ខេត្តព្រះសីហនុ ៖ ថ្លែងក្នុងកិច្ចសម្ភាសន៍ នៅព្រឹកថ្ងៃទី២៥ តុលា លោក ឡុង ឌីម៉ង់ អភិបាលរងខេត្តព្រះសីហនុបានឲ្យដឹងថា ភ្ញៀវទេសចរចម្រុះជាតិសាសន៍ហោះហើរត្រង់មកពីប្រទេសរុស្ស៊ី…
ខេត្តព្រះសីហនុ ៖ ថ្លែងក្នុងកិច្ចសម្ភាសន៍ នៅព្រឹកថ្ងៃទី២៥ តុលា លោក ឡុង ឌីម៉ង់ អភិបាលរងខេត្តព្រះសីហនុបានឲ្យដឹងថា ភ្ញៀវទេសចរចម្រុះជាតិសាសន៍ហោះហើរត្រង់មកពីប្រទេសរុស្ស៊ី និងប្រទេសកាហ្សាក់ស្ថានចំនួន២៣៤នាក់ មកកាន់អាកាសយានដ្ឋានអន្តរជាតិខេត្តព្រះសីហនុ នៃព្រះរាជាណាចក្រកម្ពុជាជាលើកដំបូង បន្ទាប់ពីជំងឺកូវីដ-១៩បានស្ងប់ស្ងាត់ទៅវិញ។
លោកអភិបាលរងខេត្តក៏បានបញ្ជាក់ថា នេះជាមោទនភាពសម្រាប់ខេត្តព្រះសីហនុ ក្នុងការទទួលភ្ញៀវទេសចរប៉ែកអឺរ៉ុបមកជាលើកដំបូង មកទស្សនាខេត្តព្រះសីហនុ ដែលជាខេត្តមានសក្តានុពលជាច្រើនក្នុងការទាក់ទាញភ្ញៀវទេសចរជាតិ ទាំងអន្តរជាតិមកលំហែកម្សាន្តតាមរយៈការខិតខំរបស់ប្រមុខរាជរដ្ឋាភិបាលកម្ពុជាក្រសួងទេសចរណ៍ អាជ្ញាធរខេត្តក៏ដូចជាអាជ្ញាធរពាក់ព័ន្ធក្នុងការទាក់ទាញភ្ញៀវទេសចរពីបណ្ដាប្រទេសនានាមកកាន់ព្រះរាជាណាចក្រកម្ពុជា។
លោកបន្តថា ភ្ញៀវទេសចរមកពីប្រទេសរុស្ស៊ី និងប្រទេសកាហ្សាក់ស្ថាននឹងមកជាបន្តបន្ទាប់នៅថ្ងៃនេះ ថ្ងៃស្អែករហូតដល់ខែវិច្ឆិកាឆ្នាំ២០២៤ មានយន្តហោះដឹកភ្ញៀវទេសចរមកជាង៤០យន្តហោះបន្ថែមទៀតផងដែរ មកសម្រាកលំហែក្នុងខេត្តព្រះសីហនុ។
ចំពោះភ្ញៀវទេសចរដែលមកកម្សាន្តនៅក្នុងខេត្តព្រះសីហនុមានរយៈពេលចាប់ពី៥ ថ្ងៃ១សប្តាហ៍ឬក៏១០ថ្ងៃ ហើយភ្ញៀវប្រមាណ១០% ក៏បានទៅទស្សនាកម្សាន្តនៅខេត្តសៀមរាប។
អភិបាលរងខេត្ត ក៏បានបញ្ជាក់ថា ចំពោះភ្ញៀវទេសចរមកពីប៉ែកអឺរ៉ុបមកកាន់ទឹកដីនៃព្រះរាជាណាចក្រកម្ពុជានាពេលនេះ សបញ្ជាក់ឲ្យឃើញពីទំនុកចិត្តសុខសន្តិភាពស្ថិរភាពនយោបាយ នៃប្រទេសកម្ពុជាក្រោមកាដឹកនាំរបស់សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។
ក្នុងនោះ អាជ្ញាធរខេត្តបានរក្សាសន្តិសុខសុវត្ថិភាពជូនភ្ញៀវទេសចរ ទាំងការស្នាក់នៅទាំងបដិសណ្ឋារកិច្ច ដើម្បីធ្វើយ៉ាងណាឲ្យភ្ញៀវទេសចរមានភាពកក់ក្តៅមកសម្រាកលំហែកម្សាន្ត លើទឹកដីខេត្តព្រះសីហនុ នៃព្រះរាជាណាចក្រកម្ពុជាមកម្ដងហើយនិងចង់មកលេងម្ដងទៀត ៕
ចែករំលែកព័តមាននេះ