ទីក្រុងព្យុងយ៉ាង៖ នៅទីបំផុតបន្ទាប់ពីលោកពូទីនបញ្ចេញសារនយោបាយថាទោះបីកូរ៉េខាងជើង និងរុស្ស៊ីពង្រឹងទំនាក់ទំនងដល់កម្រិតណាក៏ដោយក៏វាជាកិច្ចការផ្ទៃក្នុងរបស់រុស្ស៊ី ថ្ងៃនេះរបបក្រុងព្យុងយ៉ាងក៏បញ្ចេញសារនយោបាយបន្ទរតាមពីក្រោយផងដែរ។ ព្យុងយ៉ាងប្រកាសថាបើទុកជាខ្លួនបញ្ជូនកងទ័ពទៅជួយរុស្ស៊ីនៅក្នុងសង្គ្រាមអ៊ុយក្រែនក៏គ្មានទាស់ខុសអ្វីដែរ។
ព្យុងយ៉ាងអះអាងថាការបញ្ជូនទ័ពទៅរុស្ស៊ីជាទង្វើដែលស្របនឹងច្បាប់អន្តរជាតិ។ ប៉ុន្តែព្យុងយ៉ាងមិនបានបញ្ជាក់ឱ្យច្បាស់ថាកងទ័ពរបស់ខ្លួនពិតជាបានទៅដល់ប្រទេសរុស្ស៊ី និងបានបញ្ជូនបន្តទៅសមរភូមិមុខដូចការផ្សាយរបស់សារព័ត៌មានដែរឬទេ។ ឥឡូវនេះ ប្រទេសមួយចំនួនចាប់ផ្ដើមបញ្ចេញប្រតិកម្មចំពោះរឿងនេះ។ យោងតាមអ៊ុយក្រែន អាមេរិក និងក្រុមសម្ព័ន្ធមិត្តលោកខាងលិច ពួកគេមានភស្តុតាងបញ្ជាក់ថារបបក្រុងព្យុងយ៉ាងបានបញ្ជូនទ័ពរាប់ពាន់នាក់ទៅរុស្ស៊ីពិតមែន។
កាលពីមុននេះទីក្រុងម៉ូស្គូ និងព្យុងយ៉ាងបានចេញមុខបដិសេធព័ត៌មាននេះ និងចាត់ទុកថាវាជាព័ត៌មានចចាមអារ៉ាមដែលគ្មានមូលដ្ឋានច្បាស់លាស់។ ប៉ុន្តែនៅពេលអ្នកសារព័ត៌មានសាកសួរលោកពូទីនដើម្បីស្នើសុំឱ្យលោកបញ្ជាក់ឱ្យបានច្បាស់ លោកមិនបានឆ្លើយតបដោយត្រង់ៗថាមាន ឬគ្មានកងទ័ពកូរ៉េខាងជើងនៅលើទឹកដីរុស្ស៊ីទេ។ លោកនិយាយនៅក្នុងន័យទូទៅថាវាជាសិទ្ធិរបស់រុស្ស៊ីក្នុងការពង្រឹងការអនុវត្តតាមកិច្ចព្រមព្រៀងការពារគ្នាទៅវិញទៅមករវាងព្យុងយ៉ាង និងម៉ូស្គូ។
តាមរយៈសេចក្ដីថ្លែងការណ៍ដែលផ្សព្វផ្សាយនៅលើកញ្ចក់ទូរទស្សន៍ជាតិកូរ៉េខាងជើងខេស៊ីអឹនអេ (KCNA) អនុរដ្ឋមន្ត្រីកូរ៉េខាងជើង លោកគីមជុងគ្យូ (Kim Jong Gyu) ថ្លែងថាក្រសួងមិនបានពាក់ព័ន្ធដោយផ្ទាល់នៅក្នុងបញ្ហានេះទេ ហើយវាជាកិច្ចការរបស់ក្រសួងការពារជាតិជាអ្នកទទួលខុសត្រូវខាងចាត់ចែងកងទ័ព។ ដូច្នេះ ក្រសួងការបរទេសសូមមិនធ្វើអត្ថាធិប្បាយអ្វីទាំងអស់ពាក់ព័ន្ធនឹងសំណួរថាតើកូរ៉េខាងជើងបានបញ្ជូនកងទ័ពទៅប្រទេសរុស្ស៊ីដែរឬទេ។
ប៉ុន្តែអនុរដ្ឋមន្ត្រីរូបនេះបញ្ជាក់ថាបើសិនមានរឿងនេះកើតឡើងមែនដូចអ្វីដែលសារព័ត៌មានតូចធំបានចុះផ្សាយយ៉ាងគគ្រឹកគគ្រេងទូទាំងពិភពលោកមែននោះ លោកយល់ថាកូរ៉េខាងជើងអនុវត្តយ៉ាងត្រឹមត្រូវទៅតាមច្បាប់អន្តរជាតិ។ ផ្ទុយទៅវិញអ៊ុយក្រែនយល់ផ្សេងពីនេះ។ អ៊ុយក្រែនយល់ថាបើកូរ៉េខាងជើងពិតជាប្រឡូកខ្លួននៅក្នុងសង្គ្រាមនេះមែន បានន័យថាពួកគេកំពុងប្រព្រឹត្តខុសច្បាប់ហើយដោយយោងទៅតាមច្បាប់អន្តរជាតិ៕
ចែករំលែកព័តមាននេះ