៅដល់មន្ត្រីដឹកនាំទាំងអស់ ត្រូវមានការផ្លាស់ប្ដូរឥរិយាបថក្នុងការធ្វើការ ជាពិសេសការប្រើពាក្យសម្ដីមិនសមរម្យដោយប្រការណាមួយនៅមុនពេលប្រកួតដែលនាំឱ្យមានការថ្នាំងថ្នាក់ពីអ្នកធ្វើការជាមួយជាពិសេសគ្រូបង្វឹកដែលមានវ័យចាស់ជាងយើង។
ឯកឧត្តមបន្តថា ដូចជាការប្រកួតជាដើមយើងត្រូវតែអនុវត្តទៅតាមបច្ចេកទេសដើម្បីទទួលបានលទ្ធផលឈ្នះចាញ់ មិនមែនប្រកួតទៅតាមការបង្ខិតបង្ខំទាមទារថាត្រូវតែឈ្នះនោះឡើយ ។ ជាពិសេសគ្រូដឹកនាំមិនត្រូវឱ្យមានបញ្ហាក្នុងពេលប្រកួតនោះទេ ដូច្នេះគ្រប់ការប្រកួតទាំងអស់ត្រូវតែអនុវត្តទៅតាមបច្ចេកទេស។
ចំណុចសំខាន់បំផុតគឺគ្រូពេទ្យ កាលណាការប្រកួតដំណើរការទៅបានល្អ កុំភ្លេចរឿងគ្រូពេទ្យ ព្រោះ
ថាកីឡាករម្នាក់ៗមិនមែនសុទ្ធតែមានសុខភាពល្អទាំងអស់គ្នានោះទេ ម្យ៉ាងវិញទៀតសុវត្ថិភាពកីឡាករគឺជាអាទិភាពខ្ពស់បំផុតក្នុងការរៀបចំកីឡា ។ ដូច្នេះ ចំពោះគណៈកម្មការពេទ្យក៏ត្រូវមានការប្រជុំក្នុងការងារទទួលខុសត្រូវផ្សេងទាំងការដឹកជញ្ជូនជាដើម ។
ឯកឧត្តមបានសង្កត់ធ្ងន់ថា ក្នុងចំណោមកីឡាករដែលមកប្រកួតជាង៣ពាន់នាក់ មិនមែនមានសុខភាពល្អទាំងអស់នោះទេ។ ដូច្នេះត្រូវចែកគ្នាឱ្យដាច់រវាងគ្រូពេទ្យ និងអាជ្ញាកណ្ដាល ចៅក្រម ក្នុងការបំពេញតួនាទី និងភារកិច្ចរៀងៗខ្លួន រួមទាំងការដឹកជញ្ជូនធ្វើយ៉ាងណាឱ្យបានទាន់ពេលវេលា ព្រោះច្បាប់ការប្រកួតគេប្រកាសតែពីរដងប៉ុណ្ណោះ បើមកមិនទាន់គឺចប់ហើយ។ ដូច្នេះគ្រប់សហព័ន្ធទាំងអស់ត្រូវរួមគ្នាអនុវត្តឱ្យបាន ដើម្បីឱ្យដំណើរការប្រកួតកីឡាជាតិរបស់យើងដំណើរការទៅបានរលូនល្អ៕
ចែករំលែកព័តមាននេះ