រាជធានីភ្នំពេញ ៖ រថយន្តម៉ាកហ៊ីយ៉ាន់ដាយ ១គ្រឿង ដឹកបន្លែជាច្រើនតោន ពុំដឹងថា នាំចូលមកពីប្រទេសវៀតណា ឬដឹកមកពីទីណានោះទេ នាំចូលមកលក់នៅរាជធានីភ្នំពេញ គ្រាន់តែអ្នកបើកបរប្រាប់ថា…
រាជធានីភ្នំពេញ ៖ រថយន្តម៉ាកហ៊ីយ៉ាន់ដាយ ១គ្រឿង ដឹកបន្លែជាច្រើនតោន ពុំដឹងថា នាំចូលមកពីប្រទេសវៀតណា ឬដឹកមកពីទីណានោះទេ នាំចូលមកលក់នៅរាជធានីភ្នំពេញ គ្រាន់តែអ្នកបើកបរប្រាប់ថា ដឹកមកពីក្រោម។ សង្ស័យផ្ទុកធ្ងន់ហួសមាឌ ខណៈកំពុងបើកបរសុខៗ ស្រាប់តែក្រឡាប់ចាក់បន្លែចោលពេញផ្លូវតែម្ដង ប៉ុន្តែជាសំណាងល្អ ពុំបានបណ្ដាលឲ្យអ្នកបើកបរ ឬអ្នកដំណើរណាម្នាក់រងរបួសនោះឡើយ គ្រាន់តែខូចខាតរថយន្ត និងខូចខាតបន្លែខ្លះៗ តែប៉ុណ្ណោះ ។
ឧប្បត្តិហេតុនោះ បានកើតឡើងកាលពីវេលាម៉ោង៤ល្ងាច ថ្ងៃទី២៥ ខែតុលា ឆ្នាំ ២០២៤នេះ នៅតាមផ្លូវលេខ២១៧ ហៅផ្លូវចំការដូង ស្ថិតនៅក្នុងភូមិស្រុកចេក សង្កាត់ជើងឯក ខណ្ឌដង្កោ រាជធានីភ្នំពេញ ។
រថយន្តម៉ាកហ៊ីយ៉ាន់ដាយខាងលើនោះ ពណ៍ស ពាក់ស្លាកលេខ ភ្នំពេញ 3A-0279 បើកបរដោយបុរសមិនស្គាល់អត្តសញ្ញាណម្នាក់ ដឹកបន្លែចម្រុះច្រើនមុខ ទម្ងន់រាប់តោន និងវេចខ្ចប់ដោយថង់ កេសស្នោរ និងបាវ ជាដើម ។
តាមប្រភពីកន្លែងកើតហេតុ បានប្រាប់ឲ្យដឹងថា នៅមុនពេលកើតហេតុ រថយន្តនេះ បើកបរធ្វើដំណើរតាមផ្លូវលេខ២១៧ ហៅផ្លូវចំការដូង ក្នុងទិសដៅពីត្បូងទៅជើង ចូលរាជធានីភ្នំពេញ ក្នុងល្បឿនលឿនគួរសមដែរ ។ លុះពេលទៅដល់ត្រង់ចំណុចកើតហេតុ សង្ស័យផ្ទុកធ្ងន់ និងខ្ពស់ហួសមាឌ ហើយទំនងមានសភាពឃ្លេងឃ្លោងផងនោះ ស្រាប់តែក្រឡាប់ដេកផ្អៀងស្ដូកលើផ្លូវ និងចាក់បន្លែចោលពេញផ្លូវ តែម្ដង ។
ប្រភពដដែល បានប្រាប់ឲ្យដឹងបន្តទៀតថា ពេលនោះ ពុំបានបណ្ដាលឲ្យអ្នកបើកបរ ឬអ្នកដំណើរណាម្នាក់រងរបួស ឬស្លា.ប់នោះឡើយ គ្រាន់តែខូចខាតរថយន្ត និងខូចខាតបន្លែខ្លះៗប៉ុណ្ណោះ ។
ចំណែកឯ អ្នកបើកបររថយន្ត បានប្រាប់ថា ខណៈកំពុងបើកបរនោះ គាត់បើកយឺតៗ ហើយអត់បានគេចអ្វីនៅខាងមុខនោះទេ ប៉ុន្តែពុំដឹងថាយ៉ាងម៉េចទេ ស្រាប់តែក្រឡាប់តែម្ដង ។ គាត់មិនបានប្រាប់អោយដឹងថា បន្លែទាំងនោះដឹកចេញពីទីណានោះទេ ដោយគ្រាន់តែប្រាប់ថា ដឹកមកពីក្រោម ដោយពុំដឹងថា ដឹកមកពីប្រទេសវៀតណាម ឬតំបន់ណាមួយនោះឡើយ ។
ក្រោយពេលកើតហេតុ នគរបាលប៉ុស្តិ៍ជើងឯក បានចុះទៅកាន់ទីនោះ ហើយដោយពិនិត្យឃើញថា មិនមានការប៉ះពាល់ដល់ទ្រព្យសម្បត្តិឯកជន និងសម្បត្តិសាធារណៈ ឬបង្កឲ្យមានគ្រោះថ្នាក់ដល់អ្នកដទៃនោះ។ ទើបនគរបាល ឲ្យម្ចាស់ប្រមូលបន្លែចេញពីផ្លូវ ដើម្បីកុំឲ្យមានការកកស្ទះចរាចរណ៍ រំខានដល់ការធ្វើដំណើររបស់សាធារណៈជន ទូទៅ ៕
ចែករំលែកព័តមាននេះ