ទីក្រុងហាណូយ៖ អាជ្ញាធរវៀតណាមបានចេញបញ្ជាឱ្យផ្អាកការហោះហើរចេញចូលអាកាសយានដ្ឋានយ៉ាងតិចចំនួនបួនកន្លែងនៅបណ្ដាខេត្តភាគកណ្ដាលដើម្បីទុកជាផ្នែក១នៃការត្រៀមទប់ទល់នឹងខ្យល់ព្យុះដ៏ធំ១ឈ្មោះត្រាមីដែលទើបតែវាយប្រហារប្រទេសហ្វ៊ីលីពីនយ៉ាងចាស់ដៃស្លាប់មិនមែនតិចនាក់ទេ និងបាត់ខ្លួនជាច្រើននាក់រកមិនទាន់ឃើញនៅឡើយផង។
ដូច្នេះ វៀតណាមមិនចង់មើលស្រាលខ្យល់ព្យុះត្រាមីនេះទេព្រោះខ្លាចមានជោគវាសនាដូចករណីខ្យល់ព្យុះឈ្មោះយ៉ាជីដែលបានសម្លាប់មនុស្សយ៉ាងរង្គាលនៅវៀតណាម។ ក្រសួងឧតុនិយមព្យាករថាខ្យល់ព្យុះត្រាមីនឹងបោកបក់ទៅលើប្រទេសវៀតណាមចាប់ពីថ្ងៃទី២៦-២៨ ខែតុលា និងពាំនាំទៅជាមួយនូវភ្លៀងលាយខ្យល់កន្ត្រាក់ និងគ្រោះទឹកជំនន់យ៉ាងល្ហល្ហាច។
សព្វថ្ងៃនេះ នៅពេលមានខ្យល់ព្យុះត្រូវតែមានភ្លៀងធ្លាក់ខ្លាំង ការបាក់ដី និងគ្រោះទឹកជំនន់អមមកជាមួយផង។ មូលហេតុដោយសារពិភពលោកទទួលរងឥទ្ធិពលអាក្រក់ពីការប្រែប្រួលអាកាសធាតុ និងការហក់ឡើងកាន់តែខ្ពស់ទៅៗនៃទឹកសមុទ្រ (ឬនីវ៉ូទឹកសមុទ្រ)។ ម៉្លោះហើយធ្វើឱ្យតំបន់ជាច្រើនដែលធ្លាប់តែនៅពីលើទឹកសមុទ្របែរជានៅក្រោមទឹកសមុទ្រវិញម្ដង។ យូរៗទៅប្រទេសនានាអាចនឹងមានជោគវាសនាដូចហូឡង់ទេដែលត្រូវលើកទំនប់ព័ទ្ធជុំវិញប្រទេសដើម្បីទប់ទឹកសមុទ្រ។
សម្រាប់ករណីខ្យល់ព្យុះត្រាមីដែលវាយប្រហារប្រទេសវៀតណាមលើកនេះ អាជ្ញាធរយល់ថាសភាពការណ៍មានភាពច្របូកច្របល់ និងស្មុគស្មាញពិបាកប៉ាន់ស្មាន។ គ្រាន់តែគេដឹងថាទីតាំងដែលរងគ្រោះខ្លាំងជាងគេគឺព្រលានយន្តហោះ។ នេះជាអ្វីដែលអាកាសចរស៊ីវិលវៀតណាមបានប្រកាសឱ្យដឹង។ ក្នុងនោះ អាកាសយានដ្ឋានហ្វ៊ូបាយ (Phu Bai) ត្រូវតែបិទដំណើរការទាំងស្រុងចាប់ពីព្រឹកថ្ងៃអាទិត្យនេះ (២៧ តុលា) រហូតដល់ល្ងាចថ្ងៃដដែល ឬរហូតដល់ថ្ងៃចន្ទទើបអាចបើកទ្វារឡើងវិញ។
បណ្ដាខេត្តភាគកណ្ដាលដូចជាក្វាងប៊ិញ (Quang Binh), ក្វាងង៉ាយ (Quang Ngai) និងហាទិញ (Ha Tinh) នឹងមានភ្លៀងធ្លាក់ខ្លាំងទាំងយប់ទាំងថ្ងៃចាប់ពីថ្ងៃទី២៦-២៨ ខែតុលា។ ដូច្នេះ អាជ្ញាធរសូមអំពាវនាវឱ្យត្រៀមខ្លួនទប់ទល់នឹងហេតុការណ៍បាក់ដី។ វៀតណាមឆ្នាំនេះរងគ្រោះយ៉ាងដំណំដោយសារគ្រោះធម្មជាតិផ្ទួនៗគឺខ្យល់ព្យុះ ភ្លៀងធ្លាក់ខ្លាំង បាក់ដី និងទឹកជំនន់។
គ្រាន់តែខ្យល់ព្យុះយ៉ាជីវាយប្រហារ១ប្រាវកាលពីវគ្គមុនធ្វើឱ្យវៀតណាមខាតបង់ទ្រព្យសម្បត្តិគិតជាទឹកប្រាក់៣៣០០លានដុល្លារ។ ក្រៅពីនេះ មនុស្សស្លាប់២៩១នាក់ និងបាត់ខ្លួនរាប់សិបនាក់ទៀត។ រហូតមកដល់ពេលនេះ វៀតណាមមិនទាន់ស្ដារហេដ្ឋារចនាសម្ព័ន្ធឱ្យបានល្អដូចដើមនៅឡើយទេព្រោះខ្យល់ព្យុះយ៉ាជីទើបតែកន្លងផុតទៅបានជាង១ខែប៉ុណ្ណោះ។
ងាកទៅចាប់អារម្មណ៍ស្ថានការណ៍នៅហ្វ៊ីលីពីនវិញម្ដងពាក់ព័ន្ធនឹងខ្យល់ព្យុះត្រាមី។ ថ្វីដ្បិតខ្យល់ព្យុះបានស្ងប់ស្ងាត់ទៅវិញក៏ពិតមែន ក៏ប៉ុន្តែហ្វ៊ីលីពីនមិនទាន់រួចខ្លួននៅឡើយទេ។ អាជ្ញាធរព្យាករថាខ្យល់ព្យុះនឹងបក់វិលជុំទៅប្រទេសហ្វ៊ីលីពីនសាជាថ្មីនៅសប្ដាហ៍ក្រោយ ហើយនឹងបង្កជាភ្លៀងធ្លាក់ខ្លាំង គ្រោះទឹកជំនន់ និងការបាក់ដីដូចមុនទៀត។ សាកសពជនរងគ្រោះត្រូវគេរកឃើញជាបន្តបន្ទាប់ ហើយធ្វើឱ្យចំនួនអ្នកស្លាប់សរុបកើនឡើងដល់១២៦នាក់៕
ចែករំលែកព័តមាននេះ