រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ថា នឹងបន្តធ្វើយ៉ាងណាឱ្យកូនខ្មែរនៅគ្រប់កន្លែងទាំងអស់ ទទួលបានការសិក្សារៀនសូត្រ ជាមួយសាលាល្អ…
រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ថា នឹងបន្តធ្វើយ៉ាងណាឱ្យកូនខ្មែរនៅគ្រប់កន្លែងទាំងអស់ ទទួលបានការសិក្សារៀនសូត្រ ជាមួយសាលាល្អ និងមេរៀនទំនើបៗ ពាក់ព័ន្ធបច្ចេកវិទ្យាជាដើម តាមរយៈការបន្តជំរុញការកសាង ។
ថ្លែងក្នុងឱកាសអញ្ជើញចូលរួមក្នុង “ពិធីអបអរសាទរសមិទ្ធផលនានា ក្រោមគម្រោងជំនួយ របស់សាធារណរដ្ឋប្រជាមានិតចិន សម្រាប់ការកែលម្អបរិស្ថានសាលារៀន និងផ្គត់ផ្គង់សម្ភារៈបរិក្ខារអប់រំនៅកម្ពុជា” ស្ថិតនៅវិទ្យាល័យពាមជីកង ឃុំពាមជីកង ស្រុកកងមាស ខេត្តកំពង់ចាម នាថ្ងៃទី២៦ ខែតុលា ឆ្នាំ២០២៤ សម្តេចធិបតី ហ៊ុន ម៉ាណែត មានប្រសាសន៍ថា “នៅក្នុងថវិកាជាតិប្រចាំឆ្នាំ គឺយើងតែងតែបង្កើន ទៅលើវិស័យអទិភាពធំៗជាច្រើន ក្នុងនោះធំ២ គឺសុខាភិបាល និងអប់រំ ដែលយើងមិនអាចចោលបាន ។ ហើយចំណាយទៅលើវិស័យសុខាភិបាលរបស់យើង ចំណាយទៅលើកម្មវិធីគាំពារសង្គម ដើម្បីធ្វើឱ្យសុខភាពប្រជាពលរដ្ឋរបស់យើងកាន់តែល្អ ការចំណាយរបស់យើង កម្មវិធីឧបត្ថម្ភ រួមទាំងឧបត្ថម្ភអាហារមួយចំនួន នៅតាមសាលាមួយចំនួន គឺយើងបានបង្កើនសហការជាមួយដៃគូរបស់យើង ប៉ុន្តែអ្វីដែលសំខាន់ ចំណីទាំងផ្លូវកាយ ចំណីទាំងអារម្មណ៍ និងចំណេះដឹងឱ្យកាន់តែរឹងមាំ” ។
ក្នុងឱកាសនោះដែរ សម្តេចបវរធិបតី គូសបញ្ជាក់ថា “យើងនឹងបន្តធ្វើយ៉ាងណា ឱ្យកូនខ្មែររបស់យើង នៅគ្រប់កន្លែងទាំងអស់ មិនថា នៅទីនេះ ម្សិលម្ងៃខ្ញុំទៅមណ្ឌលគីរី ខ្ញុំឃើញក្មួយៗនៅទីនោះ ថ្នាក់ទី១១ ថ្នាក់ទី១២ ក៏មានឱកាសអង្គុយរៀននៅសាលាល្អ មានឱកាសរៀន នូវមេរៀនទំនើប នេះហើយដែលយើងនឹងបន្តរុញតទៅទៀត ពិតណាស់យើងបានរីកច្រើន ប៉ុន្តែមិនទាន់គ្រប់កន្លែងនោះទេ ហើយជាពិសេសនៅតំបន់ខ្លះ ដែលយើងឃើញថា កន្លែងថ្មី កន្លែងដែលធ្លាប់តែជាទីលានប្រយុទ្ធគ្នាពីមុន យើងដោះមីន បង្កើតភូមិ ចឹងចំនួនប្រជាជនកើនលឿនជាង យើងបន្តជំរុញកសាង” ៕
ចែករំលែកព័តមាននេះ